SORKAR LEH PARTY

¢ HC Vanlalruata

Communist ramah chuan an rorellai party bak political party dang awm theih a ni lova, rorellai Communist Party hotu ber General Secretary kha an ram hruaitu lu ber nghal bawk. Communist Party hruaitu inthlanna-a General Secretary a tling chu an ram hruaitu lu ber a nih nghal avangin mipuiin vote an thlak a inthlanna hranpa neih a tul ve tawh lo. Hetiang hi an kalphung a nih avangin sorkar leh party thliar hran theih a ni lova, Hitler-a lal laia Nazi party kalphung ang chiah khan sorkar leh party chu an chawhpawlh vek a. An sipaite pawhin Nazi chhinchhiahna ‘swastika’ chu an kawr banah an tar vek a nih kha.

India ram ang democracy ramah chuan political party leh sorkar hi thliar hranna fel tak a awm tur a ni a. Inthlan dawna kan Minister-te an campaign pawhin an sorkar motor hman phal a nih loh dan atang hian party leh sorkar thliar hran dan fel tak chu kan nei a. Sorkar tha chakna kha party hamthatna atana hman a thiang lo. Minister emaw MP leh MLA te pawhin sorkar sum, department sum leh hna awmte kha party block emaw unit emaw hnenah an pe thiang lova, NGO te emaw hnenah pek thin a ni. Chutiangin MP LADS fund te leh MLA LADS fund te pawh party hminga pek theih a ni lo.

Mizoramah hian kan thliar thiam ve viau tawh emaw tih hnu-ah party leh sorkar thliar hrang mang lova thiltih kan hmu leh zauh thin a. Party thila sorkar hnathawkte chhawr maite kan ching leh thin. Hei hi tih loh tawp tur a ni a, thil thianglo a ni. Sorkar hnathawkte pawh an mi duh thlang tura vote thlak theihna chanvo nei mahse eng political party emaw laka rinawm tlut an nih a thiang lova, politics rim nama sorkar hna an thawh chuan dan anga hremna lek theih a ni. An campaign thiang lova, mipui hmaah politics thil, party thil an sawi thiang lova, chanchinbu-ah chutiang lam hawi an ziak thiang hek lo. Chumi an tih duh chuan an hna atanga bangin politics an luh chilh mai zawk tur a ni.

Minister press conference-a sorkar thu pawimawh a puannaah te rorellai party hruaitute an thu ve fuk mai thinte hi thil fello tak a ni a. Minister lo tanpui tura official lo awm ve nilo party mi an lo awm ve fo hian press conference a ti chhangchhe satliah lova, sorkar leh party thliar hranna dan tibuaitu a ni. Hei hi kan Minister-te hian hria se a tha khawp mai.

Sorkar hnathawkte pawhin an hna, sorkar hna leh politics thil an thliar thiam tur a ni a. Rorellai party worker ang maia chet chiam hi a dik lova, dan dinglai kalh a ni. Minister/Ministry pawhin hetiang mite hi vulh vak chi a ni lo. Party dang sorkar laia an tih ve leh chuan an duh bik hauh lovang. Ministry chelhtute chuan an party mi chu an duhsak ngei ang tih chu a chiang a, mahse, official taka thil an tihnaah chuan party hming a lang thiang lo. Chutiang tal chu kan thliar hrang thiam tur a ni ang.

Hetianga fello taka party thil leh sorkar thil kan chawhchawrawi zui zel chuan kan politics hi a nu telh telh ang a, sorkar sum leh thil dang hman sualna a pung zel ang. Political party hmakhua atana sorkar tha chakna hman hi democracy thuthlung kalh a ni. Politician-te chu ram hruai turin kan thlang tling a, ram mipui huapa thawk tur an ni a. An office kha party bil hamthatna atana hman a nih chuan ommunist kalphung kan zui tihna a ni ang.

Kan politics tinu zawng leh mipui sum party hamthatna atana hman hi titawpin sorkar hnathawk, hlawh atana mipui sum hmangtute pawh party pakhat thatna tura hman hi kan sim a hun tawh hle a ni. Chutilo chu kan ram hmel hi a chhe lutuk ang tih a hlauhawm.

Related Posts :