Rul hlauhawm chu tunge ngam thei ang? Mi chak tan a ni chuang lo... Mi huaisente tan zawk a ni!
Rul naran hmaah patling an tlanchhe fo a, anni erawh rual ft 9 chuanga sei hmaah pawh an tlanchhe lo. Chu rul chu Mizorama awm ngai lo nia sawi - King Cobra a ni. An hual a, an that ta ruau mai a nih kha!
April ni 29 a ni a, Mission Vengthlanga R Rothangpuia te inah chuan an fanu, tleirawl Mimi-i'n in a nghak a, rul lian chiin an in a pan dawn tih reng an hre lo.
Chawhma lam dar 10 velah chuan kawmchara an zawng khawi chu thawk leh khatah a te ta teng tung mai. A te dan chu mak a tih deuh avangin Mimi chuan a va pan a, rul lian zet mai a hmu ta mai!
Chu rul chu an inhnuaiah a lo tlenglut mek a, Mimi chuan a mei lam a hmu hman. A hlau lutuk a, thenawmte punin a tlankual ta a ni.
An thenawmte chu an rawn tlankhawm a, inhnuai an han thlithlai chuan an thing chhekkhawm karah a tawm tih an hre thei ta a ni. A hnuah sazu kuaah a lut ta thung. Sawhthing leh purun var an rawt a, a kuaah chuan an theh ta a ni.
Rul chu a rawn chhuak duh lo. Tuiso te an han leih thin, a rawn chhuak duh chuang lo. An tihngaihna hre lo chuan chumi te in chhuat chu thiatin, tanhmun an siamrem a, rul chu beih tak takin an bei ta a ni.
Midang an rawn thlen belh ve zel a, mi 10 rualin chu rul kua chu an hual ta. A rawn chhuah theih nana theihtawp an chhuah hnuah rul chu a rawn dak ta hru mai. Chuveleh an a lu-ah chuan thirtiang leh an hmanraw ken lai chuan an lo bei ta a, a lu a sawp ta.
A lu a sawp chuan a thi tih a chiang a, rul pawh chu an lachhuak thei ta a ni. Hetia an thah hun hi chhun dar 12 rik hma deuh a ni.
Chu rul chu ft 9.10 zeta sei a ni a, a vang lam pawh inches 5 leh a chanve vel a ni.
Mission Vengthlang VCP B Lalhriattira'n forest deptt. lam a hriattir a, mi thenkhatin Mizoram University-a forestry deptt lam an lo hrilh ve bawk. Mithiamte chuan an han en a, King Cobra a ni tih chu an thutlukna a ni. He rul hi a pa a ni tih an sawi bawk.
Rul dang lu chu sangha lu ang deuha zum a nih laiin he rul lu hi chu a bial a, pangparh a nei tuar bawk. A rawng pawh vutbuak rawng (grey) a ni a, hetiang rul hi Mizoramah a awm an hriat ngai loh thu pa thenkhat chuan an sawi.
"Mithiamte khan King Cobra zia leh nihphung reng reng kha he rulah hian an hmu vek," tiin VCP chuan a sawi.
Pa thenkhat chuan: "Mizoin rulngan kan tih hi King Cobra hi niin a lang," tiin an sawi a, amaherawhchu, Mission Vengthlanga rul an thah hi vutbuak rawng a ni a, hetiang rawng hi Mizoramah a awm an hriat ngai loh thu an sawi thung.
King Cobra hi Southeast Asia leh India ram hmun thenkhata awm a ni a, ramngawa cheng a ni.
Rul chanchin zirmite chuan 'Ophiophagus' tiin an sawi thin a, chu chu 'rul eitu' (snake-eater) tihna a ni. King Cobra hian chaw atan rul a ei thin a, saphai te pawh a ei thin. King Cobra vek pawh a ei thin.
A tur hi a hlauhawm hle a, a vawi khat chuk hlekah mihring an thi thei.
London Zoo-a king cobra an khawi thin chu ft 18.8-a sei a ni a, chu chu king cobra sei bera sawi a ni. He rul hi Indopui Pahnihna chhuah tirhah khan a enkawltute'n an khawngaih vangin an tihlum a ni.
Ramngawa cheng chi a ni a, lui kamah te, ramhnuai pikah te a cheng thin. Khawvelah ramngaw a chereu zel avangin king cobra hi a tlem sawt hle.
No comments:
Post a Comment