Thursday, March 19, 2009

'Khuanu ruat di' tawngtu MS-i?

Nikum kum chawhma lam atang khan 'Khuanu ruat loh di' tih hla chu Zoramin a hmelhriat a, tun hnaia hla lar ber pakhat a tling. A satu MS-i pawh mi tam takin an hriatna a ni ta nghe nghe.


Mizoram hmun hrang hrangah zaiin a zinkual a, a thlen chin apiangah 'Khuanu ruat loh di' hla chu mite beisei ber a lo ni deuh zel. Mizoram pawna Mizote pawhin he hla hi an tuipui a, phone hmanga MS-i an biak chang te pawhin he hla an duh thu hi an hrilh lawm lawm thin.

Amah MS-i pawhin he hla hi a duh a, "A thu a mawi a, a thluk a mawi bawk. He hla hi chu ka duh khawp mai. A phuahtute pawh an fakawm ka ti," tiin a sawi thin.

Mahse, 'khuanu ruat loh di' a lo tawn tawh avanga he hla hi duh ta viau anga fiam chang erawhin a pha nasa thin hle a, "Chutiang a ni lo, ngaihzawng pawh kan hmuh zawh ve loh hi," a ti thin.

He hla video a siam lai pawh khan a phur a, shooting an tih lai te pawhin phone-ah pawh a hlim a ni tih hriat takin mi a chhang thin.

Tunah erawh mi tam takte ngaihzawn MS-i chuan 'khuanu ruat di' a tawng tawh a, Nagaland lamah a khawsa ta.

MS-i 'khuanu ruat di' hi Malsawmtluanga ve bawk a ni a, MS-a tia koh a ni. March ni 12 khan MS-i leh MS-a te hian Aizawl chhuahsanin Nagaland lam an pan a ni.

MS-a hi sipai a ni a, havilder clerk a ni. MS-i hmingchhiat laiin hrehawm ti takin a hnathawhna hmunah a lo awm a, a tuar zo ta lo a, MS- tlanpui tur liau liauin Mizoram lam a rawn pan ta a ni.

MS-a hi Aizawlah a thian pakhatin a lo hmuak a, Bungtlang lama tawmbo mek MS-i chu han hruaichhuakin, sumo-in Guwahati lamah ni 12-ah khan an liamthla ta a ni.

MS-a hian MS-i hmingchhiatna avangin hrehawm a tuar a, mahse, vawi khat mah MS-i hi thlah emaw, kalsan emaw a tum lo. A tih ngaihna hre lovin Mizoram lam a rawn pan ta tawp a, MS-i chu neih a tum ta a ni.

MS-i hian Youth Icon a nihna atanga a inhnuhdawh thu Youth Icon Organiser te hnenah ziakin a thehlut a, Youth Icon a nihna pawh hlihsak a ni tawh.

MS-i chuan a hmingchhiatna avanga hrehawm a tih thu leh mi tam tak a barakhaih avanga pawi a tih thu a sawi.

"Ka zai tehlul lo ngaithla thintute leh kei mai mai pawh min lo ngaina vetute chungah hian ka lawm em em a, amaherawhchu, an hnena lawmthu pawh sawi hlei thei lo khawpa ka awm ta hi chu pawi ka ti khawp mai," tiin Zozam Weekly a hrilh.

Malsawmtluangi Fanai hian zai a chawlhsan dawn nge a zai zel dawn tih a sawi thei rih lo a, "Tunah chuan engmah sawi theih ka nei lo. Ka awm awmin ka awm ve tawp a, chutia awm bak chu tih theih ka nei lo. Tihian ka awm ve tawp mai a ni," a ti.

"Ka zai zel dawn nge zai zel dawn lo tih chu hunin a hril ang chu. Tunah chuan he hrehawmna hi engtin nge ka hmachhawn ang tih chauh lo chu ngaihtuah theih a ni lo. Nakin kan la inngaihtuah ve ang chu," a ti bawk.

MS-i chuan hrehawm taka a awm laia amah tawiawmtute chunga a lawmthu sawiin, "Mi hi ka chungah an tha em em a, min lo tawngtaisaktu te, hrehawm ti lo tura min fuihtute chungah ka lawm tak zet a ni. Ka beisei phak bakin mi hi ka chungah an tha a ni," MS-i chuan a ti.

Bungtlang nula MS-i hian a dinhmun a lo ngaihtuah chiang ngai lo nia sawiin, "Tiang khawp hian mi hian min lo hlutin min lo ngaihven ang tih ka hre ngai lo. Kei chu nula pakhat ve mai, engmah chhuan tur nei lo ka ni a, zaimi ka nihnaa ka tih tur tha taka tih ve tawp mai kha ka tih ve theih chhun chu a ni. Heti khawp hian mi hian min lo ngaihven ang tih pawh ka hre ngai lo. Ka tlin lohna zawng zawngah min ngaidam turin min lo ngaina vetute ka ngen a ni," a ti bawk.

Related Posts :



No comments:

Post a Comment