Phase-II a buai tual tual

¢ Zozam News Service

Kum sawm lai a liam tawh a, mahse, Aizawl tui lakna tur ruahmanna fuh loh avangin vawiin thlengin Mizoram khawpui chuan harsatna a la tawk. Mipuiin beiseina sang tak nei mah se "beiseina" thlawn mai a ni thin. Mipui an pung a, mipui an pun chuan tui mamawhna a sang zel a, khawpui leh a chhehvelah thingkung a chereu a, tuikhur a kang chat a, mipui tan innghahna dang a awm si lo.



Mipui an phun luai luai a, chutah PHED lam chuan thawm an rawn nei a, media lamah pawh tarlan a ni. Chutah chuan: "Cheng nuai li vel lekin electric wire zawm se pump theih mai a ni tawh a, contractor hian a ti duh si lo..." tiin thu a rawn thang a, mipui phunnawina a nasa lehzual a, mahse awmzia a nei si lo.

Cheng nuai lia thlunzawm tih chu a lera thuai ang chauh a ni; thu hriat chian tual tualin harsatna a nasa tual tual mai. Phase II chu a buai ta tual tual mai a ni. He tui lak hna thawktu Johson Eastern Power (JEP) chu media lamin thu leh hlate a neih leh neih loh zawtin an dawr thin a, ani erawh chuan media lama inchaltauh chu an 'culture' a nih loh thuin a chhang mai thin a, an ngawi reng a ni. Mahse, thawm riva a tam em avang leh media lamin an biakpawh tak fo avangin inthlahrung ang reng tak chungin media lamah an harsatna tawhte an sawichhuak ve ta a...

A buai tual tual
Contractor thu leh hla leh department lam thu leh hla han hriat chian hian Phase-II tui lak hna hi a buai zual zel dawn niin a ngaih theih a, pahnih inkara inhriatthiam lohna nasa tak ni si, contract hna lah a vaibelchhe tel ni bawk si hian buaina hi a tizual dawn niin a lang.

Contractor chuan hetianga chinfel theih loh khawpa langa a buai tak avang hian anni chet phungah chuan court-a kal mai kha fihlimna hmasa ber a nih theih tur thu a sawi a, hetih lai hian ngaihtuahna hmang tak takte chuan he contract hna hi 'design failer' a nih thu leh 'management failure' a nih avangin tun dinhmun hi thleng taah an ngaih thu Zozam Weekly an hrilh.

Employer hian employee a enkawl dan hi a dik tawk em tih hi zawhna lian tak a ni a, a huna pawisa an pek loha an bat sak avang hian employee (JEP) lam hi an nuar ve tawh niin a lang si a, pawisa inpek dan tur chungchangah pawh a zata an sawi hi PHE lam leh JEP lam atanga ngaihthlak ve vein a inang si lo.

Heti hian contractor chuan Phase-II hna kal chhoh dan history tlangpui a sawi a:

Contractor chuan kum 1999, November 23-a PHED leh JEP nen inremna thuthlung ziakin thawh khata tui pump thei (Single stage pumping), ni khata tui makdatuai litre 18 pump theihna tur ruahmanna leh tui in tlaka siamna tur (treatment plant) 36 MLD siam leh tui pump chhuah tur dahna (intake structure) 33/11 KV sub-station leh Tlawng leh Tuikhuahtlang inkara nitin tui thlitfim sa litre maktaduai 18 pek chhoh theihna tur ruangam, Durtlang leh Sihphir khuate chawmtu tur pui pump leh chhawnna hmun (booster pumping station) pahnih siam bakah heng khaw pahniha tui thianghlim pekna tur tul dangte bakah zaa za thla vengtu (100% standby) tur diesel engine pump set bun tura ruahmannate siam a ni, tiin a sawi.

Contractor chuan inremna siama hna an thawhin design te chu PHED lamah a thehluh hnuah JEP hian hna a thawk tan ta a ni tiin a sawi.

PHED lam chuan central lamin chhawng khata pump tur chu chhawng hniha pump zawk tura an tih avangin JEP hnenah hian chhawng hniha pump-na siam turin an rawt ta tih an sawi ve thung. JEP chuan two stage pumping tur chuan hna a tan leh ta tih sawiin hemi atan hian a pump-na khawl pawh ama pawisain a lei niin a sawi bawk.

One stage-ah khan ni khat (darkar 24) chhunga tui hi litre maktaduai 18 pump thei tur a nih laiin two stage(chhawng hniha pump)-a an thlak tak avangin ni khata tui pump theih zat tur chu ni khata litre maktaduai 24-ah a kaisang ta a ni.

Hetia an contract hna nasa taka tihdanglam a nih tak avang hian contractor chuan PHED hnenah chuan senso sang zawk an pawm vena turin thu delhkilh nei se tih leh inremna (agreement) siam ni se tiin thu an thehlut a, (vide Offer No.JEP/GAWSS-II/Q108 dated 26/02/1998). "PHED lamin heng thu delhkilhte hi tihpuitlin ngei an intiamna zulzuiin contractor chuan ruahmaanna hmasa chu bansanin a hna thawh dan tur pumpui chu an survey tha leh a, an desiged tha leh ta vek," tiin JEP lam chuan an sawi nghe nghe.

A fel hnuah a kual leh
Hetia ruahmanna thar anga hma an lak fe hnu hian PHED lam chuan chhawng hnihna hnathawh mek lai chuan contractor hnenah hian ruahmanna thar nei lehin ni khata litre maktaduai 12 pump thei tura ruahmanna thar an siam leh niin contractor lam chuan an sawi a, he hmalakna hi kum 2007 khan zawh fel niin DoNER minister Mani Shankar Aiyar chuan a rawn hawng ta a nih kha.

Hetia ruahmanna a kikawi nual hnu hian contractor lam hian PHED nen hian chhawng hniha pump theihna tur inremna ziah an duh hle niin an sawi a, a nawr pawh an nawr nghe nghe.

Kum 6 zet inremna mumal awm lova hna an thawh hnuin department lam hian contract agreement hi contractor rawn hauh lovin a siam ta tawp mai niin contractor lam chuan an sawi a, hei vang hian JEP lungawilo hi an auchhuak ta a, chief secretary, department changtu secretary-te hnenah lungawi lohna thu hi an thlen ta a, thil a buai tan ta a ni.

Pawisa leh standby buaina
Chhawng khat pump-na tur inremna siam a nih lai khan 100% standby pawm a ni a, chumi awmzia chu current hmanga tui pump chu current line chhiat emaw, harsatna awm thuta tui a pump theih loh thulah diesel hmanga current-in a pump chhuah zat chiah pump thei tura khawl dah a ni. Hemi chungchangah hian PHED lamin chhawng hniha pump-na contract an rawn siam, JEP lam rawn lova an siamah khan za-ah za current a awm loh pawha diesel hmanga pump theih tur kha rawn thlak danglamin zaa 50 chauh current awm loh laia diesel hmanga pump theih turin ruahmanna an siam ta si a, heti a nih chuan JEP lam hian khawl hi zaah za hisapin an lo lei vek tawh si a, standby vang hian buaina pakhat lian tak a awm ta a ni.

Hei bakah hian hemi kaihnawih thoah hian buaina lian tak pakhat a awm a, chu chu sorkarin a leibat zata a chhinchhiah leh contractor chhinchhiah hi a inang thei ta lo a ni.

"Ni 1000 te min batsak a, thla tin min pe tur an nih laiin," tiin contractor lam hian an sawi a, tunah hian an khawl leitawhte leh zaah za thlavengte nen contractor lam hian department ba chu vaibelchhe 77 chuang niin an chhut a, department lam duh dan anga zaah za thlaveng chauh an lak sak dawn a nih pawhin vaibelchhe 61 chuang chu department lam hian an la ba ta cheu niin an sawi bawk.

JEP hian zaah za thlaveng khawl a lo lei tawh avangin department hian zaah sawmnga thlaveng khawl chauh an lak sak chuan vaibelchhe 15 vel ngawt a hloh dawn niin a chhut theih.

Department lam chuan leibat an la neih zat hi cheng vaibelchhe 31 niin an chhut a, contractor hian hna hi a thawk zo vek a nih pawhin cheng vaibelchhe 51 vel bak hi pawisa lak tur a nei dawn lo niin department lam chuan an sawi thung.

Tunah hian Phase-I khawl upa tawh tak, kum 1988 atanga hman tawh chu a khawl thlak tumin department lam hian an bei mek a, a khawlte pawh an chahthleng tawh niin an sawi.

Tunah hian Phase-I hian ni khatah tui hi litre maktaduai 12 a pump thin a, Phase-II hawn tawh chin hian ni khatah litre maktaduai 12 a pump ve nawk a, ni khata tui pump theih zat chu litre maktaduai 24 a ni a, Phase-I hi siamthat dawna chawlhtir ngawt chuan department lam hian Aizawl khawpui tui harsatna hi a nasa dawn lutuk niin an sawi si. Phase-II hi pumpuhluma pump a nih ngawt loh chuan Phase-I hi siamthat theih a ni lo tia sawiin harsatna anni lam pawhin nasa tak an tawk tih an insawi ve bawk.

Related Posts :