Khawpui Hmasawnna (Development) Avanga Kan Hmabak Thenkhatte

¢ Er Andrew Vanchhawng, Durtlang

Pathianin mihringte min din tirh atanga kan hmasawn dan chu a hmutu, zirtu leh chhiartu kan nih avangin, mahni tawkah sawi tur kan nei theuh awm e. Hmasawnna avangin hmehkhep engah kan cheng a,hmasawnna avangin zing buh den a awm ta lo a, hmasawnna avangin ka tuikhurte a lo chul ta viau mai a, a va tam tak em!

Mihringte hnena thiamna chung Pathianin a lo dah, mihratkhawkheng leh mithiamte'n an haihchhuah thin avanga kan nun nawm (awlsam) takzia hi chhui fe tham a nih loh vek chuan chhui sen loh a ni ngei ang. Chutih rual chuan keini khawpui Jerusalem ve pawh hian hmasawnna kawng hrang hrang avanga sawisak danglam a tawh nasat dan leh a hmel a thlak danglam takzia chu rual-ute'n sawi tur an ngah khawp mai. Amaherawhchu, tun tumah hian he danglamna han sawi tur hian he thuziaktu hian hriatna a neih tlem em avang leh tul bera a hriat rih loh avangin heti lam hi chu a hawi ngam miah dawn lo a ni. Chuvangin, a 'kolom' te rei vak lo a lo lek ve tawhna lam Asian Development Bank (ADB) sum hmanga hmasawnna hna- urban infrastructure bik Aizawl khawpuia thawh a nih dan tur leh a nghawng tur mipuitena kan lo dawnsawn thiam nan a han thal mau puah pui ve mai dawn a ni zawk e.

ADB sum lo luh dan
Central sorkarin hmarchhaka khawpui hrang hrangte tihhmasawnna tur atan Asian Development Bank(ADB) atangin loan a la a, a hmingah North Eastern Region Capital City Development Investment Program (NERCCDIP) vuah a ni. He loan hi hmarchhakho tan chuan thil tha lutuk niin a lang a, a chhan chu loan lak zawng zawng zaa sawmkua (90%) hi rulh ngai lo- grant a nih dawn vang a ni.

He project thawhna tur sumah hian ADB-in zaa sawm sarih (70%) a tum ang a, cental-in zaa sawmhnih (20%) a tum ang a, state-in zaa sawm (10%) a tum dawn a ni.

A sum min petu pui ber tur hi ADB an nih avang erawh chuan a hnathawh dan tur hrang hrang, contractor thlan tih velah chuan an mahni dan (guideline), ram hrang hranga hlawhtling taka an lo hman tawhte zawm that leh uluk a ngaihzia chu nasa tak a ni. Company/firm lian zawk khawvel huapa hnathawk thei leh lo thawk tawh thinte kan hip theih nan ADB hian hna thensawm vak pawh a phal lo reng a ni. Tin, he sum dawng tur hian ADB, Cental sorkar leh kan state sorkar te'n inremna (agreement) pawh mumal takin an ziak tawh a ni. He inremna hian a ken tel tlat state sorkarin a tih ve tur (reform) tam tham ve tak mipui nghawng tur pawh a tel nghe nghe a ni.

He reform agenda-ah hian tui semtu pawl (water distribution board/authority) a hranga neih te, property tax lak tan te, municipal tih chak leh thil dang dang tuna kan kalphung han nghawng tur a awm dawn a ni. Chuvangin kan lo dawnsawn thiam theih nan min nghawng na tur a tlangpui tal kan hriat ve hi a tha a ni. ADB sum hmang a hnathawh tur hrang hrang leh mipui a nghawng dan tur tlangpuite chu:

(1) Water Supply:
Khawpui zawng zawng deuhthawah hian luipui atanga tui pump chhuah zat leh mipui thleng zat tui hi nasa takin a lo inthlau (danglam) a lo ni a. He tui riral(bothlau) hi hmun thenkhatah chuan zaa sawmnga (50%) hial deuhthaw te pawh niin an sawi. Keini khawpui Aizawl-ah pawh hian Tlawng lui atanga tui pump chhuah zat leh in zawng zawnga thleng belhkhawm danglamna hi mithiamte chuan zaa sawmthum (30%) atanga sawmli (40%) a tlin hial an ring a ni.

ADB rawih mithiamten (Consultant) he thil hi department-a thawkte rawnin 2005 vel chhoah khan an rawn zirchiang daih tawh a. He zirchianna atanga an hmuhchhuah tak chu kan 'water tank' that tawk tawh lohzia te, pipe line hlui tawhzia leh a tetzia te, hnatawktute awmze neia zirtirna pek a tulzia te a ni. Tichuan ADB chuan Aizawl khawpui chhunga water tank siamthatna tur atan, pipe line chhia zawng zawng thlakna tur atan leh hnatawktu (tui semtu) tur thuneihna hrang nei (Board/Corporation) siam nan a sumin min rawn tanpui dawn ta ni.

Mipuite tih ve tur leh a nghawng tur:
Kan hman tlan mek leh rin mek water tank leh pipe line thlak a ngaih dawn avangin engemaw chenah kan tui dawn a buai deuh mai thei. Tin, Kan tui pump chhuah leh in tin-a tui semchhuah zat hriat nan leh inrualkhai taka tui kan dawn theih nan water metre vuah ngei a ngaih a rinawm. Chuvangin mipuite'n kan tan a nihzia hriaa dawnsawn thiam a tulzia kan hriat a that a rinawm a ni. Hemi piah lamah hian state sorkarin Aizawl khawpui chhunga tui semtu tur ram changkanga an tih angin thuneihna hrang nei board emaw corporation a din ngei a ngai chho dawn a ni.

(2) Sewerage:
Khawpui changkang leh hlun zawkte chuan kan hmuh leh hriat fo thin angin an tui chhia leh ek thli hi pipe leh tunnel hmangin an lakhawm a, hmun hla leh him chinah an sawngbawl (treat) thin a ni. Kan tun dinhmunah chuan a remchan ang angin keini chuan kan thehthang ve tawp mai a ni. |henkhat phei chuan ruah sur lain an septic tank an lo sah thul nen. He kan tui chhia leh ek thli thehthang dan hi tunlai khawvel thlirin a changkan loh hle bakah hriselna nghawng thei thil a ni. Tichuan ADB sum hmang tangkaiin heng tuichhia leh ek thlite hi pipe hmanga lakhawma hmun fianrial leh him china sawngbawl tum a ni ta a ni.

Mipuite tih vetur leh a nghawng tur:
Tun dinhmunah chuan a bultan nan (Pilot project) Aizawl chhuah lamah tih phawt tur a ni dawn a. He thilah hian mawhphurhna leh tih tur pawimawh tak kan neih tur chu kan in leh lo ram atanga kan thli chhia kalna tur buaipui leh hnathawktute tawiawm hi a ni. Tin, hun rei vak lovah chuan kan thli kan paih man hi ram changkang zawkte angin chhiah (fee) kan pek ve a la ngai ngei dawn a ni. Chutih laiin he hna hi hlawhtling taka thawh zawh a nih hunah ngat chuan kan tui tlan thin tuikhur leh kan tui lakna Tlawng lui ngei pawh a lo thianghlim sawt ngei ang. Chuvangin khawpui thianghlim leh hrisel kan neih theih nan kan pawimawhzia hria a, hmasawnna dawnsawn thiam hi kan vaia mawhphurhna a nih ngei a rinawm a ni.

(3) Solid waste management:
Solid waste kan tih hian tuiril lo lampang chi bawlhlawh tihna a ni. Tun anga bawlhlawh khawna hmun fianriala paih (dump) ngawt hi mihringte leh khua leh a vel tan a hrisel lo. Chuvangin ADB chuan kan dinhmun hriain bawlhlawh khawnna leh sawngbawlna tihhmasawn nan sum min rawn pe dawn a ni.

He project hnuaiah hian bawlhlawh khawnna tur lirthei lei a nih dawn bakah thianghlim taka thehthangna hmun (Sanitary land fill site) leh leitha siamna khawl (Composting plant) siam leh bun a ni dawn ani.

Mipuite tih ve tur leh a nghawng tur:
He project hnuaiah hian in tinin kan bawlhlawh zinga tawih thei leh thei lo kan thliara bawm hrang kan neih theuh a ngai tawh ang. |awih thei leh thei lo paih leh dah pawlh hi nasa taka khap a ni dawn bawk a ni. Tichuan bawlhlawh khawn tawh sa hi a sawngbawlnaah (Disposal site) kalin, tawih thei chi chu compost plant hmanga leithaah chhuah a ni ang a, tawih thei lo chi chu ram changkanga sanitary land fill an tih angin thianghlim taka phum bo a ni tawh dawn a ni.

He hna hi tluang taka thawh zawh a nih hunah chuan kan bawlhlawh zawng zawngte hneh taka khawn a nih tawh dawn bakah awmze nei tak leh thianghlim taka tihriral a nih tawh dawn avangin kan khawpui thianghlim tawk loh avanga kan harsatna tawh thin hrang hrang a bo ngei a rinawm. Chutih rual chuan ram changkang zawkte angin bawlhlawh paih man chu rei vak lovah in tinin kan chawi ve a ngai tawh ang.

Related Posts :