Lakchhawnna

Chester Carlson-a chuan a rilru luah rengtu chu khawl siam chhuah dan tur chu a ngaihtuah chhuak ta hlawl mai.

Amah hi dan hre mi a ni a, mahni kutchhuak dan hmanga a neitu nihna hauh duhten an ruai thin a, amah ruaituten an thilsiam chhuah dan a lem nena chipchiar taka a an ziahte chu uluk takin a lo endik thin a. Chungte chu a inang chiaha ziahchhawn a harsat zia leh an beih nasat zia a hriatpui a, a vei hle a ni. Chutianga lehkha a thil lem leh thuziakte a ngai ang chiah a awlsam taka lakchhawnna khawl chu awm se tiin a ngaihtuah fo thin a. Mahse, chutiang khawl chu siamchhuah tum leh tuipuitu a awm lem si lo a, amah ngei chuan siamchhuah tumin a bei ta a ni.

Kum sawmpanga chhung zet a beih hnuah hman tlak leh hralh tlak a siamchhuak ta hlawl mai a. Hralh tlak a siam hma hian New York a sam leh hmai cheina dawr hnunga pindan luah te reuh te a luah hawhah chuan a hmanraw nei chhun chhun hmang chuan kum sawm lai a lo bei tawh a ni. Chutianga a beih fe hnu a kum nga a lo vei leh chuan zawrh tlak a siamchhuak ta reng mai. A lawm kher mai.

Carlson-a'n hman theih tura khawl a siam zawh fel ni tak chu October 22,1938 kha a ni a. Chu khawl hmanga lehkhaziak a ang chiaha an lakchhawn (copy) chu "10-22-38 ASTORIA" tih hi a ni. Chu khawl chu electric hmang a ni a, a thuziahna atan chuan rawng dip a hmang a ni.

Mahse, beisei angin thil a kal ta lo tawp mai a. A tangkai a rin vang leh miin an mamawh a rin avanga kum tam tak chhung a lo beih hnu a, harsa taka a siamchhuah tak khawl chu hralh thei ta hlek lo mai a. A vahvaipui titih der mai. Sumdawnna atana duh tura a rin te a dawr kual zel a, company 20 aia tlem loin an lo hnar a. Mahse, kum 1944 khan thilsiam chhuaktu pakhat Battelle Memorial Institute of Columbus, Ohio state a mi chuan chu khawl siamchhuahna atan chuan sum an sihchhuah thei ta hlauh mai a. Tichuan a hma a khawlin thuziak a lakchhawn hmasak ber ni atanga kum sawm vei chiah October 22,1948 khan Detroit khawpuiah Chester Carlson-a chuan zawrhchhuah turin a pholang ta a ni.

Chu khawl danglam tak, company sawmhnih chuangin an hnawl hnu chu 'XEROX copy machine' ti a hriatlar a ni ta a, 'Photocopier' tih a ni bawk.

(Copy cat tih lehlin a ni - Lalthlamuana Ralte)

Related Posts :