Sex vanga hmingchhiatna

¢ Zozam News Service

YWCA Family Councelling Centre-a councellor Lalhriatpuii chuan: "Blue film a tam si, heti lam hi en tur a tam em em a, hei hian mipat hmeichhiatna hman khawloh pawisak lohna a thlen," tiin a ngaihdan Zozam Weekly a hrilh.



"Blue film lei tur a tam em em a, internet atangin duhtawkin a download theih bawk. Chumi hnuah thiante nena titi-na ber a ni zui a, hei vang hian sex hi kan pawisa lo hle a, thla han lak te pawh kan hreh ta lo a ni thei ang," a ti.

"IT khawvel ken tel a ni a, internet atanga blue film download tur a tam bakah camera ni se a tam tawh em em a, inkhuahkhirh hleih theih a ni lo. 'Ti suh' tih ringawt thei a ni lo. An film enah te hetiang a tam chuan, sawi tawh angin, pawisak lohna a lo piang a, camera a tam si, mobile phone hmang pawhin duhtawkin thla a lak theih a, miin sex an hmang duh a nih chuan thla han lak mai pawh a awlsam em em a ni. Sap kan ngaisang a, an awm dan kan copy a, mipat hmeichhiatna hman khawloh pawisa miah lote film en tur a tam si," a ti bawk.

"Mipat hmeichhiatna hi nupa karah lo chuan hman loh tur a ni a, mahse, hman khawloh hi kan pawisa ta lo hle niin a lang. Heti lamah hian inzirtir kan ngai khawp mai a, nu leh pa te pawhin kan fate hi zirtir thei ila a tha. Tunah chuan hetiang lam sawi te hi kan hreh a, thil tha lo a nghawng hmaa inzirtir a tul tih hi kan hriat a tha khawp mai," tia sawiin Hriatpuii chuan, "Mipat hmeichhiatna hi hman lo ila, kan thei ngang lo a nih pawhin camera hmaah duh miah loh tur," a ti.

"Hmeichhiate hian mipa hi heti lamah hi chuan ring lo se a dik ka ring. An insum thei lo a, sex an lo hmang a nih pawhin thlalak hi chu duh lo tawp rawh se, miin an lo la ru a nih chuan thudang a ni. Hmeichhiate hi mipa bumin an awm tur a ni lo," tiin thurawn a pe a ni.

"Hetianga chetsual hi a nghawng a na a, thlalak vanga hmingchhiat leh lek phei chu a nghawng a na lutuk. An rilru a hrehawm ang a, an zak ngawih ngawih bawk ang. Mahse, a siamthat theih tawh si loh. Pui an ngai a, kawng engkimah puih an ngai. Councelling tha an mamawh a, tin, khawtlang pawhin tha deuha kan en a ngai. A tuartute hi mihring ve tho, chesual thei an ni tih hriaa khawngaih taka kan en a ngai," tiin sex vanga hmingchhiate en dan tur a sawi bawk.

Psychiatrist Dr C Lalhrekima chuan hetiang thil hi khawvel hmasawnna ken telah a pawm thlap.

"Mobile phone te a awm tawh a, awlsam takin thlalak leh video te kan inthawn thei a. A thuhrimah tun hma kha chuan hetiang hi a tih theih loh. Thlala tur chuan photo house-a kal a ngai a, a inphelhruah theih loh tluk a ni. Tuma'n hmelhriat lohte hmaah an inphelhruak duh lovang. Tunlaiah erawh chutiang a ni tawh lo a, mahni room chhungah bialpa te nen chauh te an awm a, tawngkam thiam deuhva mipain an han thlem chuan an tlu ta mai thin ni tein a lang," tiin a ngaihdan Zozam Weekly a hrilh.

Mipa thenkhatin an bialnu te saruak thla an lak ni awma sawi a awm tih sawiin, chutiah tihdarh chu a dem thu a sawi.

"Confidentiality vawn hi Mizovin kan zir a ngai hrim hrim," tia sawiin, "Mi pahnih inkar thil a nia, chutiang lo tidarhtu chu a demawm ka ti," a ti.

"An bialpa te nen an awm dun a, an 'close' em em, an engkim an hmuhtir ngam khawpa an hnaih te pawh an ni thei, tin, an chak lohna lam pawh a ni thei tho bawk, an rin ngam avangin thla an la ngam ta a ni thei," tia sawiin, "Engpawhnise, confidentiality zah lo mihring hi an demawm ka ti," tiin a sawi a ni.

"Kan close deuhte bulah chuan kan nun thuruk engkim kan bun a ni thei a, kan inphelhruak a ni thei bawk, chutiang tihdarh chingte chu an demawm tak zet a ni," a ti bawk.

"An bialpa te tihlawm an tumna te pawh a ni thei mai thei bawk," tia sawiin, "An bialpa te tihlawm nan an intulut a ni thei a, chutah pawh chuan inrintawnna tho kha a ni pawimawh ni," tiin mi pahnih inkara inrintawnna pawimawh a tih thu a sawi.

"Saruaka thlala hmeichhiate pawh hi an mi rin berte'n an bum a nih chuan tu nge an rin leh ang?" a ti nghe nghe.

Aizawl Theological College-a Christian Communication zirtirtu Rev Dr C Lalhlira chuan: Mizo zinga sex video a hluar ta hi communication lama hmasawnna ken tel nia a hriat thu a sawi a, heti lamah hian fimkhur a tul hle tih a sawi bawk.

"Mipat hmeichhiatna hman khawloh hi sual a ni a, mahse, miin an duh miah chuan tih theih a vang khawp mai. Chutah thla an la duh leh zel a nih phei chuan midang tak sawi theih a ni tak tak lo. Amaherawhchu, hetiang lakah hian kan inveng thei a, miin mipat hmeichhiatna an lo hmang khawlo a nih pawhin an fimkhur tur a ni," tiin Zozam Weekly a hrilh.

"Thil thar a lo chhuak a, thil thar hi a tirah chuan kan lo lawm thin a. IT khawvelah pawh thil thar a lo chhuak a, inbiakpawhna hmanrua te pawhin hma a sawn zel a. Kan hriat reng tur chu - hmanrua hi mihring siam a ni tih leh mihring hman tur a ni tih hi a ni. Mobile phone te pawh a hmangtuin thiam taka a hman chuan a thatpui ang a, a hman thiam loh erawh chuan a chhiatpui dawn tihna a ni mai a. Hman khawloh theih, hman tangkai theih vek a ni. Mi thenkhatin mobile phone pawh chu an hmang thiam lo a, mahni intihchhiat nan te, mi tihhmingchhiat nan te leh midang rilru tihnat nan te an hmang ta a ni ber mai," a ti bawk.

"Inzirtir kan ngai a, mi tin hi kan fimkhur a ngai bawk. Inven reng a ngai a, hmanrua hi hman tangkai kan tum tur a ni. Mi chanchin thalo thehdarh nan te, mi thlalak, lawmawm loh lam tihdarh nan tea hmang lo tura inven a tul," tiin hemi chungchang hi a sawi zawm a ni.

Inbiakpawhna hmanraw hman tangkai dan chungchanga zawhna chhangin, "Keini chuan Pathian ropui nan leh midangte thatna tura hman tur kan ti a, chu chu Kristiante chuan kan tum tur a ni," a ti.

Related Posts :