Monday, June 21, 2010

Sualna a pung?

Nikum January-May chhung aiin kumin January-May chhungin Mizoramah crime rate zaa 25.55-in a sang a, rukruk leh MLTP Act case chu a pun tamna chhan langsar a ni.

June ni 11-ah khan Mizoram Police hotute'n crime review meeting an nei a, DIG (Northern Range) L Hrangnawna hoin Mizoram puma District SP, CO leh Unit hrang hranga SP te an tel. 2009 January-May inkara Mizoram chhunga pawikhawihna thleng, case ziahluh leh kumin January-May inkara case ziahluh te khaikhinin an sawiho a ni.

Mizoram puma district 8-ah case ziahluh zat (January-May) thlirho a ni a, nikum chhung khan case 1,307 ziahluh niin IPC-ah 975 leh non-IPC-ah 332 a ni. Case ziahluhah hian Aizawl District chu sang berin case 741 (IPC 540 & non IPC 201) ziahluh a ni a, Serchhip District chu hniam berin case 34 (IPC 31 & non IPC 3) ziahluh a ni.

2009 January-May chhungin case 1,041 (IPC 837 & non IPC 204) ziahluh a ni a, 2010 January-May chhungin case 1,307 (IPC 975 & non IPC 332) ziahluh a ni. Nikum aia kumina crime punna chu case 266 (138 IPC & Non IPC) niin 25.55% a ni.

2009 January-March 2009 leh 2010 January-May crime rate punna chu 49. 42% a nih laiin 2009 January-May 2009 leh 2010 January-May crime punna chu 25.55% chauh niin 23.87% in a tlahniam a, January - March 2009/10 aiin January - May 2009/10 ah a hniam zawk tih he crime review meeting-ah hian tarlan a ni.

Nikum aia kumina crime rate pun chhan leh a tam dan indawt te chu - Rukruk, MLTP Act, Assam Drugd Control Act, In rawk, ND & PS Act leh motor chetsualna te a ni.

Ruk ruk case ziahluh zinga tam ber chu gas cylinder leh mobile handset ruk a ni. Gas cylinder leh mobile handset ruk ringawt hi Aizawl Thana Pui ringawt pawhin chawhrualin nitin 5 nei ang an nih thu an lo sawi tawh a ni.

Bungraw hrang hrang, a bikin gas cylinder leh mobile handset-a case a tamna chhan hi mi thil ruksa man tlawm zawka leisak hreh lo an tam vang nia an hriat thu police hotute chuan an sawi a, mi thil ruksa lo leisaktu hi IPC section 411 hmanga hrem theih niin, kum 3 thleng jail tan theihna leh pawisa chawi theihna a ni tih police thuchhuah chuan a tarlang.

Hetianga mi thil ruk lo leisaktute chungah hian police te pawhin dan anga thubuai siamsak zel turin tan an la mek tih an sawi bawk.

DIG (NR) L Hrangnawn chuan District SP, Commandant leh Unit hrang hranga SP te chu thawhhona leh inlungrualna tha tak vawngnung zel tur leh discipline tha kenkawhna kawngah leh crime lo pung zel tur venna kawngah tan la lehzual turin a fuih a ni.

Hetia crime rate a pung hi thlir dan hrang hrangin a thlir theih ang; police officer thenkhat chuan police hnena complaint/FIR lut apiang, chhungkaw thil thlenga an ziahluh vangin Mizoramah crime rate a sang thin niin an sawi thin a, India ram state hrang hrangte chuan suahsualna lian tham deuh chin chauh an ziaklut thin niin an sawi. Amaherawhchu, crime rate tisangtu hi rukruk leh MLTP Act te a ni a, MLTP Act-in bawhchhiat a hlawhzia ngaihtuah chuan, zu khapna dan bawhchhiatna zinga a then a zar chauh police te chuan an hma niin a lang. Rukruk pawh a hluarzia chu tlang hriat a ni a, thil bo chungchangah hian a tuartute'n police te hnena an thlen loh a tam hle ang tih pawh a rin theih. Rukruk-ah pawh gas cylinder leh mobile phone handset bote chu crime rate tisangtu a ni a, he'ng thil bo-ah hian police te hnena report loh a tam zawk hialin a rinawm.

Ngaihdan dang pawh a tam thei ang a, political party lam ngaihdan tur erawh a chiang sa; MNF an sorkar lai chuan police te'n silai leh ralthuam lam thil an man changin tuna sorkarna siamtu party hian 'state ralmuangah hetiang man tur a awm reng mai hi law and order lekkawhna kawnga kan sorkar hlawhchhamzia tarlangtu a ni' ti hawi zawngin thuchhuah an siam thin a, hetia sorkarna an siam tak hnu-ah erawh 'kan sorkar chak takin police te a thuam tha a, police te kut phuar phelh a ni a...' tiin sorkar an fak thung ang. Chumi ep zawng chiah chuan MNF-in thu an chhuah ve thung ang. Chutiang vel chu an ni e!

Related Posts :



No comments:

Post a Comment