Beautiful Naturally

¢ Debbie Chawngthu

Mi tupawh mai hian hmelthat leh nalh kan duh theuh a, tum pawh kan tum hlawm na ngaing e. A nei deuh chuan an nalhna turin inhnawih chi foreign siam man to tak tak an lei mai a, a neilo deuh pawhin mahni lei phak tawk tha si an lei a, nalh duh l hi kan vang viau awm e.

Vun hi a mam thatloh chuan taka te chei nalh viau mah ila, hmeltha tih theih ani lo. Mi a vun a mam viau chuan hmeltha lemlo, ngo lo pawh nise a hmuh that theih em em a ni. Vun hi enkawl ngun ngai tak mai, mahse fimkhur ngai bawk si a ni a, a hmelhem tawh laklawh chuan siamthat leh har tak a ni bawk a ni. Mask hi vun enkawl nan hmasang atang tawhin an ching a, vun chawm tu atan te, tidamtu atan te, tifaitu atan te an lo hmang thin a. Tun ang laiah phei chuan kask chi hrang hrang tha tak tak leitur a tam ta khawp mai.

Mask man tlawm leh hman awlsam ber pakhat chu bawnghnute hi a ni a. Lapua lian vak lo la la, chu chu bawnghnute ah chiah la, i hmai hruk nan hmang rawh. Minute 20 atanga 30 vel chiah la, phihfai la, hei hi vun tan a tha em em a ni. I vun tifai leh chawm i duh chuan carrot leh turnip hi chhuang hmin la, chu chu diak tha takin rawt sawm rawh. I hmaiah i hnawih ang a, minute 15 i chiah hnuah phihfai ang che. Turnip hi vun tifaitu tha tak a ni. Alu leh multana mitti (Fuller's Earth) pawh hi vun hmelhem enkawl nan a tha a, alu tui fiante thum vel la la, chutah chuan mutana mitti fiante thum pawlh la, mask tha tak i nei a ni mai.

Thingfanghma hi thei hrisel tak mai a ni a, a hmin phei chu thei tui ber pawla ngaih a ni. Tlema tawih deuh pawh paih mai lovin mask atan hmang teh. A theih chuan a tharlam nise a tha ber a. Thingfanghma hmin lai i hmaia hnawih tawk tur la la, chu chu i hmaiah chulh rawh. Minute 15 i chiah hnuah tuilumin phihfai ang che. Sertui far 30 vel, fanghma tui far 60 leh rosewater tlem pawlh la, i hmaiah hnawih rawh. Minute 15 chiah hnuah phihfai la, he mask hi vun mawm tan a tha bik a ni.

Vun tihngo i duh chuan sertui far 60, fanghma tui leh carrot tui chawhpawlh la, i hmaiah hnawih la, minute 15 vel chiah ang che. Sandalwood tlem rawt diak la, i hmaiah hnawih teh, vun ngo na bawk a ni. Sandalwood rawt sa tih diak nan hian bawnghnute hmang ang che. Tin, i neih chuan sandalwood diakah hian turmeric powder fiante 1/4 pawlh la, minute 20 chhung chiah la, phihfai leh ang che. Bawnghnute, sertui leh oatmeal chawhpawlh hmaia hnawih hhi vun tingo tu tha tak a ni bawk.

Multana mitti fiante thum, khawizu fiante khat leh purun sen tui engemaw zah chawhpawlh la, mask atan hmang rawh. I vun hmelhem lai atan a tha a, i vn chuar tur a veng bawk ang. Vun chuar la thuk lutuk lo hi chu enkawl ngun chuan a reh velah maithei a, hetiang enkawl nan chuan artui hi a tha em em a ni. Artui pakhat var lai chauh la la, chu chu i hmaiah hnawihin minute 15 chhung chiah rawh. I tih ngun peih chuan i vun chuar la thuk vaklo te chu an reh mai ang.

Thlai chhumna tui te hi hawp sen lohte pawh a awm ve thin a, hetiang hi paih mai lovin i hmai phih nan hmang thin ang che. Vunin a ngeih em em a ni. A bik takin spinach zikhlum leh bean chhumna tui te hi vun tan an tha lehzual a, a tui paih mai lovin hmai phih nan hmang thin la, amaherawhchu, a tui te hi a hing tawh an ni tur a ni lo thung. Fanghma tui fiante thum vel la la, chu chu turmeric nen chawhpawlh la, i chawhpwlh thaht hnuah sertui tlem far tel bawkang che. I hmai leh nghawng velah hnawih la, darkar chanve i chiah hnuah tifai ang che. Hei hi vun tihngo na tha tak pakhat a ni.

Q&A.
Q. Shampoo chi hran hran a tam si a, a eng ber hi nge hmang ila tha ang?

= Shampoo hi mahni sam azir zela tha an ni a, i sam ti nem leh ti tle tu, chawm nung theitu kha i tan chuan shampoo tha a ni mai. Thiante ngeih ang zawng ringawt hmang ve lovin nangman i samah han test la, shampoo hman tur chu i hre thei mai ang. A tlangpuiin herbal shampoo te hian fak an hlawh hle.

Related Posts :