Friday, March 6, 2009

Israel-ah pawh Mizo tih danin

¢ Zozam News Service

Juda hnambo nia an inhriat avangin Israel ramah Mizo engemaw zat an pem a, mi sang chuang fe an ni ve tawh. Ram hla takah khawsa mah se Israel rama Mizote hian Mizo zia an paih lo hle a, chhiat ni that ni-ah pawh an intawiawm tha thin hle.



January ni 11-ah khan Zalman Hnamte chu Bet-El khuaah a thi a, he vanduainaah hian Israel rama Mizote an intawiawm tha hle. Tin, a ram mite pawh lusun chhungte chungah an tha hle niin Mizote chuan an sawi a, thihna hi an ngai urhsun hle niin an sawi bawk.
"Israel te'n mitthi chhungte an ngaih pawimawhzia leh an insunpui nasatzia a taka ka hmuh hian mak ka ti a. Ni dangah chuan thlanmualah te, tin, in lamah pawh va ral ang chauhin ka kal ve thin a, ka chamchilh ngai loh avangin ka lo hre chiang lo hle a lo ni. Mizote chauh hi emaw inbuaipui ka lo ti thin; chhun zan zawma ka va awm takah chuan thil thar ka va chhar a ni deuh ber ang chu. Anmahni hman remchan dang ang zelin chhun, tlai, zan thlengin nula, nu leh pa an lo kal diah diah a, an rawn thu a, an tawrhpui tih hriat tak hmel pu hian ei tur tuihnai chi tin reng an rawn khai/keng bawk a. Rei mawi tawk an thut hnuah a dang an lo kal zel a, he huna lo kal inlengte hian kan chin thin nuihza han siama nuih dur dur ang chi kha chu an ti ve lo. A chang phei chuan an sitting room-ah pawh kan len loh chang a awm thin," tiin Mizo-Juda pakhat chuan Pu Zalman-a thihna chungchanga a thil hmuh hi Zozam Weekly a hrilh.
Zalman Hnamte hi kum 75 mi a ni a, 2001-ah Israel-ah an pem a ni. An awmna khua - Bet-El hi 'Bethel' kan tih thin hi a ni a, Jerusalem bul lawka mi a ni.
He rama cheng Mizote chuan Israel mite hian chhiat ni that ni an ngai pawimawh hle niin an sawi a, lusun chhung te phei chu an buaipui uluk hle thin niin an sawi.
Mizo-Juda te sawi dan chuan, in lamah mi an thih chuan mitthi chhungte khan Magen David (ambulance) an chah a, a phone-na number chu 101 a ni. Magen David chu a rang thei ang berin first aid thuam famkim nen, oxygen etc nen lam doctor leh nurse te nen an thawkchhuak nghal a, chu mite chuan an theih tawp chhuaha tanpuiin, damdawi in lam an pan pui nghal ta thin a ni.
Tichuan a chhan theih tawh ngang loh a nih chuan 'a thi e' tiin an 'confirm' a, chumi hnuah mitthi buaipuitu deptt.-ah an hlan thin. Anni chuan ruang chu an lo bual a, a tul tul an lo tifel vek thin. Chutih lai chuan mahni awmna khuaa sakhaw hotu lam - Rabbi te'n a phum dan tur leh a hun leh hmun an lo ruat fel a, tichuan an phum chauh thin.
Damdawi in-a dam lo awmsa a thi a nih erawh chuan damdawi in lam khan an tih tur an tih zawh hnuah mitthi buaipuitu deptt-ah an hlan thin.
"Mitthi vuinaa thlan tlenga kal hi tih makmawha ngaih a ni tlangpui a, kha lama 'thlanmualah chuan kal lo mai teh ang' kan tih thin ang kha chu an ching lo khawp mai. A vuinaa kal te hi chuan thlanmual an thleng deuh vekin ka hria, rokhawlhna bik riau nei te an nih lem loh chuan," Mizo-Juda pakhat chuan a ti.
Mitthi an vuiliam hnuah chuan ni 7 chhung an insun leh a, hei hi an ngai urhsun hle a ni awm e.
"Mitthi chhungte, a nu leh pa, a fate, unaute kha mitthi sun zual hun chhung ni 7 chhung chuan thutna nuam sofa-ah te thu lovin chhuatah dunlop te an phah a, an thu char char thin. Zan mut leh zunram thiar chhung vel tih loh chu pawn pawh an chhuak ngai lo. Hna engmah an thawk lo a, ni 7 chhung hian inbual, intihfai engmah an ti ngai lo. An thawmhnaw pawh an thlak ngai lo. An chhungkaw hre chiang vak lo, ngai pawimawha leng tan pawh a lusun chhungte bik kha chu hai rual a ni lo a, an hriat hliah hliah mai a ni," Mizo-Juda pakhat chuan a ti.
"Ni 7, a sun hun chhunga Sabbath a lo tlak erawh chuan Sabath ni ropui hmuak tur leh lawm turin an inbualin an silhfen te an thlak chauh thung thin. Ni sarih a zawh erawh chuan hrehawm taka an thut hmun atangin an tho a, hna te pawh an thawk thei tawh a, engkim a pangngai leh tawh," a ti bawk.
"Ni 7 chhung hian mahni awmna hmuna Israeli sakhawmiho an tha em em a, ei leh in tur chi hrang hrang leh juice lam chi hrang hrang te kengin lusun chhungte inah an kal diah diah zel a, tin, chawhmeh siamsa inpek an uar hle bawk. Eitur a tam thei khawp mai. Hemi ni 7 chhung hian sakhaw rawngbawltu Rabbi chi hrang hrangte leh Tora thiam te'n mitthi chhungte chu an tlawh a, Pathian thu an insawi chhawk char char thin. |henawm khawveng an tha em em vek bawk," tiin Mizo-Juda pakhat chuan Zozam Weekly a hrilh.
A tlangpuiin ni 30 hnu-ah lung an phun thin. Mitthi chhungte hi kum khat chhung chu intihhlimna lamah an kal ngai lo a, inneihnaah pawh an kal ngai lo.
"A tlangpuiin thih ni atanga ni 30-ah lung an phun tlangpui a, kum khat chhunga phun ngei hi an tih dan a ni bawk. Hemi ni pawh hian thlanmualah hunserh neih a ni a, Rabbi te'n an kaihhruai thin. In lamah ruai an buatsaih thin bawk. Vui ni, ni sarih tawpna ni leh lungphun ni hi an ngai pawimawh em em a, thenrual tha leh chhungkhat laina hnaite chu he hun pawimawh zual pathumah hian an intawiawm tlat thin," tiin Mizo pakhat chuan a sawi a ni.
Tarlan tawh angin Mizo te chhiat ni that ni-ah hian an intawiawm tha hle a, veng hla deuh pawh ni se vuinaah a tam thei ang ber an kal thin. Tin, ni 7 chhung hian Mizo inral danin an inral thin bawk.
"Mizoram lama kan tih anga ruang intlaivar pui ang chi kha chu a awm ve lo a nih hi. Bible-a a lan ang khan a sun zual zawh ni sarih hnuah chuan inthen na a awm thin. In leh engkim uluk taka tihfai vek a ni, hmanlai kan Mizo pi pute pawhina an tih thin ang kha, a ni sarih tawpna ni-ah hian thlanmualah hunserh uluk taka neih a ni thin. He hunah pawh hian Rabbi-in an ho ngei ngei a, Mizote mahni awmna hmun theuh atangin he hun ngai pawimawh hian engemaw zat kan fuankhawm thin a, lusun chhungte'n thlanmuala han ei mai tur thil an buatsaih bakah in lamah chawhlui tuihnai tak an buatsaih thin bawk," Mizo pakhat chuan a ti.
"Ruang intlaivar pui ang chi kha chu a awm ve lo. Mitthi ruang hi inchhungah an dah ngai lo hrim hrim," Mizo dang pakhat chuan a ti ve bawk.
Zalman Hnamte vuinaa tel Mizo-Juda pakhat chuan: "Zing, chhun leh zanah Rabbi-te leh mithiam dangte'n Pathian thu tha tak tak an sawi kan ngaithla reng bawk a, ropui ka ti khawp mai. He ni 7 chhunga inleng lo kalte hi lusun chhungte'n 'polite' taka kawngka thleng thlenga va thlah ang chi kha a an ti ve lo bawk. Lusun chhungte atang hian inleng te'n engmah an phut lo bawk. A zangkhai phianin ka hria. Inlengho rawn kenluh kha ei duh chuan eia, in duh chuan in mai tur a ni," tiin Zozam Weekly a hrilh.
Juda hnambo nia inhria, Mizoram atanga Israel rama pem hi 1000 chuang an ni tawh a, Mizoram atanga pem aiin Manipur atanga pem Mizo an tam zawk. 2000 chuang fe an tling tihna a ni.
Mizoram atanga pem hmasa berte hi nula leh tlangval paruk an ni a, 1989-ah an pem a ni.

Related Posts :



1 comment:

  1. Side la deuh dâ chunga chhiar a ngai a ni maw? :)) A tha dawn khawp e.

    ReplyDelete