Ngaihsak hlawh lo miretheite in

¢ PB Lalrammawia

Cheng vaibelchhe 34.33 senna tur, Lawipu, Aizawla mirethei chhungkaw 408 chenna tur in sak mek chu contractor Mesnia Enterprises chuan a hnuaia thawk sub contractor-te sum a pekchhuah that loh avangin thawktu tam zawk chuan an chawlhsan tawh.


Thudawn danin Mesnia Enterprises hian a ruaitu- Hindustan Prefab Ltd. (implementing agency) hnen atangin cheng vaibelchhe 7 vel chu an dawng tawh a, tuna a hmuna thawk mek sub-contractor-te kuta a thehchhuah chu cheng vaibelchhe 3.5 vel a ni.

"A tira kan inremna ang chuan Mesnia Enterprises hotute chuan kan thawh dan a zirin pawisa hi pek min tiam a. Mahse, kan thawk a, an sawi angin pawisa min pe leh si lo a. Tunah hian mahni sum kan hmang a, harsa takin cheng nuai 15 chu kan seng ral tawh. Anni hnen atanga kan hmuh chu cheng nuai 11 vel chauh a la ni a, kan hna hi cheng nuai 53 vel man a ni," tiin a thawkte chuan an sawi.

"Sub contractor tam zawk chuan running bill an lak theih loh avangin hna hi an chawlhsan tawh a, hetiang a nih chuan zawh hun tur hi sawi theih a ni lo," thudawn pakhat chuan a ti.

He project hi kum 2008 October-a tan a ni a, thla 15 chhunga zawh fel tura tih ni mah se tunah hian 30% pawh zawh a la ni lo.

Tuilakna leh electrification lam pawh engmah survey takngial pawh neih a la ni lo niin thudawn chuan a sawi.

"Nodal department lamah leh minister hnenah pawh kan thlen tawh a. UD&PA minister chuan hetianga contractor lamin thil an kalpui dawn a nih chuan central atanga instalment dang kan hmuh leh hunah direct-in kan pe ang che u, tiin min hnem a, kan thla a muang deuh a, mahse instalment hmuh hun tur hi hriat a ni si lo," tiin sub-contractor chuan a sawi.

"Mi hausa concern, entir nan Millennium Centre ang chi te kha chu ni se, hetiang hian a awm ka ring lo. Mirethei concern thil hi chuan ngaihsak a hlawh lo," Sub-contractor pakhat chuan a ti.

"Harsatna kan neihna hi HPL lam ni lovin, Mesnia Enterprises lam hi an ni mah zawk," a ti bawk.

"Contractor lam chuan Mizoram sorkarin matching share a pek loh avanga pawisa pe thei lo nia an insawi laiin, sorkarin matching share a pek tawh hnuah pawh harsatna a kiam chuang lo," tiin sub contractor pakhat chuan a sawi a ni.

Mirethei chenna tur hi sorkar laipui Ministry of Housing & Urban Poverty Alleviation hnuaia JNNURM kaltlanga Basic Services to the Urban Poor (BSUP) scheme hnuaia buaipui a ni. Aizawlah chuan Chite leh Lawipu-ah project hi hman tura tih a nih laiin Chite-ah hmun remchang a awm loh avangin Lawipu-ah hian project pahnih hi dah a ni ta a ni.

In sak hna thawktu, implementing agency hi Hindustan Prefab Ltd, (A Govt of India Enterprise) Jangpura, New Delhi-a mite an ni a, hemi hnuaiah hian contractor M/S Mesnia Enterprises chuan a thawk a ni. Mizoram sorkar hnuaia Urban Development and Poverty Alleviation chu Nodal Agency a ni.

Mirethei in sak mek hi a vaiin block 25.5 a ni a, block khat hi chhawng li zel niin chhawng khatah chhungkaw 4 zel an awm ang a, block tinah chhungkaw 16 an awm thei dawn a ni.

Chhungkaw pakhat awmna tur hi a dung feet 18, a vang feet 15 a ni a, bathroom chhungkhung tur a ni. Tunah hian building construction chiah khawih a la ni a, power supply leh water supply bakah infrastructure dang khawih a la ni lo.

Hetiang bawka Chite-a mirethei chenna in chhungkaw 200 awm theihna sak tura ruahman tawh chu tih danglam niin Lawipu-ah hian sawn a ni a, hei hi cheng vaibelchhe 13 vel senga sak tura ruahman a ni.

Related Posts :