Mizoram Football Association-in kangmei tuarte tanpuina tur sum tuak nan charity match an buatsaih a, Lammualah mipui an pungkhawm a nih kha. Chu hunah chuan zaithiamte an zai a, he tleirawl pawh hi a zai. Mipuiin an lawmzia kha!
Lammual khat tlat pungkhawmte chu he tleirawl vang hian an phur a, zai tura a rawn chhuah lai leh a zai zawhah te chuan kut an beng hluah hluah mai. Mizoram zaithiam chhuanvawrte'n anmahni ngaisangtute hnen atanga an dawn thin chu a dawng ve chiang hle. Tunlai chu Zoram rimawi khawvelah Ropuii a ropui tlat.
Ropuii music video pahnih - 'Ka hrai duhlaite' tih leh 'Len ka zuam lo' tih chu demand channel lamah a 'hit' hle a, he'ng hla pahnih hian a satu hi milar-ah a chhuah ta a ni ber. Amaherawhchu, album pakhat em pawh a la nei lo a, a dinhmun tur a la chiang lo thung.
He nau hi Lunglei nula, Theiriat-a mi a ni a, Gospel hla aia lengzem leh love song thlangtu, chuti lama kal ta chu a ni. Rimawi khawvelah dinhmun siam tumin a bei mek a, Aizawlah a album hmasa ber tur a buaipui mek.
A album-ah hian hla 12 dah a tum a, a hla hit pahnih - 'Ka hrai duhlaite' tih leh 'Len ka zuam lo' tih pawh hi a tel ang.
He album-ah hian hla hlui - 'Tleitirah Tleitiri' tih pawh a tel dawn a, hranghlui lunghlui a kaitho mai thei. A hla dangte pawh hlaphuahtu hriat hlawh tak takte phuah a ni hlawm. May thla chhunga peihfel a tum a ni.
A album-a a hlate zingah 'Len ka zuam lo' tih chu a duh ber a, "A thu a tha a, a thluk a nalh ka ti bawk. He hla hi chu a 'Zo' a, ka duh tlat," a ti.
A naupan lai atangin Ropuii hi a zai thin a, sikul-ah te, Kohhran lamah te a zai ve al al thin. A lo nula tan a, zai chu thuk zawka luhchilh a tum ta a ni.
"Zai hi eizawnna tlak a nih leh nih loh ka hre chiah lo a, mahse, ka theih ang anga zai lama inhman hi chu ka tum," a ti.
"Lengzem lam hi sum leh paiah pawh a hlawk zawk ka ring a, bakah sualah ka ngai lo hrim hrim," tiin lengzem lama a kal chhan a sawi.
Lalropuii Pachuau hi nikum lamah khan Lungleiah Youth Idol thlannaah a tel a, pahnihna a ni. Chuta tang chuan Lunglei velah chuan hriat a hlawh hle a, zai tura sawmna pawh a dawng awl lo.
Nikum September-ah khan 'Len ka zuam lo' tih music video a siam a, kumin February-ah 'Ka hrai duhlaite' tih video a siam leh bawk. A video pahnihte chu a lar ta hle a, kar lovah mi hriat a hlawh ta a ni.
"Hetiang em ema a lar hi chu ka beisei pha lo, ka beisei phak bakin mi hian an lo duh a, ka lawm tak tak a ni," Ropuii chuan a ti.
A music video an siam lai hian camera hmaa han inlan vel chu a zak ve thin a, a lai ve thei hle. Chutiang te a ngaihtuah chuan, hetia miin an lo duh ta viau mai hi a lawm a, mak te pawh a ti thin.
"Mi hriat ka lo hlawh ve chu a ni ta mai a, heti teh thut hi chu mak ka ti khawp mai. A zah te pawh ka zak ve thin," tiin a dinhmun thar chu a sawi.
"Ka kalna velah te hian mi hian min lo hre ve thin a, a lawmawm ka tih rualin ka zak thin bawk. A la rei lo bawk a, ngaiah ka la neih thei lo," a ti bawk.
Phone call a dawng fo a, sms a dawng chamchi bawk. |halaite zingah na na na chuan a lar hle a, zaithiam tharlam zinga beiseiawm berte zingah music buaipuitute chuan an ngai a ni.
Ropuii hian khawvelah Mother Terresa a ngaisang ber a, "A nun hrim hrim hi ka ngaisang a, a inpekna hian min hneh khawp mai," a ti.
Mizo zingah chuan Lalsangzuali Sailo a ngaisang a, a zaithiamna leh a hlaphuahthiamna chu a ngaihsanna a ni.
Shania Twain leh Celine Dion zai ngaithla nasatu Ropuii hian Vanlalsailova zai pawh a ngaithla thin a, mahse, love song a sak laia a zai kha a ngaithla thin.
No comments:
Post a Comment