Nun hlui ngaihawm loh

Rev C Lianhmingthanga

Mizoram buai kum 1966-ah khan January thla a\angin Bungkawn Middle School-ah Headmaster hna ka chelh ve a. Tluang taka sikul kan kal laiin March ni 1-ah kan ram buai a in\an ta mai. March ni 3 thlengin Sikul chu kan kal zel a, chumi ni-ah chuan, chawhma dar 11:30 velah ral a\angin mi pakhat hian min rawn au a, "Middle School ho kha bang tawh rawh u, dar 12 a\angin Curfew a ni e," tiin.



Curfew awmzia hi PU-a kan Poetry zir pakhatah pawn chhuah phal lohna thupek a nih ka lo hre hlauh a, naupangho chu mahni in lam pana a hmanhmawh thei ang bera tlan haw turin kan hrilh ta a ni.
Dar 12 rik nan darkar chanve chauh a awm tawh tihah chuan kan tlan darh ta a, Khatla kawnah te chuan mi hmuh tur an vang tawh hle. A lo reh ruai tawh.
Theihtawpa chakin ka kal a, ka hmanhmawh bawk a, Mission Vengthlang-a kan in chu dar 12-ah ka thleng hman chiah. Khatianga chak khan ka kal leh ngai tawh lo!
MNF sipaite leh India sipaite chu an inkap dur dur mai; Tuikhuahtlangah MNF lamin \an an khawh a, keini veng lam chu a ralmuang lo hle.
Nunau tan Aizawl chu khawsak ngamna chi a ni ta lo a, an tlanchhe ta chum chum mai. Ka chhung pawh ka pa hovin Hlimen lamah an kal a, ka u - C Lalmawia chu a veivak ve \hin a, keiin in ka lo nghak \hin thung.
Ka rilruah trench laih \ula hriatna ka nei ta thut a, kan kawmthlangah ka lai ta a ni.
Chawl miah lovin ka lai ta a, ka koki thleng vel chu, a lei a \ha bawk a, ka lai ta thuai a.
Ni khat chu, ka chhang chiah C Lalramthanga nen kan awm dun laiin thlawhnain Aizawl a rawn kap a, hei hi March ni 5 emaw, ni 6 emaw a ni ang. Khatla kawn phei vel chu a kang mam hle tawh a, Mission Vengthlang lamah pawh silai mu chu a lo tla thla ve chu a ni.
Ka khur laiah chuan kan unauvin kan tawm ta ran mai a, mahse, chu pawh a him ta lo. Kan tawmna kotlangah chuan silai mu a rawn tla a, leivung dur te chu khurah chuan a lo lut ta hiau hiau mai. Kan hlau chu kan zuang chhuak vat a, pal kan zuankhum a, a sang vak lo bawk a! Sakhisih lui lamah kan tlan thla ta a ni.
Silai mu dang pawh Mission Vengthlang tlangah a lo tla a, Pu Lalzuiliana (L) pawhin (a malpui vel a ni mai thei) hliam a tuar.
In chu veng bawk mah ila, zanah chuan Sakhisih lui kamah kan riak a, midang pawh an riak ve bawk. Kan mu tlem \hin hle.
He lui kamah hian ka u C Lalmawia nen chuan kan khawsa ve ta deuh ber a, kan in chu kan han tlawh leh bawk \hin a. Ka nau C Lalramthanga erawh chu Pu Hualkunga te rualin Reiek lamah a tlanchhe ve a ni.
Hun engemaw chen chutia kan khawsak naw naw hnuah chuan, ka nu leh pa te leh naupangte kan ngaihtuah avangin Kulikawn lamah anmahni zawng turin kan phei ta a (u Lalmawia nen), midang tlanchhia pawh an awm nual.
Kulikawn khamphei (Ngaizel kham tawntirh) kan thlen lai takin thlawhna chuan Tuikhuahtlang chu a kap leh ta. Pu Sanghmingthanga (pilot) pawh kan zingah hetih lai hian a awm ve.
Pu Sanga chuan thlawhna her vel dan chu a'n ngaihtuah a, Kulikawn pawh 'bomb' dawnin a ring thut mai. Inhnuaiah min tlanpui hlawm a, mahse hemi \um hi chuan Kulikawn chu a kap ta lo.
Tuikhuahtlang an beih zawhah chuan a tlai ta bawk a, thlawhna chu a haw ta a ni. Hei hi a ni zat tak ka hre thei ta lo.
Nunau thlabar dan leh mipui mangan dan kha, a hmu pha tan chuan theihnghilh theih a nih ka ring lo.

Related Posts :