Aizawl sahuan tlawhtu an pung

¢ PB Lalrammawia

Hun hlimawm tak hman theihna, Aizawl dai-a mi, Aizawl Sahuan Aizawl Zoological Park chuan hma a sawn zel a, tlawhtu an thahnem ve sawt hle.

Sahuan enkawlnaa thuneitu Joseph P Liana, RO chuan, “Sahuan rawn tlawhtu hi Holiday-ah an tam zual a, state dang atanga lo zin leh foreign tourist-te'n an rawn tlawh thin,” a ti.

“Mizoram thingtlang hmun hrang hrang atangin zirlaite leh pawl hrang hrangin an rawn tlawh a, Aizawl khawpui chhung atang pawhin mimal, chhungkua, thianzaho, zirlai, pawl hrang hrang, sunday school department hrang hrang te'n an rawn tlawh nasa hle,” a ti bawk.

“Mipui hian Sahuan hlutna kan hre deuh deuh niin a lang a, thalaite pawhin hmuhnawm thlirin an thlir a, hei hian nungcha humhalh leh duat kawngah hmasawnna a puakchhuah a beiseiawm hle,” a ti bawk.

Joseph-a chuan sahuan chu 'Modern Zoo' tia sawi a nih tawh thu a sawi a, a sawi dan chuan he sahuan hi Cetral Zoo Authority of India hotute pawhin a hmunah an rawn enfiah tawh a, a hmunhma leh a enkawl dan vel pawh lungawithlak an tiin entawntlak an ti a ni.

Sahuana sa chi hrang hrangte hi ramhnuaia an awm thinna anga bawm (enclosure) siamsak an ni a, uluk taka enkawl an nih avangin an hriselin an mam tha hlawm hle. Sa chi hrang hrangte hian chaw pe thintute chu an hre hrangin an nel bik hle bawk.

Tunah hian Mizoram State Bird Vavu zinga pahnih chu an tui mek a, pakhatin tui pahnih leh a dangin tui panga an awp mek. Sahuanah hian Mizoram State animal Sathar te pawhin hmun zau leh nuam tak an nei a ni.

Aizawl leh Sairang inkar, Aizawl atanga Km 14-a hla, Sakawrtuichhun VC huamchhung, Police Training Center (PTC) Lungverh bula awm Aizawl Sahuanah hian nungcha chi hrang hrang (species) 38 a awm a, chu'ng zinga chi thum- Vavu (Humes Pheasant), Samang (Malayan Sun Bear) leh Zawnghmeltha (Pigtail Macaque) te chu India ram khawi sahuanah mah a awm ve lo niin sahuan enkawltute chuan an sawi. Aizawl sahuanah hian nungcha 207 a awm.

Sahuana sate hi vety doctor-in awmchilhin a enkawl a, chawlhkar khatah an hriselna leh an eitur vawi hnih uluk takin a endik ziah.

Sahuan chhungah hian thawktute (MR 23) awmna quarter (14 buildings) bakah non-residential 18 a awm a, chu'ng zingah chuan dispensary te, interpretation center te, retiring shed te, isolation ward te a awm a, sa an thih palh pawha phumbo mai lova halralna hmun pawh dah a ni.

Sahuan hi 2002-a bultan a ni a, November ni 24, 2006-ah luah tan a ni. A ram zau zawng hi 65.25 hectare (tin 163 hmun) a ni a, concrete banga hung chhuah vek a ni.

Chawlhkar khatah Thawhlehni atanga Pathianni thleng tlawhna hun hawn a ni a, Thawhtanni erawh an chaw nghei ni (Fasting Day) a nih avangin tlawh phal a ni lo. Sahuan tlawh man hi naupang kum 5 chin chunglam mi pakhat tan Rs 5 a ni a, kum 5 hnuai lam tan luh man pek a ngai lo. Camera keng duh tan still camera tan Rs 10/- leh video camera tan Rs 100 pek a ngai bawk.

Sahuan hi zoo director hnuaia awm tur a ni na a, director post siam a la ni lo. Director post hi siam tura dil mek a ni a; tunah hian PCF Wildlife hnuaiah a awm a ni.

Related Posts :