Monday, March 1, 2010

Poet-te tha tho thar

Mizo zingah chuan 'hla' a lar a, poetry erawhin ngaihhlut a hlawh lem lo tiin a sawi theih ang. Mizo zinga poet-te pawh an khua a har fo a, poetry chu a thi tawh ti hiala sawi thin te pawh an awm. Poets' Meet-a pungkhawm poetry tuipuite erawh an hlim tlang a, an tha pawh a tho thar hle.

February ni 19, 2010-ah Agriculture Conference Hall-ah Art & Culture Deptt.-in Poets' Meet an huaihawt a, NEZCC lamin a senso an tum thung. Prof Laltluangliana Khiangte co-ordinator atana ruat a ni a, ani kaihruainain Poets' Meet chu hlawhtling takin neih a ni ta a ni.

"A hlawhtling a, poet-te pawh an hlim. Poetry hi a tuite chuan an tuipui tih a chiang a, poetry hi a lo la thi lo e," co-ordinator chuan a ti.

Meghalaya leh Nagaland atangin poet 2 ve ve he hunah hian an tel a, Mizo poet 16 an tel bawk. |huamtea Khawlhring chu amah a tel thei lo a, a poetry erawh chhiarchhuah a ni.

Nagaland atanga lo kal, Noel Manuel chuan, "Hun nuam tak a ni, ka hre reng ang," a ti a, he Poets' Meet hi 'grand success' ti hialin a sawi.

"Poetry tuipuitu mi khati zat an pungkhawm kha a ropui ka ti a, kan poetry-te min tuipuitu an awm tih ka hriatin ka lawm a ni," a ti.

"A huaihawttute an fakawm a, poet-te an chetha a, mipui an chetha bawk a, hun nuam leh duhawm tak kan hmang thei a ni. Mipui lamin khati taka poetry an tuipui kha thil lawmawm a ni," a ti bawk. Ani hi Poetry Society (India)-a North East Region co-ordinator a ni.

Poet-te'n an poetry an chhiar a, chumi zawhah mipui lam inkawmin, an poetry chhiarchhuah chu an khelho ta thin a ni.

Sawihona hunah hian an tui tlang hle a, a ngaithla tura kalte'n sawi tur an ngah hle. Kum lama la naupang deuh chuan 'Mizote'n poetry kan hriat dan a dik lo' ti hawi zawngin an sawi tlangpui a, 'upa lamin poetry an hriat dan leh a kalphung an tih hi a dik lo' tia sawi te pawh an awm. 'Mizote hian 'song' leh 'poetry' kan hre hrang lo' tia sawi te pawh an awm a, poetry chhiar chhuah chungchang ai mahin Mizote poetry hriat dan chungchangin tuipui a hlawh emaw tih tur khawp a ni.

"Poet 20 chuang kalkhawmna hun buatsaih a ni hi a hlawhtlinna chu a ni tawh reng reng a, poet hrang hrangin inpawh taka mahni poetry chungchang an han sawiho kha a hlawhtlinna chu a ni leh a. Tin, poetry ngaihlutu mi khati zat an kalkhawm kha a hlawhtlinna a ni. Poetry tuipuitute'n tui taka poetry an han sawiho kha poetry than zel nan leh humhalnan a tul a, chuvangin, keini a huaihawttu lam chuan hlawhtling kan inti khawp mai," Prof Laltluangliana Khiangte chuan a ti.

"Poetry a la thi lo tih chiang takin a lang a, thangtharte'n an tuipui hle tih a lang. Thangtharin poetry an tuipui hi poetry ngaihlutute tan chuan a lawmawm tih loh rual a ni lo," a ti bawk.

Poet 20 chuang kalkhawm zinga pakhat, Mafaa Hauhnar chuan, "Poet-te kha chu thuhran ni se, mipui lamin khati taka an tuipui kha a lawmawm a, poetry tuipuitu an la awm tih han hmuh kha a nuam khawp mai. Poetry hi mi nawlpuiin tuipui lo mah se a lo la thi lo e," a ti.

Related Posts :



No comments:

Post a Comment