Sial + Nuai Khat = Electric Veng VC Team

¢ Hmingsanga

Mizoram Football chanchina sawi hlawh reng tur, tournament khata team tel tamna ber record ni thei khawp, football tournament lian leh hlu, UNODC, MSACS, Mizoram Football Association leh Zonet Cable TV te tangtlangin an buatsaih Red Ribbon Football Tournament chu zawh fel a ni ta.

Team tel tura inpelut 212 an awm lai a team 206 te'n an khelh hnuah Electric Veng VC team te chuan final-a an khingpui Dinthar VC team te chu 2-0-a hnehin Red Ribbon All Mizoram Inter Village Football tournament-a champion hmasa ber an ni ta.

Mizoram Record
Team tel tura hming pe 150 an chuang tawh tih atang khan, Mizoram football chanchina team tel tamna ber a ni ta a tih theih nghal. 2003 khan Central YMA buatsaih Inter Branch YMA Football tournament-ah team 151 an tel a, chutah chuan Mizoram hmun hrang hrang atangin player 3000 chuang hretin he tournament hi an khel a nih kha. Chu chu Mizorama football tournament lian ber tia sawi thin a ni. Kum sarih a vei hnu-ah tun tum tournament hian record ding lai chu khumin record thar a siam ta a ni. Tun tum tournament-ah hian player 4000 chuang hret an rawn tel a ni.

Kuminah hian Central YMA chuan Diamond Jubilee lawmna chi khat atan Inter Branch YMA Football Tournament a siam leh dawn a, he record hi a khum thei a nih chuan kuminah hian tualchhung football boruak a alh nasa lehzual sawt dawn tihna a ni. Record chu record ni se, Mizoram football hi nasa takin chawisan a ni ang tih a chiang a, hei tak hi football ngainatute tan chuan chanchin lawmawm a va ni dawn chiang em!

Khaikawm ila
Red Ribbon Football Tournament-ah hian match 213 khelh a ni a, a tir lamah khelmual pali-ah khelh a ni. Goal lut zawng zawng hi penalty te nen chhiar tel vekin goal 1139 a ni.

Penalty hmanga chak zawk zawn ngai match 30 zet a awm a, walk over vawi 6 awmin, penalty pet hnuah pawha la inhneh tawk zel vanga thum vawr ngai vawi khat a awm bawk. Thum vawr hmanga chak zawk zawnna match hi Thinghlun leh Tualcheng inkhelh tumin a ni. Hun pangngaiah 1 - 1 in an inhnehtawk a, penalty hmanga chak zawn zawn a nih hnuah 8-8-in an la in-draw leh a, thum vawr a nih hnuah Thinghlun hi an chak ta zawk a ni. Match khata goal luh tam ber tum leh inhnehna sang ber chu Kanan VC team te'n Kepram VC team an hnehna kha a ni. Kanan hian 1st round-ah an khingpui Kepran chu 12-0 ngawtin an sawp a nih kha. Match khata goal 10 lut sawi tur a awm bawk.

Champion team Electric Veng VC team hian champion an nih bakah Fair Play Trophy leh cheng sing khat an dawng a, hei bakah hian Best Player atan Lalbiaktluanga, Electric Veng team-a mi hnenah hlan a ni bawk. Best Player hian pawisa fai cheng sang li a dawng a ni. Electric Veeng VC team te hian fans nei tha ber vengah puan an ni bawk.

Goal 9 thuntu Lalthanpuia, Bethlehem Vengthlang team-a mi chuan cheng sang li a dawng.

Yellow card player 400 velin an hmu a, red card hmu player 49 an awm.

Electric Veng Champion Dan
Electric Veng hi round khatnaah an 'bye' a, round hnihnaah Chawlhhmun 6-0-in an hneh a, Hortoki 2-0 in an hneh leh a, round linaah Tlangnuam 2-1-in an hneh. Keifang 2-0, Mualcheng 4-1-in, semi final-ah Hnahthial chu aggregate-in 8-2-a hneh lehin final an lut a, final-a an khingpui Dinthar VC team chu si hnih faia hnehin sial leh cheng nuai khat an dawng ta a ni.

Electric Veng hian an khingpuite lamah goal 26 thunin an lamah goal 4 chiah a lut a, Red Ribbon Football Tournament a champion hmasa ber an ni ta a ni.

Pahnihna Dinthar
Dinthar team te hian Sakawrdai 4-0-in an hneh a, hemi hnu hian penalty hmanga chak zawk zawn ngai vawi thum zet hmachhawnin, Zemabawk North, Luangmual, Lunglei-te an hneh a.round of 16-ah Falkawn 3-0 in an hneh a, quater final-ah Mission Vengthang 2-1-in an hneh. Semi final-ah Armed Veng chu aggregate in 6-2 hnehin final an lut. Goal 21 an thun a, goal 7 an chhuah.

Fakna leh Fuihna
Tournament lian leh team tel tamna ni si, buaina lian tham em em han sawi tur a awm lo kha hmasawnna chi khat chu a ni. Chutih rual erawh chuan a entu lamin zir tur kan la nei nual. Mizorama a vawi khatna atan inkhel entu awm lova inkhelh te pawh he tournament-ah hian hmuh tur a awm. Hei hi players lam thiam loh ni lovin a entu lam tan luat vanga thil thleng niin a lang. Hetiang hi football khawvelah thil thleng khat tak a ni a, chin zui tlak loh tak a ni.

Player te pawh mualchhunga han inlek phek deuh leh han intin deuh uaih uaih awm bawk mah se inzir lai kan ni a, heti lam kawnga insumtheihna kawngah tanlak erawh a la ngai deuh niin a lang.

Tournament khelh a nih theihna tura ngaithuahna lo seng hmasatu MSACS, UNODC te an fakawm. Tournament hlawhtling tak khelh theih a nihna tura mualchunga engkim rel feltu Mizoram Football Association te an fakawm thlawt. An thawhrimna leh an inpekna hi a thlawn mawlh lo ang. Zonet Cable lam thahnemngaihna pawh a fakawm hle. Media lama thawk te an fakawm a, a bikin ni tin chanchinbua sports ziaktute pawh an fakawm, inkhel an cover tha a, an zarah mipui tam takin inkhel an en phah ti ila a dik awm e. Referee ten match an thunun danah hmasawnna tam tak hmuh tur a awm bawk kha thil lawmawm tak a ni.

Hlawkna A Awm Em?
He tournament avang hian Mizo tlangval sawm chuangin Mizoram pawna football club-a khelhna tur an nei thei dawn nia hriat a ni. Hei hi a hlawkna langsar tak pakhat chu a ni chiang mai. A khelmual pawn lamah pawh Mizo thalaite zingah AIDS Awarness tha tak a intuh phah bawk ang tih a rinawm. Hei hian he tournament buatsaihtute MSACS lam pawh a tilawm ve ngei ang le.

Hmabak Eng Nge?
Mizo footballer state pawna khelh engemaw zat kan nei a, an chanchin hahipin kan sawi thin. Chutih rual erawh chuan tualchhung football a nun loh miau chuan player thawnchhuah tur leh national level-a hmingchherna tur kan nei mumal thei lo ang.

Tun tum tournament hian tualchhung football nasa takin a chhemalh a, hei hian state pawn lamah Mizoram hminga fehchhuahna kawngah nasa takin a tanpui dawn tih a chiang. Hei vang hian kan hmabakah beiseina thar kan neih phah sauh dawn bawk a, Mizoram hi football thiam state tia hriat kan hlawh chho zel dawn niiin a hriat bawk.

Best Player Chu Tu Maw?
Red Ribbon Football Tournament-a Best Player atana thlan tak Lalbiaktluanga, Electirc Veng hi SAIL Football Academy-a kum engemaw zat lo awm tawh a ni. Kolkata Super Division-ah pawh season enge aw zat lo khel tawh a ni.

Mizoram pawna a awm chhungin age level hrang hrangah West Bengal hmingin a lo khel tawh thin bawk.

SAIL Football Academy, Bokaro-a chhuahsan hnuah, Goan club zawm tuma inbuatsaih mek a ni. He tournament atang hian Mizoram mipui te'n kan hmelhriat theih phah ta hlauh a ni.

Related Posts :