Kangthelh turin kangthelhtu pawl inpeih lo

January ni 20, 2006 zan dar 7:20 velah Aizawl Bazar Pui tia sawi, New Market a kang a, bungrua cheng nuai 81 man vel zet a kangral a nih kha.

Hemi tum hian kangthelhnan kangthelh motor 4, a lian chi 2 leh a te chi 2 hman a ni; zan dar 7:45 velah fire & emergency service te an thleng a, mahse, kang an han thelh dawn a, leihlawn leh hmanraw dang an neih tawk loh avangin kangmei hi an thelh mit har phah ta a ni.

Hetih lai hian kangthelh motor 7 an nei a, 3 chu a chhiat avangin an hmang thei lo. Motor 4-te pawh hian tui an tlachham hma hle a, mimal motor 5 leh sipai motor 1 hmangin tui chawi a ni.

New Market kang an thelh tum hian kangthelh pawl hian in chhawng sang thelh turin chutiang atana hman tur- hydrolic platform an nei lo a, jumping cushion an nei hek lo. Thil dang pawh an nei chuang lo!

Vawiin thlengin chu harsatna chu khen thlak a la ni lo a, 2006 hma hun engemaw chen kha he harsatna hian Mizoram a lo thutchilh tawh bawk.

Kangmei veng turin sorkarin a hma a la a, mipuite hnenah pawh zirtirna a pe thin. State Level Fire Prevention Committee a awm a, district tinah District Level Fire Prevention Committee a awm bawk. He'ng committee ruahmanna hian Mizoramah kangmei ven chawlhkar hman mek a ni nghe nghe. Forest deptt. lamin chanchinbumite tan kangmei venna lam hawi essay inziaksiak fo bawk. Hetih lai hian kangmei thelh tur liau liauva rawihte erawhin ngaihsak an hlawh lo hle.

Aizawl vil turin Aizawl hmun laili laiah Fire Station dah a ni a, kangmei thelh tura thuamchak erawh a ni lo. Mihring an indaih lo a, khawl leh hmanrua an tlachham hle bawk.

Fireman pakhat chuan, "In a kang a, kan thawkchhuak ve a. Theihtawp kan chhuah pawhin mipui mit kan tlung zo ngai lo. A tawpah min dem leh sup sup a, a zahthlak duh khawp mai. Kan hmanrua leh 'man power' hi min hriatthiampui se chu mi hian min dem bik lo ang mawle," tiin an dinhmun a sawi.

Kangmei laka invenna lama thawktu- Mizoram Fire and Emergency Service an awm a, an dinhmun hrechiangte chuan Mizoram veng zo turah an ngai lo. Mizoram pum veng turin post 13 chauh an nei!

Chu mai a ni lo, kangthelhtu (fireman) 69 vel chauh an awm a, chu'ng zing atang chuan office-a duty turte chhutin fireman 30 lo liam an awm lo lehnghal.

Aizawl khawpui bikah chuan Hunthar-ah directorate an nei a, Aizawl Police Station building chungah Aizawl Fire Station a awm. Chaltlangah leh Treasury Square-ah motor pakhat ve ve an duty thin bawk.

Kangmei laka Aizawl khawpui venghimtu pui ber, Aizawl Fire Station hian kangthelh motor (fire tender) 3 chauh an nei; pick up, 407 leh Tata truck.

Mahindra pick up chuan tui litre 800 vel a phur thei a, 407-in litre 2000 vel, Tata motor lianin litre 3600 vel a phur thei. A tin zawnga chhut phei chuan a tlem hle.

"Tui hi kan phur tam thei lo a, kalkawngah a insawh baw tawk te a lo awm lo thei lo a, tui litre 800 te hi chu minute 5 lekah te a zo mai," fireman pakhat chuan a ti.

Kangthelh motor pakhatah fireman 6 zel an awm tur a ni a, mahse, pick up leh 407-ah hian mi 3 an leng. Pali chu an chuang ve thei mai a, mahse, an tawt em avangin driver tan a buaithlak. Tata motor lianah chuan 6 an chuang thei.

An kangthelh motor-ah hian fireman 6 leng pawh ni se motor pakhata 6 chuang tur fireman an awm lo hrim hrim.

"Motor pakhatah fireman 6 chuan tur a ni a, office-ah hian fireman 6 emaw 7 emaw kan duty thin. Motor pakhata chuang tur kha motor pathuma kan insemdarh a ngai tihna ang a ni a, chuvang chuan 'ka duty hun a ni lo' tih kan sawi thei lo, kangmei a chhuah chuan mahni in atang paw'n kan chhuak mai," fireman pakhat chuan a ti.

"Fire tender bakah hmanrua hrim hrim kan nei tha lo a, phaiah training-in tel ve mah ila kan training-naa kan zir dana ti turin Mizoramah hmanrua a awm leh chuang lo. Entirnan 'jumping cushion' te pawh kan nei lo a. Tin, hmanrua chu nei pawh ni ila a hmangtu tur mihring kan awm dawn chuang lo a," a ti bawk.

Aizawl Fire Station hian anmahni puala office an neih loh avangin Aizawl Thana chung berah hian an inbun ve tawp a, garage an neih loh avangin a thlanga kawngkam velah an kangthelh motor-te pawh an hung ve nawk nawk thin. Police motor leh a dang neuh neuh a inhun khup reng avangin kangthelh tura an tlanchhuah dawn pawhin motor dang nen an indal fo reng a ni.

Aizawl viltu Fire Station hi Millenium Centre hian a nekchhuak a, a tirah chuan a thlang deuhvah hmun pek an ni dawn nia sawi a ni. Mahse, tihpuitlin a ni ta si lo.

Fire Service hi hmun hrang hrangah an inzarpharh ve a, mahse, a khawiah mah hian kangthelh tak tak tura tuaihnum erawh an ni lo.

Kang thelh lama harsatna dang sawiin fireman pakhat chuan, "In emaw, ram emaw a kang a, fire service-ah kan report nghal lo tlangpui. Mipuiin thelh an tum phawt a, chumi hnu-ah kan report thin. Tichuan, kan hriat veleh kan han thawkchhuak a, kan inzarpharh that loh avangin kawng lakah rei tak tak thang a ngai fo a, tui tlem te leh fireman tlem te kan thawkchhuak a, a tawpah mipuiin min sawisel leh luih luih si," a ti.

"A hman hman hian min sawisel reng reng a, TV-ah thlengin min sawisel a, engtirnan tun hnaia kangmei chhuahna pakhatah pawh kan thelh zawhah, chawhnu dar 2:14-ah kan haw a, mahse, 'dar 2:30-ah an lo thleng chauh' tiin TV lamah min sawi leh tho," a ti bawk.

"Report kan dawn veleh kan tlanchhuak a, kan tih theih tawk chu kan ti vein kan hria. Mihring leh hmanraw zat ngaihtuah hian kan tih theih tawk hi ropui viau tur a ni lem lo mai thei," a ti bawk.

Fire & Emergency Services te'n an chhinchhiah chinah kum li kal ta chhung khan Mizoram-ah in kang 126 a awm a, heng zinga 55 chu Aizawla mi a ni a, in kang zinga a zahve aia tam chu electric short vang a ni.

Electric short vanga in kang hi 2006-2009 chhung khan Aizawlah 26 a awm a, district dangah chuan 3/4 vel bak a awm lo a, Saiha leh Kolasib district chu electric short vanga in kang tamna ber dawttu an ni a, kum 4 kal ta chhung khan electric avang hian In 4 a kang a ni. Champhai-ah in 1 a kang bawk.

Kum 4 kal ta chhung khan Mizoram pumah eirawngbawlna gas (LPG) leak vangin in 19 a kang. A chhan leh vang hriat mumal lohva in kang 59 a awm. Thuk/meihawl atanga in kang 4 a awm.

Related Posts :