Lal dam rei lung phun ta

February ni 19 khan Rualluang khuaah Mizo lal zinga dam rei ber nia hriat, Lalrumruta Sailo hriatrengna lung phun a ni. March ni 16, 2007--ah khan Ruallung khuaah vek hian Lalrumruta lung dawh a lo ni tawh bawk.

Lalrumruta (L)
Lalrumruta Sailo hi 1901-ah Lenchim khuaah a piang a, 1921-ah lal tanin Ruallung khua a thut a, kum 33 zet a lal hnuah, 1954-a lal ban a nih khan a bang ve ta a ni.

Rumruta hi mahni khua leh tuite enkawl thiam tak leh lal remhre tak a ni a, lal a nih hlima a hmalakna hmasa pawh thlanmual hran siam a ni.

Fu huan leh thingpui huan siam turin a khuate a fuih thin; chu chu ni tin khawsakah tangkaia a hriat vang a ni. Lal tha tak a nih avangin sap sipai lal pakhatin chawimawinan ulhbun phir a pe nghe nghe. He silai hi rambuai lai khan India sipaiin an laksak a ni.

Phulpui lal Suakhnuna fanu Rualthanchhingi nen 1919-ah an innei a, fa 12 an nei. A lung phun ni hian tu leh fa 294 a nei tia sawi lan a ni.

A nupui Rualthanchhingi hi mi hawiher zau leh remhre tak a ni a, nauchhar thiam, nauchhar tura koh kal theih reng a ni. Nauchhar hi rawngbawlnaah a ngai a, naute lai dam hma chu bual turin a nauchharte hi a pan thin nghe nghe.

Rualthanchhingi hi fai ngaina mi niin, an khuate pawh invawngfai turin a zirtir nasa hle a, biak in leh a vel vawngfai turin a zirtir nasa hle bawk. Biak ina a luh dawn pawhin pheikhawk a phelh kher thin a, hei hi Pathianin Mosia hnena "I pheikhawk kha phelh rawh, i awmna kha hmun thianghlim a ni," tia a hrilh a changchawi vang a ni.

Tawngtai mi, thil lo thleng tur pawh thlirlawk thiam a ni a, Indopui Pahnihna lai pawh khan kekawrtlawn a ha tawh. Nakinah chuan hmeichhiate'n kekawr tlawn an la hak sup sup tur thuin a kekawr tlawn hak chhan hi a sawi thin. Thinglawn thei, an khaw thing lawn theite ai pawha lawn thei a ni nghe nghe. Ani hi September ni 30, 1988-ah khan a thi.

A nupui thih hnuah hian Rumruta hi a khua a har thei hle niin amah hrechiangtute chuan an sawi.

A hriselna a tha hle a, 2000-a Lammuala Mizoram sorkar buatsaihna kum sangbi thar lawmnaah pawh khan a la tel thei nghe nghe.

August ni 31, 2006-ah khan a thi a, a khuaa cheng thinte leh amah hrechiangtute'n an ui hle. Amah ngaisangtu, Ruallung khaw mipuite chuan an lal hlui hriatreng nan March ni 16, 2007-ah khan a lung an dawh a, he hunah hian tunlai zaithiam lar, Zoramchhani pawh a tel. Tunah a lung phun a ni leh ta a ni.

Related Posts :