India U- 19 Team-a Tel Mizo Tlangvalte Chu

¢ Hmingsanga

Hman deuh kha chuan India aiawha khel thei Mizo hming hriat tur a awm ngai meuh lo a. India team-a tel chu sawi loh, national camp-a tel tur pawhin koh an ni ngai mang lo. Induhsakna hleihluak tak a awm nia sawi thin te pawh kha a dikna chen pawh a awm mai thei a. Tribal tlangval tan phei chuan a harsa hle thin a ni awm e. Thiam dan inangah rau rau pawh tribal tan hmun a awm lo thin.


Mizo tlangval India aiawha khel hmasa ber chu K Kawla a ni a, 1977 khan India aiawhin Kabul Football tournament-ah a khel. Hemi hnu hian K Kawla hian India aiawh bawkin kum 1978-ah khan Aga Khan Cup, Bangladesh-a khelhah India aiawhin a khel leh. Kum 1986-ah Zomuanthanga chuan Asian School Games 86, Brunei-a khelah ah India aiawha khelin jersey no 10 ha pha ngat tiin kan chhuang thin hle a nih kha.

India aiawha football khel thei kan nei zui ta meuh lo a. Kum 13 a vei hnuah kum 1999 khan S Malsawmtluanga leh Godon Zoramchhana te chu India aiawhin Singapore-a khelh Lions Cup-ah an tel ve leh a. Hemi tum hian India team hi champion an ni nghe nghe a nih kha. Hemi hnu hi chuan age group hrang hrangah India team-ah Mizo tlangval hming hmuh tur a awm chho ta zut a. AFC U -17 Football championship-ah Jerry Zirsanga leh Malsawma te phei chu Asian All Star-a thlan phak khawpin an khel tha a nih kha. Robert Lalthlamuana chu India U-17 team-ah captain ni phak a ni a. U-23-ah Zaidinmawia chu India captain a ni tawh a, Ramluaha te pawh a khel tha pawl niin India player pawimawh an ni phak tawh bawk. Anni lo pawh India aiawha khel thei kan nei ve ta nual mai.

Tunhnaiah India U-16 team-ah Lalnunmawia a tel ve leh a. Tuna India U-19 team-ah phei chuan Mizo tlangval Jeje Lalpekhlua, Lalrindika Ralte, Malsawmfela, F.Lalrozama, Malswmkima Chhangte te an tel. He'ng mite hi India team-ah an tel a ni satliah lo a, first XI-ah an khel phak vek. Tin, India captain chu Mizo a ni nghe nghe. India U -19 team-ah hian Mizote an pawimawh vet vet hle a ni. India ram aiawha khel thei nih a hlu a, he India U -19 team-ah hian first XI zingah paruk chauh chu hnam dang an nih chu!

AIFF chu AFC U-19 Football Championship final round khelh phak tumin theihtawpin a inbuatsaih a. Kum khat deuh thaw an inbuatsaih a, India rama rawlthar rual talent nei thate chu an inkhawrh chhuak tha viau. India chu qualifying round-ah Group C-ah awmin a thlengtu Irag, Saudi Arabia, Oman, Kuwait, Afghanistan te nen an awm tlang a. India hi vawi nga khelhah vawi hnih chakin vawi thum an chak lo a, point ruk hmuin an group ah palina an ni. Group khat atangin point hmu sang pahnih chiah final round khel thei tur an nih avangin India chu final round hi a khel phak dawn ta lo a ni.

India team te hian an khingpui te lamah goal 11 an thun a, India goal thun 11 zinga goal 10 hi Mizo tlangval thun zu han ni a!

Saudi Arabia nen an inkhelhin India chu 3-1-in an chak lo a, India-in goal khat a thun ve hi Ramhlun South tlangval Malsawmfela'n inkhelh tan atanga minute 23-a a thun a ni. Oman chu 4-3 in an hneh lo leh a, India-in goal thum a thun zinga goal hnih hi Lalrindika Ralte (15' &19') thun a ni thung.

Afghanistan nen an inkhelh tumin India chu 4-1-in a chak a. India goal thun zawng zawng hi Mizo tlangval pahnih Malsawmfela (48' &67') Jeje Lalpekhlua (62', pen & 84') te thun a ni. An match hnuhnung berah Kuwait nen inkhel lehin India hi 3-0-in a chak. He inkhel a goal lut zawng zawng hi Mizo tlangval thun bawk a ni, Jeje Lalpekhlua (5') Malsawmfela (45', 56') te thun a ni.

India team te hi final round khel phak lo mah se India team-ah Mizo tlangval panga ngawt an tel thei hi thil lawmawm leh chhinchhiah tlak tak a ni hrim hrim. Hei hian Mizo ten Indian football-ah dinhmun tha kan luah chho zel tih a ti chiang chho zel a. Senior team-ah India aiawha khel thei Jerry Zirsanga hnuah kan la nei leh lo nachungin tun atanga rei lo teah hian senior team-ah pawh Mizo hming hi a lang dawn tih a chiang zelah a ngaih theih. India U-19 team te hian SAF Games 2010 Dhaka, Bangaldesh a ni January 29 - February 8 chhunga neih turah India ai awh zui leh nghal ang.

India U-19 team-a khel Mizo tlangvalte chanchin hi tawi te tein i'n bih teh ang:

Hming : Jeje Lalpekhlua
Position : Striker
Jersey No : 10
Height : 172 cm
Weight : 78 Kg
Previous club : Dinthar FC, FC Kulikawn
Present Club : Pune FC
Fav. player(India) : Baichung Bhutia
Fav. player(In'tl) : Cristiano Ronaldo


India captain Jeje Lalpekhlua hi F Liankima leh Hnunpuii te fapa a ni a, Hnahthial Model Veng-a cheng an ni. Unau pathum niin tunah hian I-League club Pune FC-ah a khel. 2007 atang khan India team-ah hian a tel tawh. India footballer zingah Bhaichung Bhutia a ngaisang ber a, India ram pawnah chuan Cristiano.Ronaldo a ngaisang ber.

India striker zingah chuan hmabak nei eng ber pawl a ni phak. Pune FC a zawm hma hian Mizoram aiawhin Mizoram XI hmingin Sikkim-ah te , Mizoram U -19 team hmingin Noagong (Assam), Mizoram XI hmingin (Kailasahar), North East Sport Festival(Sikkim), Mizoram U-21(Guwahati), Santosh Trophy 2008 (J&K), Santosh Trophy 2009 (Tirchy) ah te a lo khel tawh. State pawna a kal hmain FC Kulikawn leh Dinthar FC-ah te a lo khel tawh bawk.

India aiawhin .(AFC U-19 2007& 2009) ah te a khel tawh. India tan vawi ruk khel tawhin goal thum a thun tawh. India ram pawnah Iran leh UAE ah te a kal tawh. Jeje hi SAFF Cup, kumin December thlaa tan tur-ah India in U -23 team a tirh turah a tel ang. Hemi hnu hian AFC Challenge Cup February 2010 leh 2010 Asian Games-ah te India aiawhin a kal dawn bawk a ni.

Hming : Malsawmfela
Position : Striker
Jersey No : 20
Height : 169 cm
Weight : 77 Kg
Previous club/ Academy : Mohun Bagan Football Academy
Present Club : Salgoacar
Fav. player(India) : Baichung Bhutia
Fav. player(In'tl) : Paul Scoles

Malsawmfela hi Power Department club lar vanglaia an winger tlan chak ni thin Vanlalliana fapa kha a ni. A nu chu Lalawmpuii niin, Zarkawt, Aizawl-ah an chhungkuain an cheng. India aiawh hian U-16 atangin kum 2007 khan a khel tawh. Kum 2007 khan Mohun Bagan Football Academy a zawm a, kum khat pawh a awm hmain India tan a khel. Academy lamah a kir tawh meuh lo. India tan vawi 29 khel tawhin goal 30 a thun tawh. India aiawha a khelh apiangin goal a thun ziah tihna a ni.

India ram pawnah Germany (Exposure trip), Saudi Arabia (AFC Qfy), US (Exposure Trip), England (Exposure Trip), Uzbekistan (AFC U -17 Championship), Bhutan(Exibitionmatch),Dubai (Exposure Trip),Iraq (AFC Qfy) ah te a kal tawh. Mizoram aiawhin U -13 (Kol), U-14 (Chandigarh) U-16(Chennai) U-21(Chennai) leh ONGC Cup (Tripura) ah te a feh chhuak tawh. Mizoram pawna a awm hmain Lungmual FC-ah a khel tawh thin.

Malsawmfela hian India aiawha a kal reng rengin goal a thun ziah a. Irag atanga a lo haw veleh I - League club Salgoacar-ah contrct ziak tur a beisei a ni.

Hming : R.Lalrindika
Position : Midfielder
Jersey No : 9
Height : 172 Cm
Weight : 72 Kg
Previous club/ Academy : IFA Football Academy
Present Club : Churchill Brothers
Fav. player(India) : Baichung Bhutia
Fav. player(In'tl) : Cristiano Ronaldo

R. Lalrindika hi India U-16 team-ah captain lo ni tawh thin a ni. Electric Veng, Lunglei-a mi niin, Rohmingthanga Ralte leh Lalmuanzuali te fapa a ni. Kum 8 vel a nih atangin football a khel tan a. Kum 2004 khan IFA Footbll Academy a zawm. Mizoram aiawhin vawi khat mah a la kal lo nachungin India aiawh chuan Germany (Exposure trip), Saudi Arabia (AFC Qfy), US (Exposure Trip), England (ExposureTrip), Uzbekistan (AFC U -17 Championship), Bhutan (Exibitionmatch), Dubai (Exposure Trip), Iraq (AFC Qfy) ah te a kal tawh. India tan vawi 32 khel tawhin goal 22 a thun tawh.

Didika hi India U -19-ah a chet that em avangin SAFF Cup, kumin December thlaa neih tura India-in U-23 team a tirh turah tel ang. Hemi hnu hian AFC Challenge Cup February 2010 leh 2010 Asian Games ah te India aiawhin a kal dawn bawk a ni.

Hming : F.Lalrozama
Position : Defender
Jersey No : 17
Height : 174 Cm
Weight : 63 Kg
Previous club/ Academy : Bawngkawn Chhim Veng FC
Present Club : Pune FC
Fav. player (India) : S. Malsawmtluanga
Fav. Player (In'tl) : David Beckham

India tana vawi 10 khel tawh F. Lalrozama hi F.Rumliana leh Lalpuii, Bawngkawn-a mite fa panga zinga mi a ni. Kum 2007 khan India team-ah a tel tan. Tunah hian Pune FC ah a khel mek. Kum 2000 vel atangin tih tak zetin football a khel a, Mizoram aiawhin U-16 (2006) Chenai, Santosh Trophy (2008) ah te a khel tawh. Rozama hi Mohun Bagan Football Academy-a a awm laiin South East Asia aiawhin Mohun Bagan hmingin Manchester United Premier Cup 2006-ah England-ah a kal tawh.

Tun tumah hian India U -19 team-a an defender rinrawl ber a ni. Tuna a khelhna club Pune FC tan II Division League atanga I - League I Division-a an kai theihna tur atana goal thuntu pawimawh tak a ni.

Hming : Malsawmkima Chhangte
Position : Midfielder
Jersey No : 17
Height : 179 Cm
Weight : 66 Kg
Previous club/ Academy : TFA
Present Club : East Bengal
Fav. player(India) : Baichung Bhutia
Fav. Player (In'tl) : Michael Carrick

Mizo footballer tha zinga pa lian pawl, Chhangte tlangval, Malsawmkima hi C Zairemthanga leh Darhmingliani (Ramhlun Sport Complex) te fapa a ni. Subroto Cup (U-14) atanga bul tanin, U-16 National Football championship-ah Mizoram tan vawi hnih a khel leh.

2005-ah TFA a zawm a. Hemi chhungin Jharkhand hmingin U-19 ah a khel pha. India aiawhin AFC U -19 Championship, Tehran, Iran-ah a khel a, India U-19 team German tour-ah a tel. England leh Wales ah India aiawhin a khel tawh bawk. Heading leh shooting skill nei tha tak Sawmkima hian season tharah East Bengal-ah kum hnih atan contract a ziak tawh a. India U-19 team-a player rinrawl ber te zinga mi a ni.

Related Posts :