January ni 26-ah khan Kanchanpur damdawi in-ah Tuikuk pakhat a thi a, nu pakhat sah tuma ngaih niin, police te kuta a awm laiin a thi niin thudawn chuan a sawi.
Vaisam nu pakhat, Rosiami, kum 60 mi chu zing dar 3 velah zung turin a chhuak a, a zung zo chu Tuikuk mi pahnihin chemin an lo tin a, a hlau chu a au ta chiam a, tlangvalho an rawn pungkhawm nghal niin thudawn chuan thil thlen dan a sawi.
"A zung zo a tho chu Tuikuk pahnihin chemin an lo tin a, a au nghal a, a hre phak an rawn tlankhawm a, Tuikuk pahnih chu an tlanchhia a, an um a," tiin Tripura atanga thudawn chuan a sawi.
"Pakhat chu khaw chhungah an man hman a, pakhat zawk hi chu a tlanchhe thui ang reng. Tlangval rual chuan an man a, Vanghmun Police Station-ah an dah ta a ni," a ti bawk.
Thudawn danin, he'ng mi pahnihte hi Prodono Reang (40) leh Rokima Reang (22) an ni a, Rokima hi a tlanchhe thui zawk chu a ni.
"Pi Rosiami te hi rawk an tum pawh a ni mai thei. Pa an nei tawh lo," thudawn chuan a ti.
Prodono Reang hian an umna leh an manna lamah hliam a tuar a, police te kuta a awm hnu hian Vanghmun damdawi in-ah (PHC) hruai a ni a, chuta tang chuan Kanchanpur damdawi inah an hruai leh a, tlai dar 4 velah a thi ta niin thudawn chuan a sawi. Kanchanpur hi Vanghmun atang hian Km 35 vela hla a ni.
Vaisam khua hi in 40 vel an ni a, Mizo leh Tuikuk an cheng a, Mizo an tam zawk. Tripura Jampui tlangdung khua a ni.
He thil thleng hian he thu buatsaih lai thleng hi chuan thil tha lo dang a nghawng rih lo nia thudawn a ni.
"Mizo leh Tuikuk ti zawngin tunah rih chuan thil a kal lo. Tuikuk-ho hi an thinrim a, hetia mi an tibuai hi an Tuikuk puite'n an haw hle a, anmahni umna leh manna lamah pawh a phur phurah an tang," Tripura atanga thudawn chuan a ti.
"Pi Rosiami mangang a au khan a hriate kha an tlankhawm nghal a, chema tintute chu an um ta nghal a, Vaisam khawmi kha an tangrual vek," a ti bawk.
Monday, February 1, 2010
Pitar Sah Tumtu Nia Hriat Tuikuk A Thi
Subscribe to:
Post Comments (Atom)
No comments:
Post a Comment