Dai Ngai Loh Ram Dai Zel Tumtu Debbie

Fakna hla satu zinga hriat hlawh ber pakhat, Debbie chu a lar vanglai takin Pathian kohna chhangin Missionary-in a chhuak a, MA a zirlaiin All India Inter Varsity Solo competition-ah pawh lawmman pakhatna lo dawng tawh ngat khat Bangalore-ah missionary hna thawkin a awm ta a ni.

Ropuina leh chawimawina zawng zawngte chu hnawlin Pathian hre ngai lote hnena rawngbawl turin a inpe a, Missionary Training Centre-ah an intat hriam te te a, chumi hnuah Mizoram Synod tirhin Bangalore lamah a rawngbawlna hna thawk turin tirh a ni.

Bangalore-ah chuan Kerygma Urban Youth Ministry hnuaiah a thawk a, he rawngbawlna hian a huap a zau a, Bangalore khawpui chhunga thalaite leh Corporate world-a mite hnenah chanchin tha hrilin rawngbawlna hna an thawk deuh ber.

Ruihlo ngaite enkawlna hmunah te rawng an bawl a, ruihhlu ngaite chu Lalpa ke bula hruai an nih theihna turin Adventure Sports leh Gospel camping, Special Functions te an buatsaihsak thin.

Praise and Worship Team te dinin Bangalore leh a chhehvela biak in hrang hrangah hun an hmang thin bawk.

Mamawhtu an awm a nih phawt chuan zanlai leh laklawh an sawi lo, a mamawhtute hnenah Pathian hmingin an fehchhuak thin. Chutianga rawngbawl thin, Debbie chuan hetiang hian Zozam Weekly zawhnate a chhang:

Missionary tura i inbuatsaih lai leh tun dinhmuna i danglamna eng nge?
Inbuatsaih lai chuan Lalpa Kohna avanga phurna leh Ama hruaina ka hmaa lo awm turte nghakhlel leh huphuruh chung siin ka awm thin a, tunah chuan rawngbawlna tak tak "Thlarau Indona" hmunah kan lut a, ka inbuatsaih lai aia nasa lehzual zawkin Lalpa ropuina leh thiltihtheihna a takin ka hmu nasa hle.

Hmalam pana rinnaa ke pen zel turin Lalpan min buatsaih nasa lehzual, ka hriat ngai loh thil tam tak min zirtirna kawngah hian hriat belh leh zel chakna min pe a min tichak lehzual niin ka hria.

Zaithiam lar i ni a, i rawngbawlna hmunah zai hmangin rawng i bawl thei em?
Zaia rawngbawlna hun a tam ve khop mai; 'youth ministry' a nihnaah hian thalaite hip thei tur chuan zai lam (concert) te kan hmang nasa a, tin, tun hnai lawkah khan South-Asia Youth Conference, Nepal-a kan neihah thalai 250 vel, Bangladesh, Pakistan, Burma leh South-Asia hmun hrang hrang atangin an lo kalkhawm a, zaia rawngbawl theihna hun tha tak Lalpan min hawnsak a, ka lawm khawp mai .

Missionary thlirna atangin Mizoram Kristiante dinhmun i hmuh dan?
Kan Kristian dana tha ka tih rual rualin Mizo thalaite zingah leh chhungkuaah hian tanlak chu a ngai khawpin ka hria.

Coffee House Ministry, tuna ka thawhna ang chite hi engtikah emaw chuan kan neih ve theih ngei ka beisei. Khawvel a changkang telh telh a, kan thalaite hi Pathian thu nena kan umzui ve tak tak a ngai niin ka hria a. Pathian thu tak hi taksa, rilru leh thlarau damna a nihzia hi hei aia nasa hian kan la puanchhuah theih ka ring.

I rawngbawlna kawngah engin nge tichak thin che?
Rawngbawlnaa chak loh chang a lo awm te hian ka nu leh ka pa leh min hmangaihtute tawngtaina hian min tichak ber thin a, tin, rawngbawlnaah hrim hrim chuan Thlarau Thianghlim thiltihtheihna a taka ka hmuh fo thin te hian min tichak nasa hle thin bawk.

Rawngbawlna kawngah han beidawn deuh chang te i nei em?
Nei thin e, a chang chuan keimah hian Pathian hnathawhna tur te hi Ama tana ka thahnemngaih lutuk avang hian ka lo dal fo thin a. A zawng zawnga Lalpa tana kan inpek tawh chuan keimahni lampang a ni thei tawh lo a, Pathian a hmasa ber a, a dawtah midangte, a tawpah keimah. Hmanrua mai ka nihzia hi ni tin ka zir thar zel thin.

Beidawnna piah chiahah hian beiseina leh hnehna min hmuhtir thin avangin, ka tan chuan beidawn chang ka neih thin te hi Lalpa zarah a hlu ka ti khawp mai.

I rawngbawlna avanga hlawkna i chhar eng nge?
Kan rawngbawlnaah hian midangte kan tanpui emaw ka tih rualin mahni lamah hlawkna tam tak ka chhar nasa hle a. A hma chuan mi zakzum leh midangte biak hreh tak ka ni thin a, tunah chuan mi ka hmuh hian an nun chhungril hriatchian ka chak em em thin. Lalpa avang chuan "engkim" kan lo ti thei thin a ni tih te a takin ka hmu a, a ropui ka ti.

Missionary hna i thawh chhunga i rilru khawihtu hriatreng bik i nei em?
Zu leh drugs addict leh sex addict te leh buaina chi hrang hrang tawkte kan buaipui ve thin a. Nula pakhat, a naupan laia a pa hrawnin kawng chi hrang hranga a lo tihduhdah thin chu counseling kan pe thin a, kum hnih vel kan inkawm hnuah Isua Krista hmingin a pahrawn chu a bia a, a ngaidam tih a hrilh a, chumi hnu-ah chuan nun pangngai takin a nung ta a, a ropui khawp mai. Hetiang hi mi tam tak an awm a, taksa, rilru leh thlarau damna Lalpaah an chang thin.

Mizo thalaite hian engtiangin nge zau zawka rawng an bawl theih ang?
|halaite hian tunlai khawvela thil thleng chu kan hre deuh vek ang, mahse engkim mai hi a bul atangin hriat tum thin ila. Kan thiante kan bul maia kan hmuh thinte pawh hian buaina tam tak a rukin an lo nei thin a, tun ai hian nasa lehzual zawkin kan rilru leh ngaihtuahna hi midangte tan seng thei ila.

Pathian thu bakah, a taka kan in ngaih pawimawhna kan tih lan hian, a dawt leh, Pathian thu-a intanpui hi a lo awlsam tawh thin a, hetiang lamah hian kan ngaihtuahna sengin a takin che ngam thin ila chuan hma kan sawn ka ring. Tin, misual kan tih te pawh an nun han hriatchian tak tak chuan mi khawngaihthlak tak tak an lo ni thin. Midangte hrechiang turin hun pe nasa lehzual thei ila Lalpa ropuina a lan nasat lehzual ka beisei.

'Ka dai zel dawn' tih hla khan engtiang in nge i nunah thu a sawi?
'Ka Dai Zel Dawn' tih hla kha tun thleng hian ka la zir mek zel a, ka damchhungin ka zir zel dawn a nih ka ring, min ti huaisenin Lalpa tana ding ngam turin min cho thar a, min tichak thin.

Related Posts :