Sunday, June 7, 2009

Ka ngaihdan ka zuar e

¢ Rosy K Remsangpuii

I T leh ang u
Tam tak chuan kan hawrawp hlu em em mai 'T' hi kan lam tha duh mang lo a, a pawi ka ti! 'T' hi khawvel pum huap pawha hawrawp vang, hnam dang te'n a an neih ve loh (?) a ni a. Kei phei chuan 'T' hi tawng dang hmangho hawrawpah ka la hmu miah lo! Chuti khawpa hawrawp dangdai leh vang tak a nih vang te hian i rohin, i hlut thiam zawk ang u. Thlauhthlaa thing ti ngawt lo hian. Hawrawp min siamsak tute pawh kha an zahawm alawm le..

Mi thenkhat chuan intih changkannaah ngaiin tawngtai pawh ti tha duh lovin, 'tchawngtchai' an ti thin a, 'tchawngtchai' a ni lo. Chhiar a awlsam e tih vanga hnualsuat ngawt chi lah a ni hek lo. Khawvel huapa Actor lar- Arnold pawh kha kei phei chuan Arnold sachekzuara ka ti te a nih ngawt loh chuan a hming ka lam thiam teuh lo! Midang, hnamdangte tan lam a awlsam zawk nan tiin a thlak danglam phah lo! Keia lam thiam dan tur ang paw'n a thlak hek lo. A hming tidangdaituah a tang ta hlauh zawk a, a hlu em em a ni.

Hnam hming ziah tunlai:
Lehkhathiam tak takte hming tawpa Colney tih te, Poonte tih te ka hmuh chang hian ka ngaihtuahna a vak thui thin, kan pi leh pu te khan hetiang hian em ni hnam hming hi an lo phuah reng tiin. Keini thangtharte hian kan lo ziak tunlai ringawt hi a dik dawn em ni? Kan hnam nunphung leh hming te, kan nihphungte, leh culture te hi keini hian ngaisangin kan roh dawn lo'm ni?

Colney chu Kawlni ni leh thei se, Poonte pawh Punte, chutiang zelin hnam dang pawh.. Hei hi a haw zawnga la mai lovin, thahnemngaihna au aw-a kan ngaih theih ka beisei hle.

Mizo chawhmeh ngat le
Vai ram leh sap ram atanga mikhual kan thlen changte hian, Cheraw leh Mizo folk song mai kan lantir bakah hian, Mizo chawhmeh - he'ng- bai, sawhbawl leh kan chawhmeh dangte hmang hian zanriah lo buatsaih sak tawh ila a va thain, an va hlut dawn em! An rama an eiin ang bawk kha lo chhawp kan tum thin a, hei hi a fuh ber dawn em ni aw ka ti thin.. Cheraw leh folk song chauh hi mizo culture a ni lo a, kan chawhmeh te hi a tuihnai thei ang bera siamin lo eitir ila, chuta an puar lo a nih chuan vawi khat na reng reng chu duh leh einawn leh mai rawh se. An lo ngaina phian thei asin! Kan entawn mek korean ho pawh khi an local food-'Kimchi' an chawilar thiam em em a, ramdang mite pawhin an hlutsak a, Kimchi chuan Korean ho a ti Korean em em a ni. Khawvel changkang zel hian hnam mawl zawk te a luhchhuakin an local food te a tem chakin, a hre chak a ni. Vawi khat na na na chu ei ve rawh se.

Di in/Dap in i sa leh ang u
Tourists Lodge te hi Zopa in sakin sa tel bawk ila, ram dang mi khualzin kan hip zawk lo'ng maw? Mizopa in; a chung di, a bang dap ni se.

Zopa tapchhakah sap pachal hi lo thleng se, felfai leh thianghlim leh him taka enkawl ni se, ngawi renga kan hnamzia kan pholanna remchang tak a ni bawk ang a, a tha vel vek dawn a ni. Television-ah te kan hmu a, hnam fing zawk apiangin an hnamzia an hlutin an chawilar thiam a, midangte culture pawh an zahsakin an hlutsak thiam a, an hmu duh em em ang.

Chawhmeh i in suah uar leh ang u
Changkanna leh hmasawnnain min nuai a, mitin te kan buai em em tawh a, a that viau laiin, mahni thenawm chu sawi loh; inchung leh inhnuaite takngial pawh kan in hre tawh lo a ni. Thenawm khawveng chawhmeh insuah te hi a Mizo a, thil tha tak a ni.

Kan inhmangaihna leh kan inngainatna a tipung a, khawsakho a tinuam a, thil harsa leh man to a ni lo. Rs. 5/10 senga kan inhmangaihna leh inthenawmna a tih that chuan thil tha tak a ni. Kan tlem em hi, i inhmangaih ang u.

Fa neih tam
Mi a hrisel that a, a chawm zo dawn a nih phawt chuan fa neih tam hi tuna kan Mizote dinhmunah hi chuan a tha. Thing delh loh, lung delh loh na na na chu Pathian zarah an dam em em ang. A upa zawk te'n thangtharte tan hmun an ken zelna khawvelah hian kan khatin kan tawt lo ang. Tumah chatuana dam an awm ngai lo e! Chimral tham lek tak tak kan la ni a, kan eitur leh ram zawng kan nghei lo ang, Pathian zarah.. Hnam tlem an dingchang khat khawp a nia, kan tam chuan kan lo chak sauh ang.

Mizo nu thlai hnah a hrisel
Vairam thlai lian pui pui ai chuan Mizo nuin a a chin thlai te hi te tak te te, kawi ngil ngel ni mah se a hrisel zawk a, a hmel enin a tlawm na a, a hrisel zawk, lei i uar zawk ang u! Vai thlai lian pui pui, a hmel ena itawm tak tak te hi eng ang takin nge an sawngbawla, eng damdawi hmanga lian pui pui a enkawl nge an nih tih pawh kan hre si lo a.

Kum sawi naupan hi
Pian kum sawi naupan hi thil tha chu a nih hmel loh.. Mihringa min dinchhuaktu Pathian leh kan nu leh pa te leh kan pian ni leh kum te an zahawm! Hei hi i sim ang u. A kristian lo.

911
Sapho khu kan entawn duh a nih rau rau chuan chhungkua an inhmangaihna an inhrilh tawn thin te, rikrum thila naupang takngial pawhina 911 phone nachang an hria te khu i entawn ve ang u. Tin, pawikhawihna hnuhma te lo khawih ngawt loin, police te be pawp vatin, an kutah i dah thin ang u. Tichuan hnuchhuinaah nasa takin police te kan pui thei dawn a ni. Heng number te hi naupangte tan pawh hriat a har lo. Hetiang lam hi i inzirtir uar ang u. Kan hriat tur phone number pawimawh zualte- Police Station- 100, Fire Dept.- 101, Hospital- 102.

Related Posts :



No comments:

Post a Comment