Plan Tharah NLUP Atan Cheng Vbc 100

¢ Zozam News Service

Kalphung thar beisei em ema mipuiin sorkar an thlir mek lai hian pawisa kum tharah hi chuan chutiang chu beisei chi a la ni dawn loin a lang. Mizoram State Planning Board vice chairman Lalkhama chuan, sorkar thar din hmain draft plan hi siam a nih avangin a hmaa mi nen danglamna vak a awm loh tur thu Zozam Weekly a hrilh.

Lalthlamuana Ralte leh Lalkhama, Vice chairman, State Planning board inkawmna chu..



Kum thara Mizoram Annual Plan-ah hian congress sorkar laka mipui beiseina thhlawhtlinna tur thil thar/kalphung thar beisei tur a awm ang em?

Annual plan tharah hian kalphung thar pakhat mah a awm lo ang. A chhan chu draft plan hi October thla laihawl vela peih tura tih a nih avangin nikum lamah, sorkar thar din hmain annual plan hi an draft vek tawh a. A hma lama mi ang thoin kalphung pangngai zuiin a lem angin an dah mai mai tihna a nih chu.

Annual plan thar chu a pung viau dawn em?

Khu lamin 'kumin budget chu 10%-in tipung phawt rawh u,' an ti a. A nih ang angin an thawn thla tawh si a, tichuan Additional proposal kan siam leh ta a.

Kum hmasa lam aia 61%-a pungin additional proposal hi kan siam a ni. Chu chu working group-ah an sawiho a. A lan dan chuan za zela 25 (25%) vela a pun a rinawm.

A punna a sang hi a lawmawm rual rualin kan pawisa hmuh tur tam tak chu a pung awm puk (public borrowing) a nih chuan nakinah phurrit a ni thei dawn a. Chuti a nih chuan kan Annual plan fund punna chhan chu sorkar laipui tanpuina (central assistance) a tam dawn vang nge rulh leh ngai tur pawisa min puksak dawn vang?

A punna hi puk (borrowing) a ni vek dawn lo a, kumin budget hi externally aided project atanga hmuh turah an tipung chiang a. Loan atanga lo kal tur chu a awm tel tho tho ang.

Tunhma atangin sorkarin sum indaih lohna phuhruknan leh thil dang (non-plan) atan plan sum pawhpen a ching thin a. Sorkar thar hian plan sum pawhpen hi in ching ve ang em?
Plan pawisa non-plan atana pawhpen hi a tam thin a, hetiang hi khap kan tum a. Tunlaiah chuan state sorkar thuneihna hi an dah thui ta viau mai a, theihtawp chhuah kan tum ang a, a tlangpuiin non-plan atan hman loh kan tum dawn a ni.

State health care scheme hi Congress party inthlan Manifesto-ah khan a lang a. Kalpui zel in tum em? In ruahman tel reng em?

Chhunzawm loh theih loh a ni alawm. Mahse, proposal-ah a tel leh tel loh chu ka hre lo.

Planning Board hi in din dawn em? (Member-te ruat a, meeting/discussion neih te in tum em?)

Tunah hian Member Secretary atan Pu PL Thanga ruat a ni tawh a, a dinhmun tur chiah chu la tihfel tur a ni ang. Sorkar tum dan ni a ka rin chu member inruat chiah loin invitees vuah a, meeting-a tel tura mi hrang hrang sawm thin hi a ni. Mi dang 'involve' tamtir an duh a ni.

Sorkar hian ngaih pawimawh bik (priority sector) a nei em?

Nei ve bawk e. Power sector hi kan ngaih pawimawh tur pakhat chu a ni a, hemi atan hian Public Private Partnership (PPP) uar kan tum ang.

Central sorkarin 2005 a viability gap funding policy an siam khan project a ngaih pawimawh chu 25% grant a pe thei a. Keini pawhin electric power siamchhuahna atan hian private investment kan hip theih chuan min pe thei dawn a ni. Tunah hian detailed project report kan neih tawh sa chu pahnih pathum a awm a, chung zingah chuan Tuivai hi a beiseiawm ber rih a, Megawatt 210 pe chhuak thei tur a ni a, cheng vaibelchhe 1,600 sen ngai tur a ni bawk.

Tunah hian kan chief minister-in a buaipui mek a, sorkar laipuia power ministry-in a phal tawh a, finance ministry lamah a bawhzui mek a. He project-ah hian 49% share neih kan tum a ni. Power sector hi kan ngai pawimawh dawn a, pawn lam atanga power lak luh tihtawp a, hmun danga power hralh theih hial kan tum.

A dawtah chuan mipui retheihna sutkian hi kan tum a ni. Mi retheite dinhmun chawikan hi kan priority chu a ni mai a, chumi atan chuan hmalakna (instrument) tam tak kan ti dawn a. A pawimawh ber chu NLUP hi a ni. Chhung tinin durable assets an neiha, hlawk (productive) zawka an thawh hi kan tum a ni a, chumi atan chuan project kan siampui anga, sum kan pe bawk ang.

Budget thar leh plan tharah hian NLUP hi in ngai pawimawh viau dawn niin a lang a...
NLUP chu project lian ber atan kan dah a. Kan budget thar tur hi interim budget a ni dawn chungin NLUP atan hian Cheng vaibelchhe 100 kan dah chiang tawh a ni.

Related Posts :