Monday, August 9, 2010

SORKAR RAM REN LO

¢ HC Vanlalruata

Chief Minister Pu Lal Thanhawla hian a sorkar hmasak lai khan sorkar ram Kohhran hnena pek chungchanga mi sawiselna chhangin, “Kan Kohhran hruaitu Pastor-te an lokal a, Biak In sakna’n sorkar ram min rawn dil a. Han phalloh hleih theih a ni lo. ‘Leilung leh a chhunga thil awm zawng zawng hi LALPA ta a ni,’ an rawn tih chuan kan pe leh mai thin a lawm,” a ti a ni. A awm khawp mai, a thuneitu vote duh bawk si tan chuan.

Sorkar ram mimal emaw pawl emaw kohhran hnenah emaw pek a nih hian a pawi ka lo ti thin a. Mipui sorkar kan neih avangin mipui vantlang mamawhna tak takah chuan sorkar ram pek hi a awmlo pawh ka ti lo. Mahse, kan pek dan tlangpui-ah hi chuan sorkarin a hman aia tangkailo zawkah a chhuak fo in ka hria. Hman deuh khan Police Officer pakhat KTP-ah pawh inhmang tak thin chu a inkhawm duh ta tlat lo mai a, a chhan ka zawh chuan, “Kan Police ram hi Biak In hmun an duhthawh avangin Kohhranin an rawn nek a, ka inkhawm duh tawhlo a ni,” tiin min chhang a. Kohhran meuh pawh hi a duham lutuk fo niin ka hria.

Hmun tinah hian mimal leh pawl-in sorkar ram an nek (encroach) hi a awm ni maiin ka hria a. Hmun thenkhatah phei chuan sorkar hriat mang lohva tu-in emaw sorkar department ram an lo neih tak ngawt maite pawh kan hre fo mai. Doctor pakhatin a sawi dan phei chuan khaw hrang hranga Health Department ramte hi mimal emaw pawlin emaw an nek deuh vek a ni.

Tunah hian Dawrpui khawtlang duhdan angin kan khawpui bera kan Damdawiin, Mizoram hmun dang tan chuan kan ‘Referral Hospital’ neih chhun chu sah hek tum a ni ta a. Dawrpui khawtlang hruaitute sawi danah hi chuan Damdawiin awmna venga awm an nih avanga an hah ziate, a hmunhma hi chawlh hahdamna leh hawi thawvenna atana hmun tha a nih avanga cheibawl an duh dante hi an sawi awm ang thiam khawp mai. Mahse, veng pakhat duhdan anga a kal chuan Mizoram pumin kan tuar ngei dawn a ni tih hi ka ngaihdan a ni.

Hospital kalphungah chuan Emergency Department (Casualty) a duty doctor-te’n damlo lokal an enin an thiam bak a pelha rikrum thila koh tur ‘Doctor On Call’ an awm thin a. Chumi bakah chuan hnathawk dang pawh rikrum thila koh ngaihna a awm thin. Casualty bakah pawh Ward-a awm damlo-te enkawl tura hmanhmawh thila doctor leh nurse emaw thawktu dang emaw koh ngai a awm thin bawk. Chutiang doctor leh thawktu dangte chu Damdawiin hung chhunga an awm chuan rang taka koh theih an nih thin avangin nunna hlu tak an chhan thei fo thin reng a ni.

Mahse, hetianga Damdawiin hnathawk, hmanhmawh leh rikrum thila koh turte chenna in thiata thil danga hman a nih dawn chuan nunna kan chan fo dawn tih i hre lawk i la. Chu chu a mawh an phurh ngam dawn phawt chuan Dawrpui khawtlang hian an thil tum hi kaltlang pui sela, Mizoram puma mipuiin an dem huai huai a nih pawhin an vun a tihchhah hle a ngai dawn a ni. A chhan chu tuna ruahman ang hi chuan Hospital hnathawkte chenna in sakna tur a awm thei dawn lova. Hmun hla taka an awm koh a ngai ang a. Lirthei hmanga an lam a nih pawhin hmun leh hmuna awm chilh ang chuan a rang thei dawn tawh lova. Hun a pawimawh si avangin hnathawkte thlen tlai avanga chhan hman loh an awm fo thei ngei ngei dawn a ni. Chu chu kan sorkar leh sorkar kartu Dawrpui khawtlang hian an ngai ngam tak tak dawn a nih chuan thutlukna siam a ni tawh bawka an kaltlangpui mai a ni ang chu...kaltlangpui an tum ruh bawk a.

Sawi tawh angin hmun tam takah sorkar ram sahthlak emaw mimal leh pawl hnenah pek a lo ni tawh thin a. Mahse, sorkarin a enkawl lai aia tangkailo zawkin a chhuiak deuh ziah tih hi a chiang a. Chuvangin sorkar ram humhalh tur hian a neitu sorkar pawhin a ngaihtuahna a sen that a tul ang. Inthlan dawna vote duh vanga a nghawng chhe tur hre changlo leka thutiam thin pawh hi kan sim ngei a tul ang.

Related Posts :



No comments:

Post a Comment