¢ PL Liandinga
Chawlhkar engemawti atanga veng hrang hrang leh thenawm hnaia zan lam hun awla cheraw khawng ri leh darmang a inchhawn tlauh tlauh tawh kha chuan Chapchar Kut lo thlen hunah chuan Aizawl Sipai Lammualah milian leh mi lal an ther leh fuk ang a, zaithiam te an zai leh vut vut ang a. Zofate Jerusalem, Aizawl veng hrang hrang atangin nula tuai no leh tlangval tlawntlai tha tak tak an tleh khawm leh dul dul ang a, tlai lamah chuan Lammual chu an chil khu leh rum rum ang tih kha eng zawl mah kawl lo pawhin a hriat mai.
Hetiang hun hi tlem engemaw lai kha chuan rual u thenkhat chuan an hmu pha ve lova, hetianga kan pi leh pu te tihdan dungthul a han chai leh han lam te hian kan chhandamna chabi ah sa kha bo dawn tlata hriatna lianpui avangin Chapchar Kut hman te kha kan hnam tan boralna turah ngaih a ni a. Zu Khapna Burna dan uapna hnuaiah kum 2009 Chapchar Kut chu Aizawl khawpui laili lai takah hman a ni a. Zu khap tha titu zawng zawng (Sawrkar aiawh Minister, Kohhran rawngbawltu khati zozai, zu khap thlawptu YMA leh Upa Pawl member lawk pui pui) leh thuneitute hmuh lai ngei khan Mizoram khawvela hmun ualau lai ber, sipai lammualah a khap duhtuho a sirah an thu tlar ang thep thawp a, mual laiah kan tlangvalte an han rui thle ngawih ngawih a. Kiang lawkah tang motor dum lianpuiin a nghak reng tih hre chunga khang thil kha thleng a ni a. Mahse kan changkang ve tawh a, kan chhandamna chu a bo dawn ta chuang lo a ni ang chu vawiin thlengin kohhran lam atangin khatianga khawsa kohhran member te umzuina thu leh hla engmah a la chhuak lo. Hun leh ni lo inher zel hian kan nun hi luipui lian zawk (zu khap bur sawt lohzia hriatna luipui) lam panin min hruai zel a. Engtikah emaw chuan chu luipuiah chuan Lalzuithang nu te nen kan la inbual tlang nge nge dawn awm mang e tih ngaihtuahna tel lo thalai kha zozai kha anmahni thuin 1970 bawr chhova nula tlangvalte tih ngam reng reng loh, thangchhuah diar tial leh vakiria, ngotekherh leh kawrchei nen Mizo an nihna puang chhuak leh tur te, mahni hnam tihdan ngeia hlimhlawp bawl tur tein an rawn her chhuak a nih kha.
Mahse keini thianzaho, engmah ni lawi mang si lova mi thlen bak hret han rah leh zauh duh thin te chuan Mamuana Y2Goal dawrah te; Silver Moon thingpui dawrah te; Hnam Chhantu Headquarters, Electric Vengah te; LV Art Dawr kulhbingah te leh RD Print Tech chhuatpui rem mam lai atang tein chhumbung zet zetin rawtna kan theh chhuak pherh pherh a. Phur vanglai taka deusawhna tawngkam dengkhawng leh tawngkam tlahawlh pui pui paltlangin chu rawtna chu chawrche zetin a dam khawchhuak a. 'Sialsuk Awmhar Champion Party leh Thiangzau unau dang remchangte nen Chapchar Kutah chuan Kungliani khiang awihsan hnu Sialsuk khawpui, Laltanpuia lenna khua ngeiah vawk pa te eiho ang,' tih chu chhumbung zeta relthlukin a awm ta rup a. Krismas dawna khawvel ringtu tam takin Jerusalem an hawi thin angin kan rilru chu Chapchar Kut tak tak awmna lam, a bawl phawnna leh chhepchher, Khuallian leh Miss leh VIP te awm lohna hmun lam hawiin a thle kawi chhar a. Mahse chu thu tlukna phuailuai zet phenah chuan Justin-a te pawhin an ngaihtuah chhuah mai theih si loh khawpa thu ril chu pawnlang zetah a inphum lang kuk a. Thiam tuma zir, hotute kaihhruaina hnuaia lawmman leh chawimawina hlawh tuma nalh taka thalai rual phe siau siau kal kanin Sialsuk lam pan zai kan rel ta. Tlai dar 5:00-ah Aizawl chhuahsan a, Aibawk khaw hmawra Achawii Hotelah zanriah ei phei tur. Pawisain a daih loh reng rengin Pu Rotluanga sumin a tuar zel ang. Chuti chauh chuan a ni, chheihlam tak tak kan va hmuh ang a, chuti ngei chuan a ni, tirh luihna tel lova vahui hmawr zar zawha lam phar de de te chu kan va pawh theih dawn tiin kan ngaihtuah ve a. A ngaihtuahtute kan sual em mai pawha kan ngaihtuahna ziding tak chu thianghlim ve zet a ni!
Thil tha leh thil tak tak reng reng chu harsa taka kherh chhuah a ni fo thin. Han tih dawn tak tak meuh chuan a hmaa phur awm zeta lang Dina te chu dam reng siin a hman lo ta thut a. A dawr chhunga thutna awm chhunah a nupui a thu meng kiauva, ani kaitenah sawm kal theih mai hmel pu, sawm kal tak tak theih si lohvin a ding sawi bai a. Zion fapa, duhthlanna peng thuama ding, kal ngaihna hre lova ding te hi ka chan rum rum a!
Harsatna sawi miah lo Sangzuala ten bungraw thiar an tum thar thut a (an thiar leh lem hlei law). A tihdan fo thin angin dam thlap, hnial harsa zetin a rawn pha fel auh mai a. Hnam Chhantu lah a hman lo leh thut a! E khai! Kan va tlem ta ngai em! Kal dawn ruaiah Mary Winchester-in chhuanlam dawrawm zet a rawn keuh chawrh bawk a.
Khaw duai ni pawha chhum kara ni a lo lang ve fo angin thei lem lo tura kan ngaih Chuauhnuna, TKA te nupa leh HC Vanlalruata te bakah V.L.Ringa Sailo an lo tel ve nawlh a. Englova pawh a lo tel ve teh mauhva!
Tumdan awmsa bawhpelh phei zela khawsa a, Achawii Hotel kan thlen a, an khar tawh hnu an hawn leh tak dan te, a hmalama riltam thu sawi lo pawha Tlanzova te leh Dara te chaw ei theihzia te ang mai mai thunawi chu kan ziak lovang. Remruata over phei zauh zauh dan pawh ziah a tul lo. Motor thenkhata chuangten Khap Burna dan an bawhchhiat phei nual thu pawh ziah a tul lo. Chung zawng zawng ai chuan tunhmaa kal hrehawm em em thin, Aibawk thlen thlenga kawng a lo nawm tak em emzia leh hun kan hman tlem tak zawkzia te, Sialsuk thlen huna tlar thum zai, Dara Pa chhuat zawl, zau lo angreng taka kan sawr tluk tluk huna thlarau nawr chhuah ngei maia tu emaw a rawn phar chhuak heh heh mai tur te chu mitthlaah a lo lang a. Vanram tlafual veng mawng lam deuh chu va chang ve mai tura inngaiin a uih zawn ang vut vutin kan chuanna motor theuh chuan kawng kawiah min buk liampui ta lauh lauh hlawm a. Nia, Halleluia Chorus te leh Beramno te ang hi chu phur thut thila tuipui chi a ni lem lova. A neitu lam, Sapho leh German-ho pawh hian an kutni vangthlaah pawh chuti lawkin an sa mai lovang. Chuvangin keini pawh kan lunglenna tuahpui leh vau a lo vul a, chapchar awllen ni a lo her chhuah a, nipui thereng hmahruai a hram tak hlerh hlerhah chuan keimahni pual, tlar thum zai ngeia lunglen hnem turin Siamtu khian min lo duang a.
Thian zaho inrawt khawm thuchhuak a nih tehlul vei nen min lo hmuaktu lam chuan ZONET bawlin min han bawl phawt a. Remruata thlalakna bak engmah kan keng tawp si lo. Zanah Sialsuk IB, hmanlai, kum 100 vel zet kal tawha Kumpinu kut chhuak, vawiin thlenga la dingah kan invawm lut a. Kumpinu meuh zawng a lo ropui narawh e. Kum za vel kaltaah khan he Bangla hi an mikhualna ramah an rawn sa a, a hnu kum za thlenga rochun tlakin an hnutchhiah a. Chu chauh ni lovin kum 1966 Mizoram buai lai khan a chhungah India sipai an tawm tlat a, kan MNF unaute chuan duhtawkin a bul phul atangin an han kap thin a, mahse a bangah lung hlir an lo hman avangin tihngaihna awm hek lo, an luh chhuak zo ta lova. Sipaiho thinrim chuan Sialsuk khawpui, Mizorama khaw changkang hmasa ber pawl chu an hal darh ta vek a. Sialsuk khaw kan lai chuan ruahpui vanawn a lo thawk zui a. Chenna tur In neih loh nen, ruahpui sur nen, an chan chu a chhe ta em em a. Chutiang dinhmun chuan Sialsuk khaw kan hla pahnih a kai chhuak a. Mawi leh lungrun em emin Laltanpuian a phuah a, lungkuai em emin Siampuii Sailo khan a sa a nih kha. Chung thil zawng zawng chu kan thian, Tlanzova te leh Mamuana te chuan an hre pha lo — khatih lai khan la piang miau hek lo le! Chu Banglaa kan han thleng a, duhtawka zan mut hma leh zing thawh hlima titi kan han vawrh ta chu tun thleng hian lei chhawnah pawh min dil se ka phal kher lovang.
A tuk khua a lo var a, fatuhovin rawng an bawl vut vut a. Zawitein Dara Pa inah chuan Chapchar Kut hmang tur an lo pungkhawm thliah thliah a. Inhmelhriattirna an tih ang te pawh kan han nei ve thlap a. A va thleng pheia te ai mahin a lo la thleng ve hman lo, kal tura kan beisei te chu uluk takin kan han hmelhriattir a — an hre chuang lem hlei lova.
Aw Sialkhawpui ka pianna hmun ka seilenna tlang lii liai,
Turnipui lenkawl eng ruai hnuaiah ka hawi vel a.
Nia, kan hawi vel a, chhaklamah Hmuifang tlang leh midum kham a to luah a, chhim lam khawchung tlang a thiang vawl vawl a. Chutiang karah chuan a ni, Laltanpuia chuan -
Zaleng an tam ka cho rual si loh sumtualah,
Chantawk hmel di ka vai lung reng a awi thei lo — a tih tak thlep thlep ni.
Lunglen cho chhuak tawk lekin kaihlek hla leh lengzem hla kan han vawrh a. Kan tingtang te mawlh mai kha aw, a va original tak em! Pathlawi kum 70 val vel turin an han inherh chhawk laih laih a! Kha tingtang herh dik lai en tur ringawt pawh khan min ko se ka kal leh duh mai awm e!
Vawiin chuan Lalpa mi ngaidam rawh,
Bawngva lo leng Lalngo ka awm rih dawn e! (Chheih!)
Duh leh mual lianpui chu tul rawh se!
kan ti ta hep hep mai a. Lamtualah kum 80 val an han dir ei ei a, chu zet chuan lunglen a kaitho ngang a niang, a kil thlanglama ka pi, kum 80 chuang tawh lamtualah a rawn tir chhuak a. Nu valai leh pa valai insul zung zung karah chuan an su her tak tlen tlen a!
Kan boruakin a vanglai a tawng ta mai emaw kan tih lai takin a thuthmun atangin Samlukhai tlangval kha chhuatah a thingthi dawn emaw tih khawpa hniamin a'n awp ang tei tawi a, chuta tanga lam thai chunga a'n rawn phar kual ta kha chu kan senso leh kan hahna zawng zawng te chuan a man zo tawh lo. He Mizo lam ropui, lamdan tur bithliah engmah awm lo, hla tlar thum lek sak chhunga bul tan a, inla lawn a, a vawrtawp thleng a, zuih ral leh tur si, muang em em, phurawm em ema lam dan hi thiam ve dawn ila engzah tak sengso ngam ang i maw! Mahniin kim thlapin a lam theih a, thiante nen a lam theih a, nula nen a lam theih bawk a. He lam hi a ropui avangin nasa taka fak ka duh a, mahse a mawl em avangin ka fak thiam si lova.
Choka chhuat zawla vanram tlafual vengmawng kan chen mup mup laiin inpui lamah aw lakna leh note bu nen inti Journalist satliah ni mai lo, nitina thuziak hmanga eizawng, H.C.Vanlalruata leh Remruata Renthlei ten Thiangzau thurin leh kalphung an lo chai ve mek a. Tualah ruai bel a so hlurh hlurh a, khawimaw laiah a thenin nikum YMA kum puan an lo bawhchhe mek a! A tawp khar nana kan tawngtai te nen vek khan chawhrualin CHAPCHAR KUT 2009 chu hlim takin kan hmang ve ta. Zanriah eikhamah a nawlpuia lam kan thai chiah khan Mamuana te leh Chuauhnuna te insum theih lohzia a lo lang tlai khaw hnu a. Dara te sutpui helin kan khur ta cher cher hlawm a. A hahdam deuh awmchhun pawh thlanin min bual zawih zawih takah chuan tute lehkhathawn ziak ang maiin emaw tawk lo chunga tawktir a ngai ta a.
Kum leh sul te a lo vei leh ang a, remchanna te'n min daih a, kan dam khua te a sei a nih ngai chuan Chapchar Kut hmanna tur duh thlang theiin han awm leh tehreng ila aw! A hmunah bawk hman leh a chakawm mang e.
Engtikah emaw chuan he hnam hian chheihlam tur a la tlachham mai thei a. Engtikah emaw chuan tlar thum zai sa tur a la nei lo mai thei. Chuti lo pawhin engtikah emaw chuan chheihlam hi a ropuina angin kan la thlir thiam ang a, hnam dang lam aia a mawi bikna te, a ropuina te kan la hai chhuakin kan nulate chu vai nula changkang, Bharat Natyam lam thiam an mawi zual angin an la mawi ve ang a. Kan IAS val te pawhin Chheihlam an thiam tel chuan an ropui lehzual tih an la hre thiam ve ang. Chumi hun thlenga kan dam ve ta hlauh a nih ngai chuan Sialsuk Chapchar Kut kha tuan thuah kan la hril ngei ang.
Chawlhkar engemawti atanga veng hrang hrang leh thenawm hnaia zan lam hun awla cheraw khawng ri leh darmang a inchhawn tlauh tlauh tawh kha chuan Chapchar Kut lo thlen hunah chuan Aizawl Sipai Lammualah milian leh mi lal an ther leh fuk ang a, zaithiam te an zai leh vut vut ang a. Zofate Jerusalem, Aizawl veng hrang hrang atangin nula tuai no leh tlangval tlawntlai tha tak tak an tleh khawm leh dul dul ang a, tlai lamah chuan Lammual chu an chil khu leh rum rum ang tih kha eng zawl mah kawl lo pawhin a hriat mai.
Hetiang hun hi tlem engemaw lai kha chuan rual u thenkhat chuan an hmu pha ve lova, hetianga kan pi leh pu te tihdan dungthul a han chai leh han lam te hian kan chhandamna chabi ah sa kha bo dawn tlata hriatna lianpui avangin Chapchar Kut hman te kha kan hnam tan boralna turah ngaih a ni a. Zu Khapna Burna dan uapna hnuaiah kum 2009 Chapchar Kut chu Aizawl khawpui laili lai takah hman a ni a. Zu khap tha titu zawng zawng (Sawrkar aiawh Minister, Kohhran rawngbawltu khati zozai, zu khap thlawptu YMA leh Upa Pawl member lawk pui pui) leh thuneitute hmuh lai ngei khan Mizoram khawvela hmun ualau lai ber, sipai lammualah a khap duhtuho a sirah an thu tlar ang thep thawp a, mual laiah kan tlangvalte an han rui thle ngawih ngawih a. Kiang lawkah tang motor dum lianpuiin a nghak reng tih hre chunga khang thil kha thleng a ni a. Mahse kan changkang ve tawh a, kan chhandamna chu a bo dawn ta chuang lo a ni ang chu vawiin thlengin kohhran lam atangin khatianga khawsa kohhran member te umzuina thu leh hla engmah a la chhuak lo. Hun leh ni lo inher zel hian kan nun hi luipui lian zawk (zu khap bur sawt lohzia hriatna luipui) lam panin min hruai zel a. Engtikah emaw chuan chu luipuiah chuan Lalzuithang nu te nen kan la inbual tlang nge nge dawn awm mang e tih ngaihtuahna tel lo thalai kha zozai kha anmahni thuin 1970 bawr chhova nula tlangvalte tih ngam reng reng loh, thangchhuah diar tial leh vakiria, ngotekherh leh kawrchei nen Mizo an nihna puang chhuak leh tur te, mahni hnam tihdan ngeia hlimhlawp bawl tur tein an rawn her chhuak a nih kha.
Mahse keini thianzaho, engmah ni lawi mang si lova mi thlen bak hret han rah leh zauh duh thin te chuan Mamuana Y2Goal dawrah te; Silver Moon thingpui dawrah te; Hnam Chhantu Headquarters, Electric Vengah te; LV Art Dawr kulhbingah te leh RD Print Tech chhuatpui rem mam lai atang tein chhumbung zet zetin rawtna kan theh chhuak pherh pherh a. Phur vanglai taka deusawhna tawngkam dengkhawng leh tawngkam tlahawlh pui pui paltlangin chu rawtna chu chawrche zetin a dam khawchhuak a. 'Sialsuk Awmhar Champion Party leh Thiangzau unau dang remchangte nen Chapchar Kutah chuan Kungliani khiang awihsan hnu Sialsuk khawpui, Laltanpuia lenna khua ngeiah vawk pa te eiho ang,' tih chu chhumbung zeta relthlukin a awm ta rup a. Krismas dawna khawvel ringtu tam takin Jerusalem an hawi thin angin kan rilru chu Chapchar Kut tak tak awmna lam, a bawl phawnna leh chhepchher, Khuallian leh Miss leh VIP te awm lohna hmun lam hawiin a thle kawi chhar a. Mahse chu thu tlukna phuailuai zet phenah chuan Justin-a te pawhin an ngaihtuah chhuah mai theih si loh khawpa thu ril chu pawnlang zetah a inphum lang kuk a. Thiam tuma zir, hotute kaihhruaina hnuaia lawmman leh chawimawina hlawh tuma nalh taka thalai rual phe siau siau kal kanin Sialsuk lam pan zai kan rel ta. Tlai dar 5:00-ah Aizawl chhuahsan a, Aibawk khaw hmawra Achawii Hotelah zanriah ei phei tur. Pawisain a daih loh reng rengin Pu Rotluanga sumin a tuar zel ang. Chuti chauh chuan a ni, chheihlam tak tak kan va hmuh ang a, chuti ngei chuan a ni, tirh luihna tel lova vahui hmawr zar zawha lam phar de de te chu kan va pawh theih dawn tiin kan ngaihtuah ve a. A ngaihtuahtute kan sual em mai pawha kan ngaihtuahna ziding tak chu thianghlim ve zet a ni!
Thil tha leh thil tak tak reng reng chu harsa taka kherh chhuah a ni fo thin. Han tih dawn tak tak meuh chuan a hmaa phur awm zeta lang Dina te chu dam reng siin a hman lo ta thut a. A dawr chhunga thutna awm chhunah a nupui a thu meng kiauva, ani kaitenah sawm kal theih mai hmel pu, sawm kal tak tak theih si lohvin a ding sawi bai a. Zion fapa, duhthlanna peng thuama ding, kal ngaihna hre lova ding te hi ka chan rum rum a!
Harsatna sawi miah lo Sangzuala ten bungraw thiar an tum thar thut a (an thiar leh lem hlei law). A tihdan fo thin angin dam thlap, hnial harsa zetin a rawn pha fel auh mai a. Hnam Chhantu lah a hman lo leh thut a! E khai! Kan va tlem ta ngai em! Kal dawn ruaiah Mary Winchester-in chhuanlam dawrawm zet a rawn keuh chawrh bawk a.
Khaw duai ni pawha chhum kara ni a lo lang ve fo angin thei lem lo tura kan ngaih Chuauhnuna, TKA te nupa leh HC Vanlalruata te bakah V.L.Ringa Sailo an lo tel ve nawlh a. Englova pawh a lo tel ve teh mauhva!
Tumdan awmsa bawhpelh phei zela khawsa a, Achawii Hotel kan thlen a, an khar tawh hnu an hawn leh tak dan te, a hmalama riltam thu sawi lo pawha Tlanzova te leh Dara te chaw ei theihzia te ang mai mai thunawi chu kan ziak lovang. Remruata over phei zauh zauh dan pawh ziah a tul lo. Motor thenkhata chuangten Khap Burna dan an bawhchhiat phei nual thu pawh ziah a tul lo. Chung zawng zawng ai chuan tunhmaa kal hrehawm em em thin, Aibawk thlen thlenga kawng a lo nawm tak em emzia leh hun kan hman tlem tak zawkzia te, Sialsuk thlen huna tlar thum zai, Dara Pa chhuat zawl, zau lo angreng taka kan sawr tluk tluk huna thlarau nawr chhuah ngei maia tu emaw a rawn phar chhuak heh heh mai tur te chu mitthlaah a lo lang a. Vanram tlafual veng mawng lam deuh chu va chang ve mai tura inngaiin a uih zawn ang vut vutin kan chuanna motor theuh chuan kawng kawiah min buk liampui ta lauh lauh hlawm a. Nia, Halleluia Chorus te leh Beramno te ang hi chu phur thut thila tuipui chi a ni lem lova. A neitu lam, Sapho leh German-ho pawh hian an kutni vangthlaah pawh chuti lawkin an sa mai lovang. Chuvangin keini pawh kan lunglenna tuahpui leh vau a lo vul a, chapchar awllen ni a lo her chhuah a, nipui thereng hmahruai a hram tak hlerh hlerhah chuan keimahni pual, tlar thum zai ngeia lunglen hnem turin Siamtu khian min lo duang a.
Thian zaho inrawt khawm thuchhuak a nih tehlul vei nen min lo hmuaktu lam chuan ZONET bawlin min han bawl phawt a. Remruata thlalakna bak engmah kan keng tawp si lo. Zanah Sialsuk IB, hmanlai, kum 100 vel zet kal tawha Kumpinu kut chhuak, vawiin thlenga la dingah kan invawm lut a. Kumpinu meuh zawng a lo ropui narawh e. Kum za vel kaltaah khan he Bangla hi an mikhualna ramah an rawn sa a, a hnu kum za thlenga rochun tlakin an hnutchhiah a. Chu chauh ni lovin kum 1966 Mizoram buai lai khan a chhungah India sipai an tawm tlat a, kan MNF unaute chuan duhtawkin a bul phul atangin an han kap thin a, mahse a bangah lung hlir an lo hman avangin tihngaihna awm hek lo, an luh chhuak zo ta lova. Sipaiho thinrim chuan Sialsuk khawpui, Mizorama khaw changkang hmasa ber pawl chu an hal darh ta vek a. Sialsuk khaw kan lai chuan ruahpui vanawn a lo thawk zui a. Chenna tur In neih loh nen, ruahpui sur nen, an chan chu a chhe ta em em a. Chutiang dinhmun chuan Sialsuk khaw kan hla pahnih a kai chhuak a. Mawi leh lungrun em emin Laltanpuian a phuah a, lungkuai em emin Siampuii Sailo khan a sa a nih kha. Chung thil zawng zawng chu kan thian, Tlanzova te leh Mamuana te chuan an hre pha lo — khatih lai khan la piang miau hek lo le! Chu Banglaa kan han thleng a, duhtawka zan mut hma leh zing thawh hlima titi kan han vawrh ta chu tun thleng hian lei chhawnah pawh min dil se ka phal kher lovang.
A tuk khua a lo var a, fatuhovin rawng an bawl vut vut a. Zawitein Dara Pa inah chuan Chapchar Kut hmang tur an lo pungkhawm thliah thliah a. Inhmelhriattirna an tih ang te pawh kan han nei ve thlap a. A va thleng pheia te ai mahin a lo la thleng ve hman lo, kal tura kan beisei te chu uluk takin kan han hmelhriattir a — an hre chuang lem hlei lova.
Aw Sialkhawpui ka pianna hmun ka seilenna tlang lii liai,
Turnipui lenkawl eng ruai hnuaiah ka hawi vel a.
Nia, kan hawi vel a, chhaklamah Hmuifang tlang leh midum kham a to luah a, chhim lam khawchung tlang a thiang vawl vawl a. Chutiang karah chuan a ni, Laltanpuia chuan -
Zaleng an tam ka cho rual si loh sumtualah,
Chantawk hmel di ka vai lung reng a awi thei lo — a tih tak thlep thlep ni.
Lunglen cho chhuak tawk lekin kaihlek hla leh lengzem hla kan han vawrh a. Kan tingtang te mawlh mai kha aw, a va original tak em! Pathlawi kum 70 val vel turin an han inherh chhawk laih laih a! Kha tingtang herh dik lai en tur ringawt pawh khan min ko se ka kal leh duh mai awm e!
Vawiin chuan Lalpa mi ngaidam rawh,
Bawngva lo leng Lalngo ka awm rih dawn e! (Chheih!)
Duh leh mual lianpui chu tul rawh se!
kan ti ta hep hep mai a. Lamtualah kum 80 val an han dir ei ei a, chu zet chuan lunglen a kaitho ngang a niang, a kil thlanglama ka pi, kum 80 chuang tawh lamtualah a rawn tir chhuak a. Nu valai leh pa valai insul zung zung karah chuan an su her tak tlen tlen a!
Kan boruakin a vanglai a tawng ta mai emaw kan tih lai takin a thuthmun atangin Samlukhai tlangval kha chhuatah a thingthi dawn emaw tih khawpa hniamin a'n awp ang tei tawi a, chuta tanga lam thai chunga a'n rawn phar kual ta kha chu kan senso leh kan hahna zawng zawng te chuan a man zo tawh lo. He Mizo lam ropui, lamdan tur bithliah engmah awm lo, hla tlar thum lek sak chhunga bul tan a, inla lawn a, a vawrtawp thleng a, zuih ral leh tur si, muang em em, phurawm em ema lam dan hi thiam ve dawn ila engzah tak sengso ngam ang i maw! Mahniin kim thlapin a lam theih a, thiante nen a lam theih a, nula nen a lam theih bawk a. He lam hi a ropui avangin nasa taka fak ka duh a, mahse a mawl em avangin ka fak thiam si lova.
Choka chhuat zawla vanram tlafual vengmawng kan chen mup mup laiin inpui lamah aw lakna leh note bu nen inti Journalist satliah ni mai lo, nitina thuziak hmanga eizawng, H.C.Vanlalruata leh Remruata Renthlei ten Thiangzau thurin leh kalphung an lo chai ve mek a. Tualah ruai bel a so hlurh hlurh a, khawimaw laiah a thenin nikum YMA kum puan an lo bawhchhe mek a! A tawp khar nana kan tawngtai te nen vek khan chawhrualin CHAPCHAR KUT 2009 chu hlim takin kan hmang ve ta. Zanriah eikhamah a nawlpuia lam kan thai chiah khan Mamuana te leh Chuauhnuna te insum theih lohzia a lo lang tlai khaw hnu a. Dara te sutpui helin kan khur ta cher cher hlawm a. A hahdam deuh awmchhun pawh thlanin min bual zawih zawih takah chuan tute lehkhathawn ziak ang maiin emaw tawk lo chunga tawktir a ngai ta a.
Kum leh sul te a lo vei leh ang a, remchanna te'n min daih a, kan dam khua te a sei a nih ngai chuan Chapchar Kut hmanna tur duh thlang theiin han awm leh tehreng ila aw! A hmunah bawk hman leh a chakawm mang e.
Engtikah emaw chuan he hnam hian chheihlam tur a la tlachham mai thei a. Engtikah emaw chuan tlar thum zai sa tur a la nei lo mai thei. Chuti lo pawhin engtikah emaw chuan chheihlam hi a ropuina angin kan la thlir thiam ang a, hnam dang lam aia a mawi bikna te, a ropuina te kan la hai chhuakin kan nulate chu vai nula changkang, Bharat Natyam lam thiam an mawi zual angin an la mawi ve ang a. Kan IAS val te pawhin Chheihlam an thiam tel chuan an ropui lehzual tih an la hre thiam ve ang. Chumi hun thlenga kan dam ve ta hlauh a nih ngai chuan Sialsuk Chapchar Kut kha tuan thuah kan la hril ngei ang.
No comments:
Post a Comment