Vawi 6 Final Luh Hnuah Vawi 2 Champion Thei Armed Veng

¢ Hmingsanga

Central YMA Platinum Jubilee Inter Branch YMA Football Tournament-a record nei tha ber Armed Veng chu 2-0-a chakin final vawi ruk an luh hnuah a vawi hnihna atan champion an ni ta.

Final-a chak zo ta lo Chaltlang pawh hi record nei tha tak an ni a, final vawi thum an lut tawh a, a vawi khatna atan final-ah an chak lo. Final hi kum dnag ang bawkin inkhel hmuhnawm tak tia sawi tur a ni lem lo. Player-te an hah deuh vang pawh a ni ngei ang.

Champion team ni ta Armed Veng hian pawisa fai Rs 70000 leh dekchi leh trophy an hawn a, chak zo ta lo Chaltlang hian pawisa fai Rs 50000, dekchi leh trophy an hawn.

Final-ah hian man of the match atan Lalnghilhlova, Armed Veng chu thlan a ni a, top scorer chu Vanlalfaka a ni a, ani pawh hi Armed Veng-a mi a ni. Top scorer Vanlalfaka hian goal 4 a thun a, goal thun tam ber hi quater final atang chauha teh a ni.

Platinum Jubilee lawmna- Inter Branch YMA Football Tournament 2010-ah hian team tel an thahnem hle a, kuminah hian beisei phak baka chetha engemaw zat an awm.Chung zingah chuan kum danga hming lang ngai lo- vFalkawn leh Ramhun N te hi a langsar pawl an ni ngei ang. Record nei tha ber pawla sawi theih tur Electric Veng te chu semi final-ah tie breaker hmanga chak zawk zawnah a vanduai zawkah an tang hlauh a nih kha. Final hial pawh lo thleng tawh thin, Ramthar Veng first round ah an tla a, Republic Veng beiseina sang tak nen uihawm takin an tla a, College Veng an hmingthat thin nen an thlen san hnuah an tla hlauh bawk a. An uihawm hlawm viau a ni.

Inter Branch YMA Football record hlui i'n thlir thuak thuak teh ang.

1985: Tunlaia World Cup final round khel thei ram zat chiah YMA Tournament khelh hmasak ber tum hian Branch 32 an tel. Match 52 khelh a ni a, goal 226 lai a lut. Goal heti zah lutah hian F Lalchhandama, Jersey No 14, Armed Veng chuan goal 14 thunin Top Scorer a ni.

Central YMA Football tournament hmasa berah hian Armed Veng leh Vaivakawn te chu final-ah intumin Armed Veng chuan an khingpui Vaivakawn chu 6-3-a hnehin Central YMA Football tournament a Champion hmasa ber an ni.

1987: Tournamnet hmasa aiin team tel an tam hret a, team 48 lai an tel. Tournament hmasa ber aiin goal lut a tlem zawk a, goal 198 a lut. Hemi kum hian veng inthenawm Electric Veng leh Ramthar Veng te chuan final an lut a. Electric Veng chuan 2-1-in Ramthar Veng an hneh. Electric Veng chu a vawikhatna atan an champion ve leh ta. Hemi tum hian Lalringliana, Chaltlang chu goal 10 thunin Top Scorer a ni.

1988: Chaltlang leh Armed Veng te final-ah an intum leh a, 2-1-in Chaltlang hi chakin anni pawh a tum khatna atan Champion thar an ni ve leh.

Hemi tum hian team 47 telin goal 219 lai a lut. Armed Veng jersey No 10 |ialthawnga chuan goal 12 thunin Top Scorer a ni. Chaltlang lamah TPa, Ringa, Laldina, Thara te ho kha an combination thatzia kha aw! Armed Veng lamah Papuia, Chhuanawma, Tialthawnga te kha an va fuh hlawm em!

1989: Football tournament vawi 4-na chu 1989 khan khelh chhunzawm leh a ni. Hemi kum hian team 49 an tel a, goal 224 lai a lut. Hemi kum hian veng inthenawm pahnih, tunlai chu ni se Aizawl East I derby tih ve mai theih turin Electric Veng leh Chanmari ten final an khel a, vanneihthlak takin Electric Veng chu 2-1-in an chak. Electric Veng te hian tournament vawi hnihna, 1988-a champion hnu-ah ‘89 khan an champion leh. An champion hmasak ber kum a players te deuh vek kha hemi kum pawh hian an rawn hmang leh a ni. Hemi kum hian goal 13 thuntu Lalrinsanga, Venghlui chu Top Scorer a ni.

1990: 1990 khan a vawi 5-na khelh leh a ni. Mipui pawhin kan hlut tial tial a, kum hmasa aiin team pawh an tel hnem, team 68 lai an tel tawh a ni. Hemi kum hian Aizawl chhuahlam ngawt ten final an khelh thin chu an la na deuh pawh a ni mahna, Aizawl tlak lam atangin Dinthar chuan final a rawn thleng nawlh mai. An khingpuite erawh chhuahlam tho Chanmari an ni. Kum hmasa lama margin ngai chiahin 2-1-in Dinthar chu a vawi khatna atan an champion ve leh a ni. Chanmari te hi vawi hnih ngawt final a kum zawna an luhna a ni a, a vanduai zawkah an tang ve ve a ni. F.Laltanpuia (TPA) Chaltlang chuan goal 11 thun in top scorer a ni ve leh.

1995: Kum nga zet CYMA chuan Football tournament a buatsaih tawh loh hnu-ah a buatsaih leh hmasakna a ni a, kan lo rawp viau nge ni hemi kum hian team 77 ngawt an tel.

Hemi kum hian Chaltlang chuan final an vawi hnih luhna niin final-a an khingpui Armed Veng pawh an vawi hnihna tho a ni. Final-a goal lut zat 2-1-a zawna vawi nga a nihna chiah a ni bawk.

Chaltlang chu a vannei zawkah tangin a vawi hnihna atan an champion ve leh a. Hemi kum hian CYMA Football tournament-a la awm ngai lo tun thleng pawh a la thleng chhunzawm leh ta rih lo thil a thleng tlat. Tialthawnga chu a tum hnihna atan Top scorer a ni leh a, kum 1988 khan top scorer a lo ni tawh bawk. 1990 khan goal 12 thunin top scorer a ni leh. Ama record ang hi nei an la awm leh lo.

1998: Kum thum lai YMA-in tournament a buatsaih loh hnuah neih chhunzawm leh a ni. Team 78 an tel a, goal 394 a lut a, a vawi thumna atan Electric Veng chu final an lut leh a, an khingpui Armed Veng te pawh an vawi thumna a ni ve leh chiah bawk.

Hemi kum hi final-ah tie breaker hmanga a chak zawk zawn a nih hmasak ber a ni a, hun pangaiah 1- 1-in an inhnehtawk a, tie breaker-ah 7-6-in Electric Veng hi an vannei ta zawk a, Electric Veng te hi vawi thum an champion-na chiah a ni. An star player Benjamin Zonunsiama chuan goal 10 thunin top scorer a ni.

2000: Kum zabi thar kan chuangkai a, 2000-ah pawh khelh chhunzawm leh a ni a, hemi kum hi chuan Aizawl West Derby tih ve mai tura mawiin Aizawl tlaklam ve ve te'n final an vawi khat khelhna a ni a, 2-1-in Zotlang chuan Vaivakawn hnehin a vawi khatna atan an champion.

Hmingthasanga, Zemabawk N chuan goal 6 thunin top scorer a ni a, ani hi top scorer ni tawh zingah goal khung tlem ber a la ni.

2002: 2001 awlin World Cup khelh 2002-ah khelh a ni ve leh. Team 98 an tel a, goal 357 lutin final chu East versus West ti mai ila, Dinthar leh Bethlehem Vengthlang te'n an khel ve leh. Dinthar hi vawi hnih final an luhna a nih mai bakah vawi hnih an champion-na ni turin 2-0-in an khingpui Bethlehem Vengthlang te chu an hneh. Bethlehem Vengthlang te erawh final an vawi khat luhna a ni.

Liantluanga, Zotlang chuan goal 6 thuin top scorer a ni ve leh a, ani hi Hmingthasanga Zemabawk N nen top scorer ah rau rau pawh goal thun tlem ber an ni.

2003: 2003-ah chuan team 101 an tel tawh. Hemi kum hian rin loh takin College Veng chuan a vawi khatna atan final an lut a, final-a an khingpui Armed Veng te hi an vawi lina a ni. Armed Veng hi 1-0-a chakin final vawi li an luhnaah an champion vawi hnihna a ni a, final-a goal la luh tlem ber tum a ni zui bawk. H Lalremruata, Venghlui chuan goal 8 score-in top scorer a ni.

2004: CYMA Football-a team tel tam ber tum niin team 148 lai an tel. Goal pawh a lut hnem khawp mai goal 625 lai a lut. Ramthar Veng te chuan, "Lalpan thil ropui min tih sak e," tih hla hmangin an player-te final thlengin an au phur. Armed Veng hi final vawi nga an luhna a ni.
A vawi hnihna atan final ah tie breaker hmangin a chak zawk zawn a ni leh a, hun pangngaiah 1-1-a inhneh tawkin tie breaker-ah 3-1-in Ramthar Veng te hi an chak ta zawk a ni.
An champion hian an vengah tisa lam mai ni lo thlarau lam nun thlengin rah tha a chhuah a, zaithiam Robert Lalduhzuala te pawh hemi kum hian love song atangin Pathian fakna hla sa turin a inserh a nih kha. Kha kha an veng an champ vang a ni mai thei! Hemi kum hian Jimmy Lalawmpuia, Armed Veng chuan goal 13 score-in top scorer a ni.

2005: Hemi kum hian team 144 an tel a, match 143 khelh a ni a, goal 487 a lut a, Republic leh Armed Veng South te final-ah intumin Republic chuan 1 - 0 a chakin a vawikhatna atan champion an ni a, Goal 8 thuntu Jimmy Lalawmpuia chu Top scorer a ni.

2006: Team 130 telin match 129 khelh a nih a, goal 457 lutna tournament a ni. Hemi tum hian a vawi khatna atan khawpui pawn Branch-in YMA Football champion no mawi an chawi. Lengpui-in final-a an khingpui Durtlang chu 2-1-a hnehin champion an ni.

2007: Team 124 an tel a, match 123 an khel a, goal 436 a lut. Hmeichhe volleyball-a record nei tha tak Kanan veng chuan football-ah hming an cher a, final-a an khingpui Durtlang chu 2-0-a hnehin a vawi khatna atan an champion a ni. Hemi tum hian VL Thlanga, goal 6 thuntu chu top scorer a ni.

2008: Ramhlun South chuan final-ah 2005 champion team Republic Veng an hmachhawn a, final vawi khat luhna leh vawi khat champion lo ni tawhte inkhel hi a hmuhnawm hle. Ramhlun South chu 2-1-a chakin a vawi khatna atan champion an ni. Hemi kum hian team 112 telin match 107 khelh a ni a, goal 354 lutin, champion team-a mi goal 5 khungtu Zico Zoremsanga chu top scorer a ni.

Related Posts :