Japan-ho zawng chi khat - Macaca fuscata an tih hi Koshima thliarkarah kum 30 zet scientist te'n an enkawl a, chu'ng zawngho hnen atang chuan an tum loh deuh thil an zirchhuak tlat mai.
1952 a ni a, scientist-te chuan luikamah hian alu an dah a, zawng-ho chuan an lo duh ngang mai. An chhar a, an keih nghal mawlh mawlh thin. Mahse, luikam tiauvut-a mi tih takah a bal deuh ta thin a, an tuai fai phawt thin.
Vawi khat chu, zawngnu pakhat, thla 18-a upa Imo tia an koh hian tih dan thar a hmuchhuak a, luiah chuan alu chu a silfai ta hauh hauh mai. A nu hnenah chuan a sawi a, kar lovah zawng dang pawh chuan alu silfaina chang an hre ve ta vek mai a ni.
Chuta tang chuan chu thliarkara zawng reng reng mai chuan alu chu ei hmain luiah an silfai ta thin a, mahse, a nu thenkhat, alu silfai ve duh lo tlem a zawng erawh an awm. A note lam erawhin ei hmain an silfai thin. Chu chu 1952 leh 1958 inkara thil thleng a ni a, scientist-te chuan chutianga zawngin alu silfaina chang an inzirtir lai chu an lo thlir reng thin.
Vawi khat chu, 1958 thal lai khan lui kamah hian zawng rual hian alu an silfai suau suau mai a, scientist-te chuan an lo thlir kar hlawm.
Hemi tuma zawng rual hi a zat chiah hriat a ni lo a, mahse, 99 angin i'n chhut chhin teh ang. Khua a lo thim a, an kal darh a, a tuk khawvarah chuan alu chhar turin luikam lam chu an rawn pan leh ta nuk nuk mai.
Chumi tukah chuan a hma tlaia tel ve lo, zawng pakhat hi a rawn tel ve a, chu zawng chuan a rawn sil ve ta hauh hauh mai. Zawng 100-na a nih chu!
Mak tak a ni, tlaiah chuan chu thliarkara cheng hnam mawlte chuan alu silna chang an hre ve ta!
Zingkara alu sil ve pakhat zawng 100-na khan a tihhmuh zu nia! A hma lawkin zawng dang 99-in alu an sil a, mahse, hnam mawlho tihhmuhtu chu a 100-na a ni! Pawimawh lo hi kan lo awm hlei nem.
Chu thliarkara zawng awm zawng zawng chuan alu silfaina chang an hre tawh ang. Chu mai a ni lo, chu hmasawnna chuan tuipui a zuankhum a, Takasakiyama thliarkar leh an chheh vel hmun danga cheng zawng dangte pawhin alu silna chang an hre ve ta!
("Lifetide" tih lehkhabu, Lyall Watson-a ziaka mi 'Hundredth Monkey' tih lehlin a ni.)
No comments:
Post a Comment