Hman lai hian lal pakhat hi a awm a, chu lal chu thil han tih chhin vel chak tlat mi a ni.
Vawi khat chu, chu lal chuan an khaw luhna kawngpuia lung han dah chhin hi a chak tlat mai a, kawng laiah ngat mai hian lung lian zet mai a hung ta ruau mai.
Mi hrang hrang an lo kal ang a, chutia kawng laiah tak mai lung a inhung ruau mai chu mite chuan engtin nge an tih teh reng lal chuan a hre chak a ni.
Nakinah chuan mihausa thenkhat an lo kal a, tin, khawnbawl upa leh pa zahawm pui puite pawh an awm. Lungpui chu an hel a, engtin mah an ti lo, an kal tlang mai.
An zinga thenkhat chu an ang a, chutia kawng dala lung a awm chung pawha lalin hma a la miah lo chu an thin a rim hle. An ang bawrh bawrh reng a ni.
Mi dang pawh an lo kal a, lungpui chu an hel mai.
Nakinah chuan loneitu pakhat a lo kal a, em khat thura thlai phur tih takah a hah hle. A rawn 'huiha' dup dup mai.
Lungpui a hmuh chuan a ding dat a, kawngsirah a phur chu nghatin, lung chu nam sawn a tum ta a ni.
Loneitu chu a hah em em mai, mahse, lungpui nam sawn tum chuan theihtawp a chhuah a, khur ngar ngar khawpa tangin lungpui chu a nem ta ngat ngat mai.
Chutia theihpatawp a chhuah hnuah chuan lungpui chu kawngthlangah a nawr liam thei ta.
A'n chawl deuh vang vang a, chutah a phur chu lain kal a tum ta a ni.
A'n kal dawn a, kawngah chuan ip pakhat a hmu ta tlat mai. Lungpui khan a lo delh a, a lo hmu lo mai mai a ni.
Ip chu chharin a'n hawng a, a chhungah chuan tangka leh rangkachak a lo awm ruih mai! Lal khan lungpui nawr sawntu lawmman atan ip kha a lo dah alawm mawle.
Loneitu chu a hlawk ta ngang mai; a hlawkna chu ip chhunga tangka leh rangkachakte ni lovin, harsatna chungchangah zawk a ni. Harsatna hian a harsatna tawktute dinhmun siamthatna tur a pai thin a ni tih loneitupa chuan a hrechhuak ta! n
('Obstacle' tih lehlin a ni. A ziaktu hriat a ni lo.)
No comments:
Post a Comment