¢ Zozam News Service
Zoramah hian inrukbo a thleng tawh thin a, mahse, mi rubo tura hlawh neia chhawr erawh an la awm ngai lo mai thei. Mahse, tun hnaiah hetiang hi a thleng ta tlat mai.
February ni 8, 2009, Pathianni zanah Chiahpuam collector J Malsawma (39) chu Thingsul Tlangnuam-a a lenna in atangin rukbo a ni a, February ni 15 zanah Chiahpuam collector vek Joseph Lalhriatzuala (26), Ramthar Veng-a mi chu an in atangin rukbo a ni ve leh bawk. He thil thleng chungchangah hian police te chuan mi 18 an man tawh a, chu'ng mite inpuanna atang chu ngaihtuah tham tak a ni awm e.
Malsawma rukbo chungchangah police te chuan mi 7 an man phawt a, he thila inhnamhnawih nia hriat mi pakhat erawhin rinhlelh a kai tih hriain anticipatory bail a lo la lawk a ni. Ani hi PWD driver a ni a, Malsawma rukchhuahnaah khan gypsy a khalh niin police te chuan an hria. March ni 8-ah mi pakhat an man belh a, ni 9-ah mi pahnih an man leh bawk.
Malsawma rubotute hi pawl pakhat - UN Council of Mizo leh Weekly Investment Depositors Association hruaitu thenkhat niin police te chuan an ngai a, inthurualin an thawkho niin an ngai a ni.
UN Council of Mizo hi pawl ding thar an ni a, Chiahpuam-a pawisa 'chiahtute' inzawmkhawmna pawl hruaitu thenkhat nen hian indawrin, hma an la ta a ni tih chu tuna police-te ngaihdan a ni.
J Malsawma hian amah rubotute letter head a hmuh thu leh UN Council of Mizo tih a inziah thu te, symbol-ah sakei lu lem an hman thu te police te hnenah a sawi a, CID te'n chuta tang chuan chhui zuiin, an manchhuak ta a ni.
Police te'n an mi duh an mante hi an inpuang tawh a, Chiahpuam-a inhnamhnawih ve hawt si lo te'n Chiahpuam collector an rukbo chhan pawh hre tawhah an inngai.
UN Council of Mizo hruaitu pakhat VL Pekhlua leh Zoramthanga te chu Weekly Investment Depositors Association hruaitute nen an inkawm a, J Malsawma rukchhuah hi an rel ta a ni tih chu police te ngaihdan a ni.
Pekhlua leh Zoramthanga te hi jail-ah te pawh lo tang dun tawh thin an ni a, tichuan, sawm awm midang sawmin J Malsawma chu a lenna in atangin tharum hmangin an hruaichhuak ta a ni.
Pekhlua bak hi Malsawma hruaibotute zingah UN Council of Mizo-a inhmang an awm lo a, Malsawma hnen atanga pawisa an hmuhte chu insem tlan ni se tiin an rel niin a lang.
Malsawma hnen atangin Chiahpuam pawisa an dawng thei a nih chuan Chiahpuam-a pawisa chiah tangtute an pe ang a, tha thawha Malsawma hruaichhuaktute chuan hlawh an nei ve bawk ang tih chu an inrem dan niin police te chuan an sawi. He thil hi UN Council of Mizo hmalakna a ni lo a, amaherawhchu, he pawl hotupa hian mi mangangte tanpuia an pawl thar tihlar nan pawh a duh ve tho niin police te chuan an ngai.
Thil lo langchiang ta chu - hlawh neia mi rubo tura chhawr tur an awm tih hi a ni. Hemi chungchanga Zozam Weekly-in a biakpawh police te pawhin hei hi an pawm.
"Chiahpuam-a pawisa dah ve hauh lo te'n Chiahpuam collector an rubo a, hei hian chhan a nei ang tih chu a chiang mai a, a chhan chu kan hrechhuak ta a ni. Hlawh neiin he thil hi an ti a ni," police office pakhat chuan a ti.
Hun engemaw chen police hna lo thawk tawh thenkhat chu hemi chungchangah hian kawm an ni a, hetianga hlawh neia mi rubo hi Mizoramah an la hriat ngai loh thu an sawi vek.
Joseph-a rukbo chungchangah pawh hetiang tho hi thil awm dan a nih hmel. Chiahpuam vanga mangang mi pahnihte ruahman niin police te chuan an hria a, chumite chuan a tha thawh turin midang an ruai ta niin a lang.
Mizoramah hian hlawh neia kawng hrang hranga chhawr tur hrim hrim an awm a, mi rubo tura chhawr tur erawh tun hmain an awm ngai lo niin a lang.
Mizoramah hian thil tisual thang hian an tisual nawn tlangpui a, CID lam pawhin thil pawi a thlen changin jail tang thang deuhte an mitmei nghal vat thin. Chuti a nih chuan thil tisualtute hian hrem an nih pawhin an sim lem lo tihna a ni thei ang a, chu'ng mite chu mipui tan an hnawksak thei viau dawn a ni. Malsawma rukbonaa a meizang hlaptute pawh police te chuan jail lamah te pawh lo tang tlang tawh thin an ni tih an man hmain an hre chat thei a nih kha. Chutiang mite tan chuan hlawh neia pawikhawih hi thil rapthlak a tling hauh lo ang!
Thursday, March 12, 2009
Zoramah 'hire' theih suamhmang
Subscribe to:
Post Comments (Atom)
Thil ti sual chu mi zawng2 deuhthaw kan ni zawk alawm, a thlarau zong kher ni lovin a khawvel lam zong pohin.
ReplyDeleteJail tang lo tamtak hi chu an thilsual tih manchhuah loh vang leh jail tanna chhan em a tlin loh vang mai2 a ni zawk.
Man chhuah a hrem a tih mualpho hian an sim teuh lo.
A mantu leh timualphotu ten mahni tan mangkhawng an kam a ni ringawt zok alawm le. A extreme deuh chin ho kha chu an rilruah an vei rauh2 reng mai dawn asin. Tun atanga nakin deuhah chuan inthahna te hi ala tam ngawt ang ti nia.
Phurh!