¢ K Lalrochana, Lunglei
He nu khawngaihthlak tak hi tunge a nih hria an tlem. Mahse hla pakhat avangin tunlai Mizo nu zinga nu lar ber pawl a tling mai thei.
Lalropuii Pachuau-in 'Ka Hrai Duhlaite' tih a sak hi tunlai Mizo hla zingah chuan demand channel lamah pawh thlan hlawh ber pawl a tling a, a hla thu hi a lungrun a, nu pakhat inpuanna hian patling ngaihtuahna meuh pawh a tithui thei hle a nih hi.
He hla hi Lunglei lam hlaphuah thiam C Lalzarmawia phuah a ni.
Nu khawngaihthlak tak mai pakhat chu Zarmawia hnenah hian kalin, a chanchin zawng zawng zep nei miah lovin a hrilh vek a, a chanchin a sawi lai hian a mittuite pawh a tla hial ta ve ang. He nu inpuanna atang hian 'Ka Hrai Duhlaite' tih hla hi a lo piang ta a ni.
An inngaihzawn lai chuan induh ve tak an ni ngei tih a hla thu atang hian a hriat theih a, he nu hian a pasal hi neih loh pawh a hlau hle ta ve ang. 'Ka lunglawmnan leh duhaisamin, nuthai ka chang ve a' a tih tlat dan atang hian a pasal hi a duhin, a hmangaih tak zet tih a hriat a, a hmangaih em em a nei thei hi mut hmuna a lo suangtuah thin, a duhthusam a ni tih a hriat theih a ni.
Fate an nei a, an chhungkua pawh an hlim tak zet. Hmangaihna avanga lo piang, hmangaih taka enkawl chu nu tan a nuam ang a, an fate tluka hmuhnawm a awm kher lo ang. Mahse, 'mahse' tih a ngai, hlim taka chhungkua an awm laiin pa berin zu ngawl a vei ta tlat! A nupui leh a fate aiin zu a buaipui ta zawk a, haw loh chang te pawh a nei zeuh zeuh ang a, a haw chang pawhin nupui fanaute thlamuantu ni lovin, rikraptu a ni fo ang.
A pasal berin a nupui leh a fate aia zu a buaipui zawk tak tlat avangin nu ber chu khawhar takin a awm a, engmah hrethiam lo a fate karah hmeithai ang maiin khawhar takin a mu a, a muhil thei lo a, a khawharna chuan thlemnaah a hruai lut ta a ni.
Pathian leh Kohhran hmaa a thutiam zawng zawng te bawhchhiain, a khawhar hnemtu a zawng a, a pasal a phatsan a. Duh taka a neih a pasal leh a fate a kalsan a tul ta.
Mahse, a khawhar hnemtu tura a ngaih pawh chuan a hnem zo lo a, a hmangaih em em a fate bak a rilruah midang an awm thei lo.
A fate laka a hmangaihna lantir turin an inkarah 'tlazep' a awm tawh a, hmangaih em em mah se a hmangaihna a lantir thei tawh lo.
Miin a fate chu 'fahrah'tiin an hmusit dawn nite hian a hria a, a ngaingam lo. A zan mu te pawh a harh zawk zawk ta ve ang. Mahse, a fate pawh leh turin an inkar a zau lutuk tawh si.
A fate ngai reng rengin a hun a hmang a, a tan chhun a rei a, zan a tawi chuang lo.
A chang chuan a fate'n an theihnghilh dawn ni te hian a hria a, a fate lakah a inthiam thei lo a, a hmangaihzia te chu hrereng se a ti thin. A thiam loh a ni tih a hria a, 'Thai tling lo chun hmangaihna hi nghilh lul lo ang che u' a ti vawng vawng a, a chauh tawngkhawng changa muthilh ve chang pawhin a mumangah a fate bak midang a hmu ngai lo.
Khua a var a, a mumangte chu engmah lo mai a ni leh si, khawhar reng rengin a hun a hmang a, a fate a ngaih a bang thei lo. A mitthlaah pawh a fate bak a hmu ngai lo, a fate kuaha a hmangaihna lantir a chak, mahse a thei si lo.
He nu tawpna hi a ngaihnawm ngawt mai, rilru hah ngawih ngawiha a awm laiin Pathian lam a hawi a, 'Misualte hmangaihtu chuan a sualna te a ngaidam a', thinlung thlamuanna a pe a.
Nia, mihring ngaituahna atang chuan 'uire' a ni. Mahse uire te pawh hmangaihtu chuan a banah a kai a, 'kal la, tisual leh tawh suh' a ti.
A sualnate ngaidamtu hnenah a tlulut a, a fate tan a dilsak zawk thin.
He hla ka ngaihthlak apiang hian nu hmangaihna ropuizia ka hre thin a, eng dinhmunah pawh ding ila, nu hmangaihna chuan min kalsan ngai lo. A aia ropui zawk - Pathian hmangaihna chiang takin he hlaah hian kan hmu a, misual berte pawh hmangaihtu a nihzia kan hmu a, a hnena tlulutte chu a ensan ngai lo a, hmangaih takin a enkawl thin a ni.
A satu Lalropuii hian a sa thiam tak zet a, 'a phuahtu rilru a tawmpui em ni aw' tih mai turin a sa lungrun thiam a ni.
No comments:
Post a Comment