¢ Linda Chhakchhuak
Mipa te chungnunna society kan neih vangin hman ata tawh mipat hmeichhiatna hi mipa te'n hmeichhia te aia an chungnunzia lantirnan an hmang fo thin.
Mipain mipat hmeichhiatna a hman chuan inchhuanna tham a tling a, hmeichhe tan erawh chuan hmangaihna avang pawhin sex hi a hman ve theih loh a, a lo hmang a nih chuan tlukchhiat a ni tawp mai.
Hemi a nih avang hian sex hman chu thuruk a ni thei lo. A chhan chu mipa chuan chapo nan a hmang a, a puangzar thin tlat. An theihna lan tir an duh a. An duh a nih chuan inchung sangah dingin 'he hmeichhia hi ka theih hnu' pawh an ti thin a ni. Chumi a nih vang tak chuan a hmeichhe tan chuan zak em ema hringnun hman a ngai thin a, sawi theih a nei ve lo.
Hmanah chuan ‘zen’ pawh a awm thin. Mipa chu hmeichhe inah zan laiah a lut ru ang a, a chang chuan hmeichhe bialpa emaw hmeichhe pasal emaw angin a inlan thin a, mipa chu a hlawhtling a nih phei chuan hun dangah a hmeichhe zen hlawhtlin chungchang chu uar takin a sawi leh thin.
Hmeichhe tan chuan zahna hlawm a ni hawt a, vantlang lakah an hming a chhia a, chutih laiin thil sual titu tak mipa zawk erawh hrem a ni ngai lo.
Mizo zia-ah chuan hmeichhe mutpui chu mipa tan chuan an puanzar a ngaih vang a ni ang, tunlai Mizo mipate pawhin chu zia chu an la ching ta reng a nih hi. Hetiang bakin tunlaia sex video hluar em em chhan pawh hi hrilhfiah dan dang a awm lo.
Mobile phone camera hmangin sex hmang lai an la a, chutah chuan mipa ngeiin camera an keng a, a nih loh pawhin an thiante (hriatpuitu atan?) an laktir thin. A darh hnuah mipa a insawi fihlim a, mahse, a video entute tan a mipa thil tum chu hai theih a ni lo. MS-i video nia sawiah pawh hian a mipa zawkin camera a keng a, hmeichhe hmel lantir a tum ngar ngar a ni. Hmeichhia chuan a hmel hi thup a tum hram hram. Chutih laiin a mipa zawk chuan ama hmel a tilang hauh lo thung. Hei hian mipain he video hi midangin an la hmu dawn tih a hre chiang hle tih a lantir a ni.
Hetiang thlalak hian midang a hruai khawlo thei a, a bikin thalai leh naupang a hruai khawlo nasa thei. Chuvangin, a tidarhtute chu hrem tur an ni a, chu chu danin a sawi dan pawh a ni.
A hmeichhia aiin a mipa hi hrem nat zawk tur a ni bawk. A hmeichhia hi chu society-in a hrem der tawh.
(He thu ziaktu hi Times of India, Telegraph leh chanchinbu lian hrang hranga lo thawk tawh thin a ni a, Grassroot Options publisher a ni bawk. Tunah hian freelance journalist a ni.)
Thursday, March 12, 2009
The Mizo Sexual Wilderness
Subscribe to:
Post Comments (Atom)
No comments:
Post a Comment