Monday, March 22, 2010

CHERAW LEH KHUALZIN

¢ HC Vanlalruata

Cheraw hmanga World Record siam kan ti emaw, Bamboo Dance kan ti zawk emaw a enga pawh chu nise kan hotute’n he thil hian kan ramah khualzin (tourist) tam zawk a hip dawn niin an sawi a. A dik ngeiin a rinawm a. Mahse, cheraw hi hmuhnawm thamin kan kan khat khawp a, khualzin kan hip zeuh zeuh dawn chauh a ni mai thei. Kan hnam zia kan lantir hi khualzin kan hipna tur pawimawh berte zing ami a ni tih chu pawm a ngai.

Hmanni lawk khan Kolkata-a ka zin Puri (Orissa) kalna remchang ka hmu hlauh mai a. Khualzin tamna khua a ni a, ralkhat atanga ka lo ngaih mai dan chuan tuifinriat kam (beach) a intawllen duh an kal tam ber a, hei hi a dik rualin an Orya hnam zia leh an ei leh in khan mikhual tam tak chu a hip ni zawkin ka hria a, keini pawhin kan hman tangkai theih ka ring.

Puri khua hi khaw lian a ni lova, an dawrpui pawh lian vak biklo tak a ni. Kan thlenna hmuna thlengte pual bika tuifinriat kam an hauh bik zau zet mai chu a nuam khawp mai a. Mi tlemte chauh kan kal a; a hahdam thlak khawp mai. A tinuamtu ber erawh chu coconut hawn tharlam tui a dawtna hmanga han dawt mai mai te, tuifinriat sangha man chawp tira a hmuna kan tir nghala sehhmeh-a han hman te kha a ni awm e. Mipui nawlpui kalna tuifinriat kam chu duh aiin mi an tamin a thianghlim fahran lova, a tinuamtu erawh chu an tuifinriat chakai lian, kaikuang lian leh sangha chi hrang hrang tuipui kama an lo pho duh lai lai kawha han siam tir a ei nghal vel kha a ni. A bakah chuan kan la hmuh ngai loh Orya ho puan leh thiamhnang ilo han lei vel kha a ni leh mai.

Hmana Reiek-a Anthurium Festival an buatsaih hmasak ber khan Mizoram pawn atangin an lokal hnem fu a. Kan zu thlen ve khan Mizo khua-ah kan kal ve a, Mizo hnam hrang hrang in zinga Paite inah khan an zupui a dawn hmanga dawt chi kha a lo awm a, kan thlen ve meuh chuan a lo zo der tawh a. Hnamdang ka hmelhriatte chuan kha kha an dawt leh duh thu min hrilh a, mahse ka’n zawt kuala dah belh tur an lo nei tawh lo. Khata hnamdang lokal te kha Beer pawh a tha ber ber Whisky pawh Scotch tui ber thlenga in thei an ni a; mahse, Mizorama an lokal chuan kan Mizo zu an in chak a ni. Chu chu kan pek theih chuan khualzin kan hip ang.

Kum 1994-a Gospel Centenary kan lawm khan India ram pawn atang pawhin mi thahnem tham takin an rawn chhim a. Tlai lam, Lammual programme a zawh hnu kha chuan tihtur hre lovin an hawi ta mai mai hlawm a. An zingami, foreign media aiawh chanchinbumi pakhat chuan khawi kawi-ah emaw te kha chuan hnam lam en turte, lam vena turte awm sela chuan sum senga tel ve ngei a duh thu min hrilh a. Chutiang chu kan buatsaih lova a nachang pawh kan hrelo tih chu ka rilru-ah a lo lang chiang khawp mai.

Mizoramah hian tuifinriat kam kan nei lova, khualzinte intihhlimna dang vur tawlhna turin vur bawh tlang pawh kan nei lo. Sakhua emaw hnam thil emaw hlui tak leh ropui tak en tham kan nei hek lo. Khualzin hipna tur kan neihte chu kan hnamzia, kan hnamin tunhma atanga mi hnam neih loh kan neih, entirna’n eitur lamah pawh saum leh bekang nena tui taka thlai kan baite, vawksa leh antam kan chhum pawlh tui lutuk te hi a ni mai a. kan tlangram chhengchhe tak mai leh kan luidung khawkrawk takte hi adventure sports atana kan sawngbawl thiam chuan kan hip thei khawp thovang.

Engpawhnise, khualzin hipa tourism-a sum lalut tak tak tur chuan thliarkar rilru paiha rilru zau kan put a tul a. Vawikhat Cheraw kan tam vang ngawta hip luh ruih ruih chu inbeisei chi a ni lo. Zan dar chuti zat piahlam dawr hawn khap veng kan la nih thup lai leh zu kan khap chhung chuan tam tak an lokal hi beisei chi a ni lo. Hotel ropui tak din hi tourist hipna a ni hek lova, Hilton, The Park, Oberoi etc in hotel an din velohnaah hian kan Mizo in sak dik tak dai nuam taka a tuitling leh rakzu dawm duh tana kan inhawn theih phawt chuan kan hip ve hrim hrim ang. Chu chuan kan ramah pawisa a luan luh tir ang a, kan sum leh pai dinhmun a lo tha ang. Chu chu tlin lova kan inhria a, rilru zim tak pu chunga cheraw hmachhuan ngawta hip kan tum chuan tum rihloh a tha zawk.

Related Posts :



No comments:

Post a Comment