Thursday, March 12, 2009

Phai lama hna zawn hi a him tawk em?

¢ H Vanlalhruaia, Hyderabad

Tlem lai deuh khan Aizawla seminar ka chhimnaah chuan kan mithiam pakhat chuan 'globalization' hi thil kal chho mek zel a ni a, kan duh emaw duh lo emaw Mizoram pawh min hrut tel dawn tho tho tih a sawi a. Kan mithiam meuh thusawi a ni a, a dik thawkhat ni hmiang. Amaherawhchu, 'globalization'-in a ken tel thin thil tam tak – (a bikin a chhe lam) laka inven fimkhur a tulna erawh a sawi hmaih tlat kha chu pawi ka ti viau mai.



Kan ram kilkhawr leh intodelh lo zet thin kha tun hnai atangin sumdawnna khawvel zau zawkin min rawn hrut chho ve tan a. Kan ram pachhe tak chuan thangthar zawng zawngte tan hna a pek theih tawh miau loh avangin kan mangang a, kawng dang kan dap tan ta ruai mai a ni. Hemi hrinchhuah mek chu ram pawn lama hna zawn kan intihhmuh ta viau hi a ni. Globalization kalchho mup mup chuan kimchang lo takin remchang min rawn hawnsak chu ngaihtuahna thuah hnih hmang hman lovin kan bawh rum rum a. Mi tam tak chu kan inchhuih tlu pheng phung mek a ni.
Heng kan thalaite harsatna sutkian theih beiseiin mi thenkhatin hma an la thin. Mizo thalaite tan hna ropui tak tak an thawk thin ngei mai. Hetih lai hian mi dang thenkhat chuan remchang an lo melh ru ve ru ran bawk. Phai lama zirna emaw hnathawh tur emaw kawhhmuhtu consultant agency an tih ang hi Mizoramah pawh an awm ve ta fur mai. Heng consultant agency-te hian call centre-a hnathawk turte leh security guard turte, foreign rama hnathawktu tur leh thil hrang hrang atan an inzuar chho mek zel a. Anmahni kaltlang hian thalai tam tak chuan hna tha tak tak an hmuh mek lain inchhuih buai sawi tur tam tak an awm mek si a ni. Fimkhurna tur lam hi kan la hre tawk lo hle niin a lang a, he article-ah hian hemi chungchang hi tarlan kan tum dawn a ni.

Job placement agency hi enge ni?
Tunlai khawvel chu a hmanhmawh tawh a, engkim mai hi tih vek sen a ni tawh lo. Kan tih ai min tirh sak tur turin consultant agency hrang hrang an awm a. Hengho kaltlang hian awlsam zawkin engkim mai a tih theih ti tih tawh. Heng zinga kan hriat lar ve mek chu hna pe thei nia inzuar thinte hi an ni.
Job placement agency-te chuan company hrang hrangte mihring mamawh an lo thlithlaipui a, hna thawk tur mihring an lo zawnsak thin a ni. Hna zawnsaktu an nih avangin company atang chuan hlawkna engemaw zat an lo tel chhawng ve leh ta thin a ni.
Phai lamah leh khawvel ram tam takah chuan hna zawn dan kalphung hi consultancy service kaltlang deuh veka tih a ni fur tawh a. Phai ram khawpui lianah chuan hetiang consultancy service hi kawtthler tin deuhthawah an awm a, thalai tam tak tan pawh hna zawn a awlsam phah em em. Web-site pakhat www.naukri2000.com-ah chuan Hyderabad atang ringawt pawhin hna tha deuh hlek chin atan Job Placement Consultants lian tak tak 109 ngawt an inzuar a ni.
Hetih lai hian consultant agency rintlak lem loh engemaw zat an awm tih hi kan hriat a tul. Thiam takin mipui hnenah an inzuar a, pawisa an duh zat zat an deposit tir hnuah customer-te duh ang tak pe leh si lova thamral mai mai ching an tam hle. Heng mite avang hian thalai tam takin harsatna an tawk a. India ram chanchinbu hrang hrangah pawh hetiang buaina hi hmuh tur a awm fo thin. Tlem lai deuh khan Mumbai khawpui-ah chuan company 62 ngawt mai te chu labour law dan kalha, private security agencies atanga security guard la an nih avangin thubuai awrhtir an ni.




Hyderabad hmuna Mizo Security Guard-te chenna hmun

Human trafficking hi a hlauhawm tel em?
'Globalization' atanga inkalpawhna tha zawk hian kentel a neih mek chu mihring tawlhrukna (Human trafficking) a ni. Kan thenawm ramah, a bikin Manipur leh Nagaland-ah sawi tur a tam hle tawh. Tlem lai deuh khan Naga nula pakhat chu Malaysia rama nawhchizawrhna hmun atanga chhanchhuah a nih kha. Hetiang bawia lut laklawh tawh hi mi eng zat teh meuh nge awm ang le?
Hetiang thil a thlenna chhan bul ber chu ram pawna hna zawn kaihnawih thil a ni. Hna tha tak pek tiamin tlema hriatna nei tlem zawkte bum an ni thin. An hnathawhna tur hmun an hruai thlen meuh chuan mi thenkhatte chu nawhchizawhna hmunah an lo hnuklut lui tawh mai thin a ni. Delhi-ah chuan kan Mizo nulate ngei chu hetiang hian hnuhluh tawh an ni. Tin, tunhnai lawkah khan Mumbai khawpuiah chuan Mizo nula tleirawl paruk zette chu hna tha tiamin Mizoram atangin hruaihlak an ni. An hnathawhna hmun an thlen thlak hnuah an beisei ang an hmu lo a, nawhchizawrhna hmun lamah hnuhluh tumin room chhungah an kalhkhum hmiah a, thil pawi a thlen thui hmain Mumbai Mizo thalai thenkhatin an va chhanchhuak hman hram a ni. Kan fimkhur ava hun teh lul em!
Kan remhriat lohna avang hian mi fate chungah hetiang thil hi a thleng mek a ni. I fate chungah pawh a thleng ve thei tih hi vawi eng zat nge hrilh nawn i ngaih dawn le?


Hyderabad hmuna Manipur zohnahthlak pakhat chetsualna hmun

Mizorama Job Placement Consultant-te hi an rintlak tak zet em?
Mizoramah hian phai lam atangin Job Placement Consultants (an hming sawilang kher ta lo mai ila) an awm ve ta nawk mai. A lo buaipui tur pawhin Mizo ngei an ni ve fur tawh hlawm. Rintlak an awm, rintlak hauh loh pawh an awm tih hre ta phawt ila. Hetah tak mai hian zawhna awm thei leh kan lo chik ngai ta chu; Placement consultancy firm din theihna license / phalna emaw registration fel tak nei an ni em tih te, an nei lo a nih chuan dan a kal a ni thei mai em tih te a ni. Legally correct leh legally incorrect hriat chian hmasak a tul a ni ber mai.
Consultancy firm leh hna hmuh sak ho hian eng contract / inremsiamna nge an neiha, documentation tih a ni thin em? Tih lo ni ta se, an contract / inremsiamna leh an awm dan emaw thawh dan a inmil em? Inmil lo ni ta sela, document proof a awm ngei em?
Tin, hei bakah India ram state dangte hi population hrim hrimah an tam bakah human resource/labour lamah an sang hle a. Hetih laia labour/HR nei tlem zawk tura ngaih Mizoram state-te tak te atanga mihring an duh tan viau mai hi eng nge a chhan ni ber le? Labour tlawm lehzual an umna mai a ni thei ang em?

Mahni Mizo-pui nih vang hian an rinawm kher lo
Ram dang nen khaikhin ralah chuan Mizote chu khawtlangah inunauna tha tak kan la nei a. Mizoram pawn lamah phei chuan, Mizo kan nih tawh phawt chuan kan inchibai nghal lawp lawp a, kan inbe bawrh bawrh a, inhre chiang hauh lo pawhin kan inring nghal em em zel thei mai. A lawmawm rual rualin mahni tanghma hai uchuak leh mahni Mizo-pui bum hreh hauh lo hi kan tam tawh hle tih erawh kan hriat a hun a ni.
Sum hmuh theihna tur a nih dawn phawt chuan, kan Mizo-pui ngeite inchhuih palhna theihna turah pawh chetlak kan hreh meuh tawh lo. |henkhat phei chu nawhchizawrhna hmunah hial kan intir mek a nih hi. Hetiang khawvel tawp taka awm kan nih miau avang hian Mizo nih vang hrim hrima, inrin nghal em em hi a him ber tawh em aw tih hi ngaihtuah tham a ni ta. Mahni Mizo-puite rin loh tur tih lam sawimawina a ni lo, fimkhur a tulzia tarlanna mai a ni e.

Mizo hna zawng chebuai eng zat nge awm?
Tunah hian Mizo zingah harsatna hrang hrang tawk tawh leh tawk mek hi sawi tham fe mai an awm. Tun hma lama harsatna tawktute hian tlawm leh zaha an lak thin avangin an sawichhuak tha duh meuh lo. Mumal taka document fel vek a harsa em em. Tun hnai lawka Hyderabad Mizo buaina nei mekte chanchin mumal zawka document theih beiseiin video camera nen kan va veh a. An remti ngang lo a, an awmna hmun remchang apiang kan cover ta ringawt a. Tin, nikum lam khan Manipur Zohnahthlak unau pakhat security guard thawk mek chu an awmna hmunah chesualin a boral phah hial tawh a. An awmna hmun kan va kal tlawh ni chuan, slum area aia hmun chhe zawkah an lo awm a ni.
Hman deuh lawkah khan Hyderabad hmunah security guard tur an tirhte chu nasa takin an che buai tawh bawk. |henkhat phei chu kutthlak an ni a, phuar hlawm chungin inchhungah kalhkhum an ni. Hyderabad Mizo Association leh MZP hmalaknain Mizo tlawmngaite'n an va chhanchhuak thei hram a ni.
Kar kal ta mai khan Hyderabad hmuna security guard tura Mizoram atanga an rawn tirhthlakte chu an che buai leh mek tawh a ni. A rawn thawnthlatute leh a rawn kalthlate thu a inhmu lo kual vel vek a ni ber mai.
Hriatna tlem hrim hrim hi a pawi lo, mahse sual a hring tel thei tih erawh kan hriat a tul. He thu ziak ka buatsaih lai hian phai ram hmun hrang hrang hruaitute ka han be kual a. Phai lama Mizo Association hrang hrangte hian hman atanga tunhnai thleng chanchin sawi tur hi an lo nei em em vek mai zu nia!
Foreign ram thenkhat Singapore leh Malaysia-ah te pawh Mizo chebuai fe fe an lo awm reng mai. Delhi, Bangalore, Mumbai, Hyderabad Mizote phei chuan tualchhung chanchinbu-ah press release siamin fimkhur a tulzia an rawn tlangaupui nasa hle tawh. Mahse, kan harhchhuah zo lo nge, kan mamawhnain min nawr thlu ngang tih hriatthiam a har hle. Heng incident hi hrechiang duh kan awm a nih chuan phai lam Mizo Association hruaitu hi bepawp chhin teh u le. Sawi tur an nei hnem teh a nia! Heng Mizo hruaitute tihbuai reng pawh hi a inthlahrun awm zozai lo em ni le?

Kan sorkar pawh a fimkhur a ngai?
Kan sorkar pawhin thalai manganna hi a hrethiamin hma nasa takin dap a tum mek a ni. Hetih lai hian kan fimkhur hle a tul. Phai lam atangin Job Placement Consultants nia insawi ten an dawr reng rengin engkim chiang tawpkhawka an hriat chian ngei loh chu rin mai tur a ni lo ang. Tin, kan thalaite an chetsual lohna turin engkim chiang tak leh indelhkilh thlapna (document mamal tak) hmangin contract an lo sign ngei tur a ni. Engemaw a kalsual a nih pawhin document hmanga siamrem lehna chance a awm dawn a ni.
Sorkar department thenkhat hmalakpuinain India ram mai ni lo, foreign ram thlengin lehkha zir tura thawnchhuah kan awm ve nawk tawh. Mahse, beisei ang leh an lo tiam ang hmu zo si lo hi tam tak an awm mek a ni. Institution tha tak sawihmuha, a hmun an thlen hnua institution chhe deuha dah leh si pawh sawi tur an awm. Hetianga tang laklawh tawhte hian a buaipuitu sawisel an hreh leh tawh si thin. Tin, chhungte'n pawisa an sen hnem avanga inthlahrun avanga tui lo tak chunga lehkha zir pawh sawi tur an awm nawk mai.
Mizo thenkhat hna thawk tura phai lama kal, haw leh hreh emaw zak tawh si hna duhawm lo deuh deuh thawh zawm ta an awm leh zel bawk. Heng zawng zawngah hian kan sorkar hian kalphung felfai min zawnpui a hun a ni mai lo maw? Entirnan - Job Placement Consultants-te hi kan sorkar pawmpui thlapte ni thei se.

Hna zawnga kalchhuakte thiam lohna
Hna zawng tura thawn chhuah tawh kutbenga haw leh zawng zawng hi bumna vang an ni kher lem lo tih kan hriat a tul. Consultant-te dem vek tur pawh a ni lo ang. Consultant te'n an tiam ang an puitlina, placement-a an lungawi loh vang emaw an thiam tawk loh avang emawa ban ta mi tam tak an awm ngei mai. Mizo hi kan taima kan ti thin, mahse, hna sang emaw vawi lehkhata hlawk thut theihna tur um ching kan tam em em. Phai rama hna nei thawk tha peih lo, an ban leh tak Mizo ka hmu nual tawh. An ban chhan hi anmahni chuan an insawi thiam em em thin. Hnam dang an nih avanga duhsak an nih thin loh thu te, hrehawm an tih zia hlir a ni mai thin. Zep thu awm suh, kan thatchhiat vang leh Mizorama kan hnathawh dan anga hna thawh kan tum tlat thin vang a ni fo. Hnam dang kan nih avanga min lo duhsak ta lo deuh a nih pawhin, eng nge sawi theih kan neih chuan le? Kan hnathawhna khawtlang mil hna thawh kan zir hma chuan eng kan ang tak tak ngai lovang.
Kan society hrim hrim hi hnam dang kara tlatlum taka khawsa thei nghal tur chuan Mizorama kan inenkawl dan hi kan tihdanglam hmasak a tul. Zorama kan thalai tam takte khawsakzia leh nunphung hi phaia inhlawhfa pangngai ang tur chuan a no lutuk hret thin. A bik takin hna hniam deuha ngaih tan phei chuan kan hlawhchhuah leh an nunphung a inmil thei meuh thin lo. Vai leh Nepali ho khawsak dan hi entawn tlak tak a ni. An inren em em a, an thawh tawhnaah chuan rinawm takin an thawk a, zurui chung leh zelthel takin an thawk lo a, hei hi kan Mizo thalai tam zawk hian kan la tlin meuh lo a ni mai thei. Zelthel taka ti thinte tan chuan chance a awm rei lo hrim hrim mai.
Ram danga hnathawk kan nih pawhin Mizoram khawvel dan hi a hman theih vek tawh loh tih kan hriat a tul. Hman deuh khan Hyderabad security hnathawk te'n khawlaiah ui an lo talh a, an ui talh lah kha ui thlah tha chi a lo ni kher si. An hotute nen an buai ta nghal mai a ni.
Nula thenkhat call centre thawk tura lak, thla hnih khat hnua, thawhpui vai laka rai haw ta mai mai pawh sawi tur eng zat nge awm tawh le? Ram pawna nunphung kan hriatchian hma hi chuan engvangin kan buai leh mai thin loh ang ni? Ram pawna awm dan leh hnathawh dan tur phung hi zir fe ka la ngai a ni. Nunphung pangngai taka nung hlei thei lo tur phei hi chuan, ram pawna hna zawng tura intirh liam mai chi niin a lang ta lo. |hangthar zelte tan harsatna an siam tam mai mai a ni. Ram pawn Mizo khawtlang lu tihai tawk lek, zilh dawna 'ka mimal nun a ni tuma inrawlh theihna a ni lo' ti pang pang, mangang tawp khawka khawtlang hruaitu ruai leh tho si pawh kan awm nawk mai.

Beisei sang, Degree hniam si
Phai lama chebuai zingah a lehkhathiam leh degree sang zawk nei ai chuan, tlema degree nei hniam leh unskilled labour rawn tlan thla te hi an chebuai zual chawk. Heng mite hi chhungkaw dinhmunah chanhai zawk nihna hi thil pawi ber a ni lo, hriatna lamah kan lo pechhe zawk nge nge thin hian humsual min dai tir thin a ni.
Buaina kan tawh tawh hnu hian khawngaih thlak chan an chang zo ve tawh si. Amaherawhchu, Mizoram atanga thil kan lo hriat hi a famkim tawk lo tih erawh i pawm ngam teh ang u. Mi thenkhat mahni qualification leh nihna pawhin a phak reng reng loh beisei lui tlat te pawh kan awm zu nia.
Kan tunlai khawvel kalphungah chuan Mizo pa tawngkama “pianpui degree nei” tih te chu tih mai mai a ni. Mahniin sumdawnna din thei khawpa pawisa kan nei a nih ngawt loh chuan degree puitling tak nei lo tan kawng a kaw meuh tawh lo e. Unskilled labour hna thawk tur tan phei chuan Mizoram tluka hlawh thatna hmun a awm lo. Hlawh tlem tawh nak laiin ram dangah chuan Tax kan pek a la ngai zui nen. Mizoram atangin hlawh zat tur an sawi thin pawh tax pek hnuah chuan a tlem kuar tawh mai thin.
Khawpui lianah phei chuan in luah man (electric bill, Tui bill) hautakzia hi kan hriat a tul. Unkilled labour tan phei chuan accommodation tha lutuk beisei chi a ni lo. Phai lama unkilled labour tam tak pawn an nei miau hlei nem, hengho dinhmun kan tawmpui theih loh avang hian alawm, Mizo tam tak chu an hlawhchham fo thin ni le. Pawisa nei mumal lova, ramdang chhuah phei chu kawng a ping duh teh a nia.
Mahni dinhmun kan hriatchian mai bakah ram dang dinhmun hi chiang zawkin i zir ve teh ang u. Kan mamawhna a inchen hauh lovang, mahse, hna hniam lam zawnga phai rama kal hi a hrisel ber lem lo tih hi i hre ve tawh teh ang u. Hrehawm tawrh te, vai artui zuar anga hnam dang tih duhdahte tuar thiam zel te kan la zir thiam a nih ngawt loh phei chuan, Zoram pawnah hian hna zawn hi intihmuh chi a ni ber em tih hi i inngaihtuah ngun ang u.
Engpawhnise, invenna kawng hi kan ngaihtuah a hun a ni. Hnazawn hi thil pawimawh tawpkhawk a nih avangin kan uluk a tul. Thil hrechiang hmasa zet lova thil bawh rum rum hi kan sim ngei ngei tur a ni. Kan hna zawn hrulah thil tam tak a awm tih kan hriat a tul. Kan hnathawh tur mai ni lo, kan va awmna tur khawtlang ziarang leh an hnathawh dan kalphung thlenga uluk taka kan zir a tul. India ram khawpui lian leh foreign ram thlengin Mizo/Zo hnahthlak khawtlang pawl an awm deuh zel tawh a. Thil chinchang hre lo tan phei chuan kan kal hma ngeiin heng ho hnenah in-report hi a him ber a ni. Mangan hunah kan pur buai leh ziah tho. A hma lamin chanchin inhrilh hi chin thin a tha hle. Nasa zawka fimkhurna chang i hre mawlh tawh teh ang u.

Related Posts :



5 comments:

  1. I am regular visitor, how are you everybody?
    This article posted at this website is genuinely pleasant.


    my weblog :: treatment for toenail fungus

    ReplyDelete
  2. Hi there, You have done a fantastic job. I will certainly digg it and personally recommend
    to my friends. I am sure they'll be benefited from this website.
    engineered hardwood floors

    Here is my web site :: hardwood floor refinishing

    ReplyDelete
  3. I like the helpful information you supply on your articles.

    I'll bookmark your blog and test once more right here frequently. I'm rather
    certain I will learn lots of new stuff proper here!
    Good luck for the following!

    My webpage ... hair treatment

    ReplyDelete
  4. My family members all the time say that I am killing my time here at net, except
    I know I am getting know-how every day by reading thes nice articles or reviews.


    my weblog ... http://www.plutos.org.uk/Architect-firms-in-london/link/16250

    ReplyDelete
  5. An impressive share! I've just forwarded this onto a friend who has been conducting a little research on this. And he in fact ordered me dinner due to the fact that I stumbled upon it for him... lol. So allow me to reword this.... Thank YOU for the meal!! But yeah, thanx for spending time to discuss this subject here on your site.
    galileo

    Also visit my web-site - online insurance companies

    ReplyDelete