Monday, June 15, 2009

Mizoram Football Hmabak

¢ Hmingsanga

Mizoten infiamna kan ngainat ber chu football a ni a, he game hi Mizo mipa tawh phawt chuan a kawng bo lo tawk chuan kan khel theuh hial ang. |henkhat chuan sikul kawta inkhelh kha kan duhtawk viau a. A then chuan veng khat aiawh emaw khaw khat 'A' team emaw thleng phak te pawh an awm a. Chumi khami tlangdungah chuan a thiam ber ang an tih pawl te pawh an awm bawk. He game hi mumal taka kan khelh ve chu kum 50 pawh a la tling awm lo e.

Chutih lai chuan thenawm state leh India ram laipui lamah chuan football tournament lian leh a hun laia pui tak chu khelh a lo ni ve tawh thin a. India rama Football ngaihsanna leh uarna state-ah te phei chuan an state football association din kum te chu sang khat za riat tih emaw vel te a lo ni daih tawh nghe nghe. Pawnchhe tum tel leh sertawk ball kan pet laih laih lai khan ball mumal tak an lo pet tawh a ni.

Kum 1954-a Aijal Sports Association din a nih khan football chu hmalakna hmasaah an hmang a. Mizoram buai hma khan Chhota Lal Seth Football Shield leh Pachhunga Memorial Football Trophy te chu football tournament lian tham kan neih chu a ni. Mizoram a buai a, ramin mu leh mal a nei lo a; Mipui pawh chuti tho chu. Ram a ralmuan deuh hnuah Mizoram chu India sawrkar hnuaiah Union Territory dinhmunah hlan kai a ni a. Lei rem kan rap ve tan tihah kum 1973 khan Aijal Sports Association chu Mizoram Sports Association tiin a hming thlak a ni a. He pawl hnuaiah hian football pawh a hranga dingin Mizoram Football Association pawhin an din tan kumah an pawm nghal a ni. Din a nih tantirh lamah chuan hruaitu tur pawh a ruata inruat niin a lang. Kum thum chhung hian Football ngaihsanna a pung chho a, kum 1976 atang khan mumal taka inthlanna buatsaih a ni a, Football Association mumal tak kan nei tan a, MFA President hmasa ber pawh tuna Mizoram Chief Minister ni mek Pu Lal Thanhawla hi a ni.

Kum 1987-ah MFA chu AIFF affiliated member a lo ni ta a. AIFF hnuaia inziahluh hnu hian MFA chu India ram hmun hrang hrang football inelnaah a feh chhuak ve thei tan ta a, a vawikhatna atan India rama football inelna sang ber, Santosh Trophy-ah 1987 khan team kan tir ve ta hial a ni. Kum 1989 khan India ram pum huap National Junior Football Championship-ah Mizoram team chuan semi final kan thleng a, India ramah kan hming an hre nghal a. India ram pawnah kum 1991 khan Thimphu khawpuia Bhutan King Jigme Dorji Wangchuk Gold Cup Football-ah Mizoram Police an champion a, hei hi India ram pawna Mizoram team champion hmasak ber a ni.

Mizoram football chanchin sawi dawn ila, chanchin tha sawi tur kan ngah. Kum 2008-09 khan U-16-ah champion kan ni a, U-21-ah final kan thleng a, Santosh Trophy-ah pre quarter final kan thleng thei bawk. Mizoram Football Association hian hmathlir thui tak nei chunga ram chhung footballer-te a tuai hriam thei a nih ngat chuan kan hmaah hian 'eng' a awm a ni.

Tunhnaiah SSA chuan school naupang kum 14 hnuai lam te tan Mizoram hmun hrang hrangah training centre a hawng a. Hei hian Mizo naupang te tlakchham basic training kan neih loh thin kha thui tak chu a phuru ve ta niin a lang. MFA lam pawhin age group tournament hrang hrang a siam thin te hian Footballer chherna kawngah thui takin awmzia a nei a ni.

Sports & Youth Services department-in tunhnaia Football Academy a din te hian beiseina sang zawk nei thei turin beiseina min siam sak mek a ni. Tunah hian Sports Minister ruahmannain khawpui chhung hmun hrang hranga naupang ten training an nei pawh hi a hlawkna kan tel thuai a beiseiawm. Tun atanga kum ngaah hian Mizoram hian Indian Football-ah state pawimawh kan ni ngei ngei dawn niin a lang. Chutih lai erawh chuan finkhurna tur erawh kan nei. India ram hmun dangah pawh Football tih hmasawnna turin theihtawpin hma an la ve thin a. A ziakah fel leh tha viauin lang mahse a taka hmuh theih 'hnathawh' erawh a tam ngai lo. Hemi laka atang hian Mizoram hi a 'him' theihna turin tanrual a tul hle.

Mizo Footballer pakhat chuan Stadium tha kan duh a, kan sawi reng a, kan mamawh pawh a ni reng a, chutih rual chuan khelmual kan neih ang chhun chhunah hian theihtawpin mumal zawk leh a kawng kal zawka training kan neih theih phawt chuan India ramah chuan a chungnung ber pawl kan nih theih ka ring tlat a ni a ti. Basic training hi Mizo ten kan tlakchham lian ber niin ka hria.

Mizo naupang hi talent nei tak an ni a, mahse heng kan talent neih te hi chher hriam leh tuai hnum a nih thin loh vangin naupang chherna 'pûm' hi Zoram mamawh chhanna hmasa ber a ni ngei ang le.

MFA hruaitu pakhat chuan "MFA, Sports Department leh SSA te hi tang tlang ila, tun atanga kum ngaah chuan India ram state tinah Mizo footballer an awm kat nuk dawn a ni" a ti.

India ram hmun hrang hranga Football Academy tha deuhah chuan Mizo naupang awm lohna hmun a awm lo tih theih a ni a. Heng mite hi an puitlin hun a ngahhlelhawm tak zet tawh a ni. Mumal taka kan kal chho zel a nih chuan engtikah emaw chuan vai ram club lian hote hi Mizo footballer lei tumin Mizoramah sum leh pai tam tak nen an la la rawn thlawk lut sup sup dawn a ni. Hetiang hun hi a hla tawh lo. Tun hnaiah ringawt pawh Mizo footballer duh hian thenawm state te chuan Mizoram lam hi an rawn hawi deuh thup tawh a ni.

Mizoram Football Association Hony. Secretary chuan "Tunah chuan Mizoram hian Invitation tournament lian tham deuh a neih a ngai a. Kan thenawm state Sikkim-a khelh thin Chief Minister Gold Cup te, Guwahati-a khelh thin Bordoloi Trophy ang te hi an state sawrkarin budget-ah kum tin a dah thei a, heng tournament lian tham kum tina heng state-ah te khelh a nih avangin an tualchhung football chu nasa takin a chawk nung a ni. Keini pawhin hetiang Invitation tournament lian tham hi neih ve a chakawm a, MFA ngawt chuan an sum neihin a daih si lo a; sawrkar nen a tang tlanga Invitation tournament lian tham pakhat kum tina khelh tur Mizoramah hian awm ve thei se" a ti.

Tualchhung Football a nun loh chuan state pawnah a chet that theih loh, chuvang chuan hetianga tualchhung football tinung tur hian nang leh kei hian mawh kan phur ve a ni.

Related Posts :



No comments:

Post a Comment