Nu Te Rothapin Min Phur

¢ HC Vanlalruata

MHIP hruaitute huatthu lovah hmeichhe tam ber hi thin phu hma te mai nia ka hriat avangin an motor khalhah pawh hian ka chuang tha ngam meuh lo thin a. Chuti a nih lai chuan thlawhtheihna chuan huaisen tak ni lem lo ka ni leh nghal a. India chhim lama piang tih hriat tak nu lian lo ve tak maiin kan chuanna tur thlawhtheihna tereuhte chu a khalh dawn a ni tih han hriat chuan ngaih a ngam lutuk fahran lo. A khalhtunu sirah Wing Commander atanga pension tawh khawpa jet fighter te pawh lo khalh tawh thin thu ve bawk mahse, ani hi a thil hriat leh thiam a tharlam vak tawh awm bawk si lova, thla muang lutuk lo chuan February ni 28 khan Lengpui Airport-a thlawhna lem tiat lek passenger 9 chuan theihna Cessna Caravan 208B thlawhnaah chuan kan han lut ta poh a.



Mahse, rin ang a lo ni lo. ‘Vayadoot thlawhna’ kan tih mai thin Dornier 228-a chuan ka sim ang ngawt kha a lo ni hranpa lova, rin ai takin a tet ngaihtuahin boruakah a nghet fu a, mahse, boruak che vel nasa (air turbulence) erawh chu Airbus te ang chuan a ngamlo tih zep rual a ni lo. A khalhtunu hian a hneh a, motor chikim khalh thiam takin Maruti 800 an han phekphelen vel hi ang ka ti ber.
Aizawl khawpui leh a chhehvel kan hel kual a. Aizawl khawpui chungah hian khatihlaia Air Marshal rawn cham lai a nih vang kha ni maw helicopter a lo thlawk kual ve a, feet 8,000 velah kan thlawk a. Duh angin kan thlawk hniam lo chungin mahni hriat than veng leh in pawh a lang chiang tha khawp mai - New Capital Complex-a kan chenna (office-cum-residence) leh thenawmte inte bakah Mualpui-a kan leipui-a kan thlam chenin ka hmu zu nia!

Chung lam atanga khaw thlir tur hrim hrima chuang (joy ride) kan ni bawk a. Rin aiin rilru-ah thil tam tak a lo lut a. Kan kawngpui neihte a mam lova, duhthu a samlo tih chu kan hre pha ve chungin leh kawngpui pawh kan la ngah tawklo tih hre chungin rinai takin inkalpawhna kawng a lo tam tawh a. A rin hian a inrin chik nuk a ni ve mai e. Sorkar hnathawh hi lang ve tak chu a lo ni. Minute 40 vel chiah kan thlawh hnu-ah nalh fahranin Lengpui Airport-ah bawk kan tum leh a. Pilot-in min tumpui dan chu a awlsam hmel khawpa. A thlawhna a te-in a khalhtu thutna ka hnaih bawk a, keini duang pawhin khalha tum ve theih mai awm a mawi a ni kan ti rum rum a lawm. ZOZAM hotupa TK-a pawh a chuang ve reng naa, a thlawh lai khan a thin a phu nasa lutuka ziah tur a bo zo ta nge ziak zawk turin min han pem buhbel ta tlat a, ka’n ziak ta a nih hi.

A that riauna
He thlawhna hi a te ren rawn naa US siam a nihna a lang a. Engine pakhat chauh hmang a ni chungin a thla (wing) hi a hlai zek a. A khalhtu Capt. Sobha K. Mani chuan engine pakhat chauh nei a nih avangin a khawl a chhiata a thih palh pawhin glider ang hian a tum thei tho tih min hrilh. Chubakah computerised a ni a. A thlaah khan a hmaa khaw chin a hre thei a, thli natna emaw boruak che na deuh emaw a awm chuan pilot thutna hmaa computer screen-ah a rawn hriattir a, pilot chuan a hel thei mai a ni.
US Dollar maktaduai 2 leh nuai 5 man vel lek a lo ni a. America ramah chuan chhungkaw awmthei deuh chuan an chhungkaw pualin an kawl nual a ni awm e. Chubakah chuan dak phur i ti mai ang, bungrua leh thil dang dang phurtu Federal Express khuan 50 thelh an nei a. Courier service hna thawhna atan hmangin ‘Cargo service’ an khawih pui a. United Nations pawhin ram chhengchhia leh thlawhna pangngai thlawh hleihtheih lohnaa mi harsa leh tanpui ngaite ei tur chhawpna berah a lo hmang thin bawk.

A te naa a chak a nia
Kan hriat angin Aizawl leh Kolkata inkara thlawhna thlawk thin-ah hian a lianah chauh ruang a phurh theih a. A chhan chu a te chi ATR hi chu mihring chauh phur tura phalna nei a nih vang a ni. ATR ai chuan te zawk mahse Cessna Caravan hi chu ruang/kuang phurh phalna pek a ni a. Michuang (passenger) thutna hi la chhuak thenin kuang an dah mai a, mitthi chhungte’n an chuan pui thei nghal a. Chutiang atan chuan ‘hire’ mai theih a ni. Damlo thu kang theilo pawh a zawnna (stretcher) kha thuthleng thenkhat lasawnin an dah leh mai a. A enkawltu doctor, nurse leh chhungkhat lainate nen a awlsam takin a thlawhpui theih mai. Hire-na man (charter cost) hi darkar khatah Rs 50,000 a ni.
Charter loh pawhin kalna bik neiin an kal thova. Tunah chuan Imphal, Agartala leh Silchar an kal ber a. Shillong te leh hmarchhak khawpui dang bakah thlawhna service dangin a tlawh pawh loh pawh la daidar chhoh zel an tum thu Capt. Mani chuan min hrilh a. Aizawl atanga Lunglei, Saiha leh Champhai kal theih chu nise an tan a that bakah hmun kilkhawr zawka awmte tan a tangkai a rin thu a sawi a. Chu chu Pu J. Lalhmingliana pawhin a ‘Amen’ pui hle-in ka hria a. Heng khuaahte hian thlawhna tumhmun lian lo leh man tlawm te a siam theih thuai a beiseiawm thu a sawi bawk. Tun dinhmunah chuan Imphal leh Agartala te hi chuan man mi pakhatah Rs 3,500/- a ni a, Silchar chu Rs 2,500/- chauh a ni. Mahni kawtkaia tum mai thei phei chu ni se thenkhat chuan Vairengte Excise check-gate leh kawng dunga SRS/JAC thlawh khuma zu phurh chhoh mai an chak ang tih hlauhawm zawk a ni.

Nu rothap chu
He nu, Capt. Sobha K. Mani hi nu namai lo zet a lo ni a. An thlawhna service tir mek hi a hmingah “North East Shuttles an vuah a; chuta Managing Director chu a ni a. A thawhpui pa chu Nepal rama kum 28 vel zet hmun kilkhawr leh harsa ber bera lo thlawka rawsawt lo thlak tawh thin ‘Capt. Nepali’ tia kan koh mai, mahse Bengali pachal ni daih si - Phizo Nath a ni.
Hmeichhia a ni si a, kum han inzawh thu awm suh. A chanchin ka hriat theih chinah chuan kum 1989-91 chhung khan Andhra Pradesh Flying Club atangin thlawhna khalh a zir a. Kum 1992 khan thiam leh zual tumin United States pa pan a. Hetah hian thlawhna khalhah a specialist theihna turin ‘Commercial Instrument and Multi-engine a zir leh a, kum 1995 thleng khan a chamchilh a ni. A cham lai hian US-a private airlines-ah a thawk kual nual a. Nation’s Bank-ah a thawk lawp lawp bawk.
Kum 2000 khan Nepal ramah lutin Capt. Nath nen hian an thawk dun tan a. Kum 8 zet a awm a. Chumi hnu-ah kum 2008 khan US atangin he a thlawhna chuam hi rawn keng chhovin Lengpui Airport-ah thuthmun a rawn rem tan ta a ni.
A thlawk thui a sin
Amah Capt. Mani min hrilh dan chuan India hmarchhakah hetiang thlawhna te chi hi a tangkai riau dawna hria-in sorkar thuneitute a dawr thin a. Kum 2007 khan phalna a la ta a. Tichuan hmarchhak mil tur ngeia a ngaih Cessna Caravan 208B chu kum 2008 September thla khan US atangin a rawn chaw chhuak ta a ni.
He thlawhna hi a tet avang leh a tui (Aviation Turbine Fuel - ATF) a phurh tam theih loh avangin ama pualin a phurhna an siam belh sak a. Chuti chung pawh chuan Atlantic tuifinriat chu han thlawh khum rual a la nih si loh avangin a kual zawngin India ram a rawn pan ta a ni.
Amah chauhva US ram laihawl Kansas state-a Wichita khua atanga rawn thlawk chhuak tanin Canada rama Thunderbay Canyon-ah a tum a. Chumi hmun atang chuan Canada ram tho, tunhma atanga Red Indian ho tun thlenga an la chenna hmun Iqulait khuaah a tum a. He khua hi Hudson Bay-a awm a ni. Chuta tang chuan kan Kristian Hlabu-a “Greenland vur ram atangin....” kan tih thin Greenland-ah a tum a, a dawt leha a tumna chu vur ram tho Iceland a ni.
Helai hmun atang hian a vawt lutuklo deuh, Scotch Whisky siamna hmunpui Scotland khawpui Glasgow-ah a rawn tum leh a. Chuta tang chuan Brussels khawpui Luxemburg-ah a pakai a. Mediterranean tuipui-a thliarkar tereuh te, hmingthang zet si Malta-ah tumin Aigupta ram kan tih mai (Egypt) khawpui pakhat Luxor-ah a rawn pakai leh a. Bahrain leh Oman ram-ah te rawn chawl kualin Ahmedabad-ah a rawn tum a, chumi hmun atang chuan India khawpui ber Delhi-a Indira Gandhi International Airport-ah rawn tumin Lengpui thlengin a rawn vung chho ta zel a ni.
Min hrilh dan chuan a kal hun chhung hi ni 8 a ni a, kalkawngah zan 7 a rawn riak a. Thlawhna a khalh hun chhung a rei si a, a ninawm a tih thu leh a mut pawh a chhuah thin thu a sawi a. A thlawhna apiangah thlawhna tumhmun tina Air Traffic Control Tower (thlawhna khalhtute lo kaihruaia lo buaipuitu) te nena inbiak reng a ngaih avang erawh chuan sangha rep ang kara a mit a men renga tul thin thu a sawi. “Ka ning lutuk chuan candy (chocolate) ka ei tam phah khawp mai,” tiin ha hipin min hrilh a. ATC bak biak tur an awm loh avang erawh chuan a zin chhung zawngin nghavawk hram ang maiin a ngawi tluanchhuak deuh thaw a ni.
Khawvel pum a hel chhuah tep hnu-a Mahatma Gandhi pianna state Gujarat khawpui ber Ahmedabad-a a rawn tum chuan pilot pakhat, palian ang reng tak hian a lo chiau-au-va. Chutianga hmeichhia-ah pawh nu tereuh-te in khuti chen chen atanga thlawhna a rawn khalh chu fello a lo ti em em ni tur a ni a. Director General, Civil Aviation hnenah tha a tihloh thu ziakin a thlen hial a ni awm e.
Tichuan DGCA hnen atanga kum 2007-a phalna an lo lak tawh angin nikum kum tawp lam atang khan Lengpui Airport-ah an inkulh ta a. An thlawhna chu taxi ang maia hman theih turin an chhawp chhuak a. A tul chuan a dang pawh zuk lak leh zel mai an tum thu an sawi a ni.
Mizoram chu nuam sing khaw: Capt. Nath nen hian an thawk dun tha hle a. Capt. Nath hi Royal Nepal Airlines-a Chief Captain hna chelha Boeing 757 lo khalh chul thak tawh a ni a. Nepal-a an thawh dan amah Capt. Mani sawi i lo ngaithla teh ang:
“Nepal rama kan thawh dan chu a hautak fu a, Himalaya tlangdung nena inzawm khawvela hmun chhengchhia leh boruak awm dan tur pawh sawilawk harsat ber berna hmun hi a ni hlawm a. United Nations Food Programme hnuaiah motor emaw, sakawr tak ngial emaw pawha tlawh pawh hleihtheih lohte awmnaah buhfai leh eitur dang kan pe thin. Chuta kan thlawhna hman chu tunhmaa India hmarchhaka an hman lar tak Dornier 228 kha a ni.
“Kan tum thinna pakhat chu Simikot a ni a, feet 9,500 a sang a ni a, Lukla pawh feet 9,000 a sang a ni. Heng thlawhna tumhmun hi a runway a tawi em em a. Chubakah Air Traffic Control Tower te chu sawiloh pilot lo kaihruaitu ang chi reng reng hi a awm lova. Mi pakhat hi chu a lo thu ve thin a, kan tum dawna bawng emaw ran dang emaw runway-a an lo luh palha hnawttu atan chuan a tangkai ve tho mai. Mit lawngin kan en a, kan tum tawp mai thin a ni. Nepal rama kan thawhna hmun ngaihtuah chuan Lengpui Airport leh Mizoram te, India hmarchhak rama tum theihna hmunte hi chu a dang lam lutuk-a picnic ang lek a ni,” zu ti reuh a.
He nu hi Kristian a ni a, Catholic Kohhran mi a ni a, Pathianni-ah tul zual bik lovah chuan Sairang-a Ctholic Biak Inah a inkhawm ber a. Imphal lama an tangkhang tum erawh chuan Imphal-a Don Bosco Biak Inah a inkhawm thin.
Hetiang, NE Shuttles company-in a tih theih ang hi Mizoram leh thenawm state dang, boruak lama intlawhpawhna nei thalo tan chuan a tangkai hle turah Wing Commander Hminga chuan a ngai a. Entirna’n Agartala khawpui-ah vawiin hian NEC Khawmpui awm dawn sela, Lengpui-Kolkata kal phawt a, Kolkata a riah hnu-a a tuka Agartala luh ang chi te ai chuan he thlawhnaah hian Governor, CM leh official pawimawhte kha an kal mai ang a. NEC khawmpui hi ni khat chauh a nih phei chuan an inghahtir anga tlaiah an lo thlawk haw leh dial mai dawn a ni, Pu Hminga chuan a ti.

Related Posts :