Thuziakmi thusawi thiam
Thuziakmi Pu James Dokhuma kha, a ziah lamah a hmingthang em a, chu chuan a thusawi thiamzia pawh a hliah niin a lang. Ziakmite hi a sawia sawi ralah chuan an laktlak loh duh khawp, Pu James-a erawh chutiang a ni lo. A thusawi thiamzia hi ziah tham a awm.
1989-a mid-term poll-ah khan a thianpa Pu Ngurchhina, Lunglei North biala MNF candidate chu a campaign pui a, hemi tum hian candidate ni hawt si lovin a hming a lar hle. MNF unit hruaitu thenkhat phei chuan an biala ding tur te pawhin an sawm a, party hruaitute hnenah pawh an thlen chawt chawt fo reng a ni.
A thianpa Pu Ngurchhina a campaign-pui tum hian mipui hmaah thu a sawi thin a, a tlatha thin hle. "Keini MNF party chuan vote kan zawng ve lo, min vote-tu turte kan zawng a ni zawk," tih te chuan mipui ngaihnawm tih a hlawh hle.
An khingpuite pahnih hming lam ria, "Pu F Sapa leh Pu Lalhmingthanga te hi tla se kan ti a ni lo, keini hi tling hlauh ila kan ti a ni zawk. Sikul-a kan in-exam ang hi a ni; exam-naah pawh thiante fail se kan ti ngai lo, pass ila ka ti thin a ni zawk," tih te pawh vawiin thleng hian Zoram politics khawvela titi lar tak a la ni ta reng a nih hi.
Pawisa nei lo
Khawvel pa ropui Winston Churchill-a kha, politics-a a luh hma, sipaia a tan laiin Bangalore-ah a awm thin a, chutih lai chuan an regiment chuan polo an tuipui hle. Ani chuan a ning em em thung a, a thiante inkhelh lai pawhin lehkha a lo chhiar ngat ngat thin. Lehkha zir sang ni lo mah se lehkha a chhiar zau em avang hian mithiam a nih phah nia ngaih a ni. India rama a awm lai hian Bangalore Club-ah member niin a tel ve a, he pawl record-a a lan dan chuan Churchill-a hian pawisa a neih lo em avangin Bangalore-a a awm lai hian a ba - Rs 13 a rul thei lo a ni awm e!
Monday, March 8, 2010
Chanchin Maksak 65
Subscribe to:
Post Comments (Atom)
No comments:
Post a Comment