MIPUI ZAH LO!

¢ HC Vanlalruata

Hei pui! An ti leh ta!! Hmanni lawkah kan tuialhthei lakluhna ber Ramnagar-a a thlen loh zawk hun leh Manipur lama a to zawka hralhtute’n an phurh chhoh chiam avangin kan buai hrep a. Kan ziaawm dawn e tih lai mekin All Mizoram Petroleum Dealers Association (AMPDA) chuan sorkarin duh ang tawka petrol leh diesel pek chhuah a khap avangin an dawr (filling station) an khar leh ta ngawt a. Mipuiin namen lovin kan tuar leh ta a ni. Pa pakhat savawmin a seh ngun lutuka an khawmite’n “Savawm chewing-gum” tiin an vuah tawp an tih ang mai kan ni - Mizoram mipuite hi. Political party leh pawl theihna nei deuh tawh phawt chuan mipui hi min sawp rethei reng mai a nih hi.

Sorkar mutthluk rei deuh avangin kan tuialhthei tam tak helama riltam em em thenawm state lamah a liam hnem deuhva, a neitu zawkin kan chhuanchham phah a nih kha. Ni e, filling station neitute hi sumdawng an ni a, a tam thei ang ber hralh kha an duh tur a ni. Mahse, an sumdawnna chhan Mizoram mipui dinhmun erawh an ngaih pawimawh tel a ngai thung. Manipur leh thenawm state an buaia tuialhthei an mamawh loh lai pawha an hralh rengna Mizorama lirthei neitute hmakhua ngailo leka reilote chhunga hlawk chiam an tum chuan a dik bik hauh lovang.

A thuhrimin sorkar laka lungawilohna nei apiangin mipui harsatna siam zawnga thil an ti ziah mai hi mipui zahlohna dik tak a ni a. An chin tam luat chuan a la pawi ang. Hmanni lawkah Taxi hovin intlanchhawk an duhloh avangin mipui min nawrh khum a, an tlan duh lova. Mipui harsatna belhchhah tur liau liauvin City Bus an han nuar ve ngawt tawh bawk a. A thu leh hla chuan lo thlawp sela a la hriatthiam awm a, chuti mai ni lova mipui harsatna namenlo siam ngei dawn tih inhre chunga an han tlan lo ngat kha chu kha aia mipui zah lohna a awm theiin ka ring lo. India ram khawpui dangah chuan han ti ve dek teh se, bus engzatnge mipui thinrimin an hal ang tih ngaihtuah tham a ni. Heti zawnga Mizo mipuite kan che ve ngailo hi a lawmawm a, mahse, mipui dawhtheihna hi eng chen nge tih finfiah zui fo loh a fuh zawk ang. Chuti lo chu kan taxi, bus leh filling station tam tak hi phairama an tih angin a kang teuh mai tur a nia.

Hei bakah hian Mizorama political party leh pawl hrang hrangte hian sorkar laipui emaw state sorkar laka lungawilohna an neihin an lungawilohna an lan tir dan hi mipui harsatna siam zawng hlir a la ni mai ka ti. An lung tiawilo-tu tana harsatna siam lovin mipui tawrhna tur zawngin thil an ti a. Bandh huaihawt leh kawngpui dan chah tih ang chi hian sorkar ngeng a chhun mai thei e, mahse, a taka tuar nghaltu chu mipui kan ni. Mipui tawrhna thlen tur hian ram leh hnam khawih tak ‘issue’ a nih pawhin a man chuang lo. Mipui tawrhna thlen lo zawnga lungawilohna lan tir dan kan zawn thiam a tul tawh a ni.

Eng party emaw eng pawl emaw pawh nise tun anga mipui zah pahlo tak leh mipui tawrhna thlen zawnga thil tih hi kan chhunzawm zel chuan mipui thinrim kan la tawng bua anga ti nia. Mipui hi kan zah ber tur an ni a, an hnathawhna atana khawlhkham siamte, an tawrhna tur, ei leh bar leh thil dang dang an tlakchham theihna tur zawnga thil an tih fo chuan mipui hi an la er ngei ang tih ka ring.

Phairama mipui chet dan anga Mizoram mipuite kan chet ve loh avang hian party leh pawl hrang hrang hian mipui min palzut tawhlo sela. Tun atang chuan mipui harsatna siamlo zawnga lungawilohna lan tir dan zir tawh sela a tha hle ang.

Related Posts :