Comedian search ka hmuh ve dan

¢ Gerrard-a Pa

An ri hluah hluah a, ka en ve duh vak chuang lo a. En loh theih loh chang chu awm tho mah se hetiang hi ka ning ve deuh a.. Ka sawi zawk chu zai intihsiak hi a ni. Kan thalaite hi an zai kim takngial tawh dawna ka hriat avang leh a zing mawlh mawlh deuhva ka hriat avangin thil dang ka khawih san mai thin. Mahse tunah chuan a chi dang, nun hlimna min petu, ninawm reng reng loh en hun a rawn inher chhuak ta a, tute emaw bulah kan khi vur vur ta mai. Tu'n min sel lo se, nun chu a tihlim fuu ni!

Hmaanah, Auhmuna nula rimna khuaa kan awm lai chuan Thangkura, Laltuvela, Eichhi Zoliana, C. Lianmawia, C. Vanlalduha, an tam mai, hengho hiam fiamthu in min awi a. Min awi tak tak a nia. Thangkura te phei kha chu a Vol. 1 kan neih ve loh avangin thiante inah kan leng vang vang thin a. Chutah, ka pa Aizawl kal (a kal hlan chuan sikulah insawitheih nan kan hmang thin) chuan Mizoram Jokes Competition tih ni tain ka hria, a cassette a rawn hawn a......ka thiante nen tape (Four Band ngat) kan bial laih thin. Hetiang hunlai hian alawm, Paihte mah ni ilathiante'n min biak chhiat ngam miah loh! Nuam ve tak chu a ni. Vanlalduha cowboy rorum te, Laltuvela insawithei vel te khan min nuihtir nasa fuu ni!

Hun a liam ve zel a, chu'ngho chuan min nuih tir khat ta a, an hun a liam tel ve te pawh a ni ang. Mahse kan rualpui, thalai nun nena inhmeh tak tak hmanga mipui min tihlimtu Zephyr an lo lang a. Fiamthu hmanga pawisa lalut hnem ber pawl an rawn ni chho ta zel a. An front-man H. Rotluanga chuan mipui tihnuih mai chu duhtawk lovin thalaite 'talent' haichhuah kawngah hma a la leh ta a. Fakawm tia han sawi tur chuan a tehtu ni lo mah ila, a fakawm ve chuan ka hria. Kum hmasa lamah an huaihawt tawh a, hlawhtling takin a kalchhoh pui zel a. Hei, kuminah, a thawh hnihna an rawn huaihawt leh a, fiamthu changkang tak tak kan ngaithlain fiamthu thiam che vel kan hmuh theih phah leh ta a. Lawmawm fuu ni!

Nikum ang bawkin kuminah a endiktute an hmuhnawm leh a. Inelnaa telte hnen bakah a thlirtute pawh fiamthu awmzia min hrilh thin. Hetiang hun hi Comedian Search awm ta lo se chuan kan tawng dawn lo a, mipui hian kan hlep nasa hlein ka hria. TV-a a chhuah avang hian mipui tan a awlsam bawk a. Zai angin a inang a tam thei lo a. Eng nge a rawn sawi ang? Engtin nge a rawn chet ang? A incheina hi a 'comedian' nghal hrim hrim....mipui hian kan lo ngaihtuah ve nasa thin a nia. Chutah an fiamthu phenah hian fiamthu thar hi a chhuak zung zung bawk a. Chu fiamthu thar chu a hmang tangkai thiam thiamin an vanneih pui zui a. A ho thei ang ber hi nuihzatthlak a nih laiin ngaihtuah fe hnu-a nuih ti za chauh te pawh a awm bawk a. Dawnsan hmaa fiamthu an thawh ngam te hi an fakawm fuu ni!

Kumin bik sawi tawh ila. Inpuahchahna a awm thei lutuk lo na'chungin programme a kaltluang a. Inelte pawh an inpuahchah tha tih a chiang mai. Zing kara zai zir a ngai ve lo a, exer lak a ngai hek lo a, mahse an inelna hi a ril! Midang fiamthu hriat loh an sawi par par thei mai te hi keini tan chuan thil har tak a ni nghal phawt mai. Fiamthu thawh thiam zingah hian hmeichhia an tel ve. Hei hian a tikim hlein ka hria. Kumina ka hmuh thar (midang pawhin in hmu ve tho a), tha ka tih em em mai chu co-host hmeichhia, Mali hi a ni. A zan khatnaah kha chuan a zia a thup nge, a tawng tlem khawp mai a. A zan hnihnaah kha chuan a tawng ve bawrh bawrh a. A zan thumna ah phei kha chuan a rilru chakzia a pholang tan a. Tunah chuan kan chang ve ta thup mai le. Hnathawhna-a hmeichhia an tawng an tawng hi chuan a ninawm a. Women empowerment te hi kan mamawh lo hlein ka hre thin a. Mahse a huna an han tawng char char thung hi chuan min ti hlim fuu ni!

Judge an tha a. Chip neuh neuh peih tak mai, thatchhiat hmel deuh mai pakhat (Pastor fapa an ti!) phei hi chuan fiamthu a thiam chuan ka hre lo a, fiamthu a hria ka ti. Mafa-a hi chu kan sikul kal lai atang tawha kan bial laih laih kha a nia. Lamkhuang hnuaiah fiamthu a thawh thin tih lam ka sawi dawn lo a, "Chawlhna Tuikam" kha kumtling lova a ziah a ni tih zawk a ni. He pa hian a sap tawng thiam hmangthiam se chuan a thleng thui ngawt ang, an tih ka hre tawh. A hman hunah tak tunah a rawn hmang a, One-liner tih te hi a inhmeh bik riau! Sap fiamthu hming te kan hriat phah a! Pu Lianmawia hi chu mi kah a thiam ka ti! Nikum lama judge Pu Laltuvela kha MLA inthlan hnu hian a va reh ta ve?

Comedian search hian nun a tihlim a. Kan thalaite an zaithiam fai vek dawn ta emaw tih hnu-ah hetiang hun hi an rawn hmang leh a, a lawmawm! Rawlthar, kum 15 mi a tel te, Khamrang atanga fiamthu thawh tura 'nu' a lo kal vang vang te kha a chhuanawm! Mahni an rawn insawisa ngam te kha an fakawm! Kan ram hruaitute thukhawchang an sawi thei zung zung te khan min va tihlim tak em! Hetiang a nih te chuan thawmhnaw thar lei lovin 'masi' hlim takin kan hmang thei mai dawn alawm le!

Related Posts :