Rock With Mr. Big

¢ Zohmingmawia

Mizo hmelhriat Mr. Big
Kum 1990 chhova Mizo nula leh tlangval inti vengva chin deuh zingah 'To Be With You' leh 'Wild World' sakpui thei lo fa kha kan tlem viau ta ve ang. A hla thu dik chiah lo tal pawhin...!!


Hemi hmalama rock music tuipuia lo inleng kual fe tawh mi hahnem tak awm tawh mah ila, kum 1980 chho kha Mizo mipui nawlpuiin rock music kan sukpui tlut tlut theih hun inanna a ni a, 90's chanve vel thleng kha chu khawvel hmun dangte ang bawkin a li thuk ber thlenga lut ve ni ah kan inngai thei ang.

Chutih hunlai chuan band lar tak tak an chhuak uk uk a, kan lo hre ve zel bawk a, chu'ng zingah chuan Mr. Big pawh an tel ve.

Mizoram leh Mr. BIG
Kum 1990 bul lam atangin cable TV-in Mizoram a rawn luhchilh ve a, MTV chuan Mizo halaite a run nasa hle a, hetih hun hi Mr. Big hla hit 'To Be With You' rawn lar lai a ni a, he music video hi Mr. Big kan hmelhriat anna pawh a ni. MTV bakah hian radio herh peih deuh ten US leh ramdang radio station atangin 'To Be With You' hla hi Mizoram atang ngeiin an lo ngaithla tawh. Hemi hnu hian 'Just Take My Heart', 'Wild World, 'Nothing But Love', 'Goin' where the wind blows' tih te pawh a music video hmuh tur a awm ta zel bawk.

Mi Lian beidawng lo
Mr. Big hi a tir atangin a 'lian' nghal hluai lova, beidawnna erawh an tem hman lo. Kum 1988 a ni a, Van Halen vocalist lar David Lee Roth a maltlat laiin band a din a, chuta a bassist chu Billy Sheehan a ni. He bassist hian David hi chhuahsanin band thar a din a, vocalist Eric Martin, guitarist Paul Gilbert leh drummer Pat Torpey te chu a sangawizawnpui tura a lungawina te chu an ni.

Band lar leh hlawhtling Journey, Europe leh Santana te lo kaihruai tawh Herbie Herbert chu manager atan hmangin Atlantic Records nen an inrem hnuah, kum 1989 khan 'Mr. Big' tih hmingin album an tlangzarh a, an chawrchhuahna US-ah mi hriat hlawh tehchhiam lo mahse, Japan-ah chuan he album hi a lar nghal phian a, kum 1990 khan hetihlaia band lar ve tak Rush chu an tour-ah an zui ve nghe nghe a ni.

Khawvel hriata Big!
Kum 1991 a rawn herchhuak a, Mr. Big album pahnihna 'Lean Into It' chuan khawvel a dengchhuak chiang hle a, 'To Be With You' hla ringawt pawh an larpui tawk a tling! Ram 15 zetah music chart no.1 nihna a hauh pha a, "Just Take My Heart" leh "Green-Tinted Sixties Mind" tih te chu mite tuipui hla a tling phak bawk. US leh United Kingdom-ah tour an nei chho nghal zut a, Aerosmith, Brian Adams leh Scorpions te an lo zui kual ve hrep tawh a ni.

Kum 1993-ah an studio album pathumna 'Bump Ahead' ti chhuakin Cat Stevens-a'n a lo larpui tawh 'Wild World' chu an rawn thar thawh ve leh a, he hla pawh hi music chart-ah top 10 an luhpui thei a ni. He album-a hla zingah hla lungkuai zet zet 'Promise Her the Moon' leh 'Nothing But Love' tih te pawhin mite hriat a hlawh hle.

Kum 1995 khan an album palina 'Hey Man' an tichhuak a, hetihlai hi US leh khawvelin a music tuipui zawng a thlak chhoh lai a ni a, rock music-ah pawh hard leh soft rock lamin dinhmun hniam a chan chhoh tak avangin he album hian hriat a hlawh lutuk tawh lo.

An album hmasa lamte angin US-ah lar hluai tawh lo mahse, Japan leh South East Asia hmun dangah te chuan an chefuh hle reng a, live album pawh an siam phah nual a ni.

Thenna ram
Thukhat vuaa che chhuak ho dial dialte pawh pawmdan leh ngaihdan a hran fo chuan awmho reng a har ani'ang. Kum 1997 khan guitarist Paul Gilbert chuan an band hi a chhuahsan a, Poison guitarist hlui Ritchie Kotzen chuan a ai rawn awhin, a ni ho hian studio album pahnih - Get Over It (2000) leh Actual Size (2001) an tichhuak a, Japan leh ram henkhatah chuan an chefuh zui hle.

An tunhma hun tawn ang an tawng phak tawh lo bawk nen, band chhungah neuh neuh a awm reng a, kum 2002 chuan Mr. Big chu a kehdarh ta nge nge a ni.

Then hnute intawk khawm
Mahni seh seh mual tiin an darh hak a, Eric Martin pawh a band-te nen nikum mai khan Shillong-ah an rawn zai a nih kha. May 13, 2008 daih tawh khan Los Angeles-a hmun pakhat House Of Blues-a Paul Gilbert show neihnaah Pat Torpey, Richie Kotzen leh Billy Sheehan te chuan an pui ve a, hetah hian Mr. Big original line up member-te chu an lung a leng thar hle ni ngei tur a ni, hemi hnu reilote ah Eric Martin chu an bepawp zui nghal a...

Kum 2009 February 1 khan Japan radio pakhat kaltlangin an inzawmkhawm leh thu hi an puang a, June khan Japan-ah tour an nei zui nghal. Khawvel ram hrang hrangah tour hi nei chhunzawm zelin October 21 a rawn thlen meuh chuan India ram hmun thenkhat te ang bawkin a
tira dintute kimna Mr. Big chu a hring a hranin kan buzawl-ah kan hmu ve thei dawn ta.

Mr.Big-ah mi bik
An hla hriat bak, an mimal chanchin hre thui kan tam lo thei. Rimawi tuipui tak tak te erawh zawngin tunge Billy Sheehan leh Paul Gilbert tih hi hrilh nawn fo an ngai tawh lo. "Mr. Big tih ringawt kha chuan ka beng a verh tehchiam lova, Billy Sheehan leh Paul Gilbert an rawn kal dawn chuan he concert hi en loh phal chi a ni lo," tiin band hriat hlawh tak te pawh lo din ve tawh, tuna zirtirtu hna thawk mek pakhat chuan a sawi.

Mr. Big dintu Billy Sheehan hi rimawi khawvelah daihriat ngah tawh tak a ni a, rimawi lama a lo inchiahpui tawh hming hraw tak tak te sawi vek kher lo mah ila, a lead bass khawih thawm hria leh hmu tawh Guitar Player Magazine chhiartute chuan um 5 ngawt 'Best Rock Bass Player' ah an lo thlang tawh tih zawng pawh hian a nihna chu a tilang rek ruak thei turah ngai ang.

Paul Gilbert hi guitar khawih lamah chuan a ngaisanglo tu tan pawh hriat miah lo thu a awm lo tih tur khawpa sulhnu hnutchhiah kawi hnem tawh a ni a, Guitar Institute of Technology, Los Angeles chhulchhuak Paul hi a band din Racer X leh a solo album te pawhin hriat an hlawh ve hle a, miten amah an hriat reng fona tur te chu a kutthlak mawi leh rang tak lanna 'Frenzy', 'Scarified', 'B.R.O.' leh 'Scit Scat Wah' te hi a ni ngei ang.

Mr. Big line up
Vocal:
Birth name: Eric Lee Martin
Born: October 10, 1960
Origin: Long Island, New York
Associated acts: Mr. Big, Tak Matsumoto Group, Slaughter, Scrap Metal, Dr. Sin

Guitar:
Birth name: Paul Brandon Gilbert
Born: November 6, 1966
Origin: Carbondale, Illinois
Associated acts Mr. Big, Racer X. 2007-a G3 tour-ah Joe Satriani leh John Petrucci te a pui tawh bawk.

Bass
Birth name: William 'Billy' Sheehan
Born: March 19, 1953
Origin: Buffalo, New York
Associated acts: David Lee Roth, Mr. Big, Talas, Steve Vai, G3, Niacin

Drums:
Birth name: Pat Torpey
Born: December 13, 1959
Origin: Cleveland, Ohio
Associated acts: Mr. Big, David Lee Roth Band, Pobert Plant, The Knack, The Exile Social Club

Related Posts :