Sex vangin AIDS kan vei!

Kumin June thlaa thisen test mi 3,277 atangin 113 chu HIV positive an ni tih hmuhchhuah a ni a, mi 113 zingah hian mipat hmeichhiatna atanga kai an tam ber.

June thlaa HIV positive hmuh thar zingah mi 76 chu mipat hmeichhiatna atanga kai an ni a, mipa 41 leh hmeichhia 35 a ni. Inchiu-na hriau (IDU) atanga kai mi 32 an awm a, mipa 26 leh hmeichhia 6 an ni.

Mahni nute atanga kai naute 2 an awm a, mipa leh hmeichhia pakhat ve ve an ni. Kaina chhan hriat loh mi 3- mipa 2 leh hmeichhia 1 an awm.

Kumin January atanga June, thla 6 chhunga thisen test mi 17,888 atangin HIV positive hmuh thar hi 632 an awm a, hei hi thisen test atanga chhutin za zelah 3.45 a ni.

Mizoram State AIDS Control Society chhinchhiah danin October 1990 atangin Mizoram-ah thisen test tawh zawng zawng chu mi 1,12,438 an ni a, chu'ng zinga 4721 chu HIV positive an ni tih hmuhchhuah a ni.

AIDS vei 462 awmin AIDS kaihhnawiha thi mi 171 an awm tawh bawk. A kum zawnga chhutin kum 25-34 inkar zingah kaithar an tam ber a, mi 113 kaithar zingah he age group-a mi hi 49 an awm.

Kum 35-49 inkara mite'n dawtin mi 34 an awm. Kum 15-24 inkarah mi 28 kaithar an awm a, kum 14 hnuailamah mi 2 kaithar an awm bawk.

July ni 24-ah khan Zoram Entu Pawl (ZEP) leh Catholic Relief Services tangdunin ZEP Conference Hall, Upper Khatla-ah Kohhran hrang hrang hruaitute leh tlawmngai pawl lian hruaitute pualin HIV/AIDS chungchanga hmalak zel dan tur sawihona hun an buatsaih a, ZEP director Rev Fr S Lawrence Kennedy chuan tunhmaa inchiuna hriau inhmantawm atanga HIV kai an tam ber thin laiin, tunah chuan mipat hmeichhiatna atanga kai an tam ta ber tawh tih a sawi.

"Kum 15-35 inkarah HIV kai an tam a, kum 15 emaw, hemi tlin hma emawa mipat hmeichhiatna hmang kan awm tawh tih hi chiang takin a lang a ni," a ti.

"MSACS leh NGO ten awareness programme an bei nasa a, naupang te pawhin HIV/AIDS chungchang hi an hre viau a, awareness-a kan thlen chin a san laiin HIV positive hi kan pung zel si a, kohhranho leh tlawmngai pawl te'n tan lak a, hma thar lak dan tur pawh kan ngaituah a tul hle a ni," a ti bawk.

Resource person Dr RL Sanghluna chuan HIV/AIDS veite chungchanga kohhran-in a zirchhuah thar tur sawiin, inthliarna/inmihranna awm thin chu thiah a tul thu a sawi. Hemi hawi zawnga hmalak dan tur hi a sawipui a ni.

Zoram Entu Pawl hian HIV/AIDS veite bakah, rualbanlo te, thingtlang lama mi harsa zawkte Self Help Group hmanga khaichhuah te, mipa leh hmeichhe intluktlanna te, thalai lehkha zirsang thei lo tana eizawnna tlak thiamna pek te bakah, kohhran hmasawnna atana thawh te chu an hmalakna a ni.

HIV/AIDS bikah hian Catholic Relief Services nen tangkawpin HIV positive te tan clinic an siamsak a. Tunah hian HIV positive naupang 45 te an theih ang anga enkawlna an pek bakah, HIV+naupang dangte leh an nu leh pa te HIV+ an nih avanga harsatna nei naupang 41 te tan school kal man an tumsak bawk.

Related Posts :