Mizo Footballer-te Chanchin Lawmawm

¢ Hmingsanga

Mizoram lamah Red Ribbon Football Tournament kan buaipui luih luih lai khan India rama Mizo footballer te'n chanchin lawmawm lam hriat tur an lo nei heuh hman.

I - League club zinga Mizo footballer awmkhawm tamna ber Shillong Lajong chuan 3rd EK Nayanar Memorial Gold Cup, Kannur, Kerala-a khelh mekah Viva Kerala chu semi final-ah 2-0-a hnehin final an lut.

Aizawl-ah pawh lo kal tawh Shillong Lajong FC hian Nepal international Anil Gurung goal thun hmangin hma an hruai a, hun tawp hma minute 5 a la awm tihah Lengpui tlangval Rohmingthanga ball cross chu Anil Gurung bawk hian goal-ah chantir lehin final an luh theih phah ta a ni. Rohminga hi tunhnai deuh ahang khan Lajong tan a khel hha thei hle.

Semi final hi mi 30000 chuang zetin a hmunah an en a, he inkhel a hmuna entu tam zawk hi Viva hantute an ni. Chuti chung chuan Lajong hi a chak zawkah an hang thei a, hei hi an lawmna tizual tu a ni ngei ang.

He inkhelhah hian Shillong Lajong keeper, Champhai tlangval R Lalthuammawia'n a khel hha hle a, goal ngei tura ngaih vawi tam tak a 'saved' a, hei vang hian Thuama hi Man of The Match-ah thlan a ni nghe nghe.

Semi final dangah Mama, Tuaitea leh Sawmtea khelhna Chirag United chuan Mohammedans Sporting Club chu tie breaker-a hnehin final an lo lut tawh. Final-ah Mizo tlangvalte telna club an intum dawn tihna a ni.

He chanchin buatsaih lai hian final hi khelh a ni a, a result kimchang kan hre hman ta lo a ni.

Goa Pro League-ah Jerry Zirsanga khelhna Dempo SC chu champion an ni. Dempo SC te hi Kingfisher Goa Pro league-a champion an nih bakah Super Cup-ah champion an ni bawk.

Kolkata Premier League lamah pawh Mizo tlangval inkhel thiamte avangin Mizo nih a nuam chhunzawm zel e. Hun rei tak inhliam vanga khel thei lo Ramluaha chuan Mohun Bagan tan a khel ve leh thei tawh. Tun hnaiah Mohun Bagan khelah a hming hriat tur a awm leh tawh.

East Bengal tan Beirona, Beikhokhei te an fisrt XI-ah an tel regular viau. Sawmkima pawh a tluanin khel lem lo mah se an khelhtir zeuh zeuh reng.

Chanchin lawmawm sawi tur a awm laiin AFC Challenge Cup khela fehchhuak Mizo tlangval pathum telna India U - 23 team an chehha lo hle. Match thumah an chak lo fai vek tih hi chanchin lawmawm chu a ni lo!

India hian a match hmasa berah Kyrgyzstan 2-1-in an hneh lo a, Robert Lalthlamuana'n a khel a, mahse a ke a tihnat avangin match dang pahnih a khel chhunzawm thei lo. Turkmenistan nen an khel leh a, India chu 1-0-in an chak lo a, hemi hum hian Jeje leh Didika te first XI-ah an tel a, match thumna DPR Korea khel lehin 3-0 ngawtin an chak lo leh a, hemi tum Jeje leh Didika te'n an khel leh bawk a ni.

Related Posts :