Thursday, March 12, 2009

Interview : PL Liandinga

Mi pakhat - PL Liandinga an tih hi khawtlang thila inhmang mi a ni a, zirna lamah MSW val a ni. Thuziakmi, thalaite zinga khawsa thin a ni a, social thinker tiin a sawi theih awm e. Chu mi chuan tiang hian a sawi:



Kan society hi sex video awmna tur ve rengah i ngai em? Nge, a inhmeh lo?
Ngai tehreng mai. Kan inchei dan te, kan awm dan zawng zawng han en hian miin an ti nia kan hriat apiang chu tih ve zel mai hi kan awm dan phung pakhat a ni.

Social control a awm lo a, kan sualna leh kan fel lohna te hi a mawhphurtuah zu kan puh ta vek a. Khawtlang invawn dan leh inawp dan lam aiin zu zuar nia kan rinhlelh te um nan leh ngaihven nan hun kan hmang zo vek a. Chumi chungchang sawitu leh ngaihdan dang nei lo apiang chu zu lama tang angah kan inngai a. Chutianga kan awm tawh hnu chuan kan society-ah awm thei lo emaw, awm lo tur emaw hi a awm tawh lo.

Kan sorkar lah (tunhma kha leh chenah khan) a ngawi tlat a. Chutiang society-ah chuan, 'Hei hi a awm ang. Hei chu awm atan a inhmeh lo,' tih theih a ni tawh lo. A awm awm hi a awm a, a awm lo lo hi a awm lo mai mai a ni.

Sex lamah kan dahlau ve hrim hrim em?
Kan dahlau pawh ka hre chuang lo. Mahse, awmphung kan nei lo a ni. Kan entawn ber chu - Israel fate, Sap leh India mi te an ni a. A vai hian kan chawhpawlh vek a. Kan hnam tihdan tak hi chu kan sakhua atang hian kan chhawk thla hneh riau a. Sap angin kan zalen deuhthaw a, vai hnam changkang tih dan leh a changkang lo tih dan hi tlem tlem kan copy a, Israel lam hi Bible lam atangin engemaw ti ti hian tanchhanah kan hmang a.

Sawn man te tihpun kan ngaihtuah ut ut a, India dana inkhin te kan duh a, sap anga zalen kan duh bawk si a. Kan awm dan tak hi hriat fiah a har riau a. Mahse hnam tladah tak zawng kan ni.

A nih leh hetiang kan lo nih tak chhan hi eng nge ni ber?
A chhan ber chu kei tehlul chuan ka hre fuh chat lo mai thei. Mahse, sakhuana atang hian mi tih dan entawn ringawt maia kan kal hi a fuh lo ta riau hian ka hria a. Hei hian kan hnam nun a khawih thui ta hle hian ka hria a. Kawng engkimah hei hian min khawihin ka hria. I sakhuana berah hnam tih dan leh mahni culture zawng zawng i thlauhthlak tawh chuan thil dang - incheina, awm dan leh nunphungah chuan tih dan thiam a lo har hlein ka hria a. Hnam tih dan kha i sakhuain a vuak thiah vek tawh hnuah chuan hnam anga mihring invawnna kha a buai zo ta a ni.

A dawt lehah chuan inawpna tluangtlam thilah sorkar a inthlahdah a. Sorkar hian mipui mimir nunphung hi a vawng tur a ni. Sap ramah chuan khawlaia i din mai mai pawhin sorkar chuan a uap reng che a ni. Kan mimal inchei dan chu kan duh dan a ni ngei mai, mahse ka tuichhe luantir dan te, ka bawlhhlawh paih dan te, ka motor khalh dan te, ka motor hun dan te - midang nghawng thei thil reng rengah chuan sorkarin thu a nei tur a ni. Kan sorkar hian mipui hi min awp tur a ni a, sorkar hnathawk lek phei chu min khuahkhirh tur a ni.

Chumi dawt lehah chuan kan khawtlang nun vawngtu tura ngaih, YMA te kan hawiharh ta lo deuh a ni. YMA chu val upa dinhmuna ding, tlangval tlawmngai dinhmuna ding, kan zawlbuk - kan hnam sukthlek pumpui ngaihtuahtu tur a nih laiin khap rem theih loh zu khap reng rengin kan buai em em a. Pawi ka ti khawp mai. Sawhthing te, SSA te, Aieng te, Zu te, Ganja te, mihur sawmhnih khat te buaipui lovin, kan hnam pumpui sukthlek leh kan khawtlang nun vawnna (social control) hi YMA chuan a ngaihtuah tur a ni a. Mahse kan khawtlang nun pumpui ngaihtuah miah lo pawh hian kan hotute an buai ta lutuk a ni.

Kum 50 vel liam taah khan digital khawvelah hian lo lut tawh ta ila, sex video hi kan hmelhriat daih tawh ang em?
E, chu zawng ka hre lo le. Kan hmelhriat mahna.

A tuartute hi engtia tih chi nge?
Tihngaihna vak a awm lo. He khawvelah hian thil hi a pawi tawh chuan thawidam vek theih a ni ngai lo a. Sawi zui tlema haider hi a tha berin ka hria.

Do chi nge pawm tawp chi?
Do tih chuan hneh loh a awm thei a. Hetiang thil hi chu tihtawp vat chi a ni. A tawp theih dan chu a thehdarhtu nia hriat chu hrem ngei chi an ni. Eizawnna anga miin an tih pawhin hrem thiang tho an ni a. Mawl vanga hetia thehdarh hi chu a chi loh khawp mai.

Mizo lanna sex video-ah hian mipa hmel a lang ngai meuh lo a, hmeichhe hmel zel a lang a, hei hian eng nge a lantir?
Eng teh vak mah a lantir pawhin ka hre lo. Mi mawl thil tih a ni hlawm vekin ka hria a. A thla latu hi mipa lam zel an nih vang a ni mai a. Hmeichhe tan a ngeiawm zual tih mai a ni.

Mahse, hetiang a lo nih takah chuan a thla latu leh a thehdarhtu (tum reng vanga a tira thehdarh ni lovin mawl vanga thehdarh chhawngtu) te hi an sual ka ti. Mawl leh sual inkawp thil niin ka hria.

A tidarhtute hi a mipa thian hnaivai emaw an nih ka ring a. A mipa hi an lo nih pawhin an sual ka ti. Hetiang hian ka farnu emaw, ka fanu emaw timualpho ta se ka ngaidam theiin ka ring lo. Hetianga mi mualphona thlentirtute hi chu fate nupui pasalah ka duh lo khawp ang. Mawl leh sual kawp mihring kut hnu a ni. Mimal nuna inkawpna thu ril ber leh induhna lantirna sang ber, hetia kawppuite tihmingchhetu hi chu mihring ngaihsanawm lo ber zinga mi an niin ka hria.

Sex video vanga an mualpho loh nan thalaite hnenah thurawn han pe teh.
Sex hi fimkhurpui tur a ni a. Hmeichhe tan phei chuan thianghlimna hi ro hlu a ni. Chumi kawnga insum theih tak ngang loh pawhin hmang lai thla lak kher kher hi chu a duha duh bur loh a ni mai. An lo la duh ta ngang a nih pawhin chawh chhiat leh nghal tur. Eng vang maha ken kual loh a ni tawp mai.

Related Posts :



2 comments: