Wednesday, February 17, 2010

Hlawhchham vawi hnihna

¢ Lalhruaitluanga Chawngte

July ni 20, 2007. Ka la hre reng mai, MPCC te'n 'Kuthnathawktute chawikanna leh retheite chhanchhuahna tur' tia an sawi - "New Land Use Policy changtlung zawk" tih an tlangzarh ni kha.

MPCC president, tuna Mizoram chief minister ni ta hian chumi tum chuan thu a sawi a, NLUP hi tunhmain an lo kalpui tawh tih sawiin, "Khatih lai khan bul tan tir kan nih avangin sorkar lam leh mipui lam pawhin tih dik tawk loh leh felhlel a awm ang tih kan ring a. Khati chung khan NLUP dawngtute khan an chhawr tangkai hle a, tunah chuan hun tharah kan chuangkai tawh a, Pathian zarah sorkarna kan neih leh chuan NLUP hi belhchian dawl zawk leh pawisa pawh kuthnathawktute tana bultanna thamin kan sem ang," a ti a nih kha.

Eptu pawl an nih laiin NLUP hi an aupui fo a, titi pawh a luah fu. July ni 20, 2007-a "New Land Use Policy changtlung zawk" tih an tlangzarh atang khan mumal zawkin an aupui ta a, NLUP chu auhla berah an neih zui ta ti hialin a sawi theih ang.

2007 a ral a, 2008 pawh a liam ta. NLUP chu an auhla ber a ni a, mahse, kei pek hian NLUP awmzia ka hre lo tluan zak! Chhung tin hnena cheng nuai 1 sem kha tha ka ti lo a, tin, tha pawh ni se a theih ka ring lo. Kan inhnial fo, ka la hre reng mai. Tichuan, hun a liam a, 2008 kum tawp inthlanah Congress chuan sorkarna an chang ta. Chhung tin hnena cheng nuai 1 sem a theih loh, a daih lo ang tia awr phiar tawng tawnga ka tan laia min hnialtu thenkhat chu mi pawimawh an lo ni ta.

2009 a lo herchhuah meuh chuan chhung tin hnena cheng nuai 1 sem a theih ka rin loh thu ka sawi laia 'a theih' titute khan 'chutiangin kan sawi lo' an ti ta daih mai! 2007 leh 2008 chhung zawng khan an sawi awmzia ka lo hresual a ni mai thei.

2009 chhung chuan NLUP chungchang chu sawi berah kan la neih ta zel a, an sawi hnem poh leh ka hrethiam lo zual zel thung. Subsidy-a tractor te chi leh power tiller an sem tum te khan 'hei hi NLUP hmahruai a ni' an ti than khan ka hria a, 'kan tan tep' an ti fo bawk. 'NLUP hi an tan tawh emaw'n le? Nge, an tan tep zawk' tih chu ka rilru-a zawhna awm fo a ni reng a ni.

Chutianga buai reng renga ka awm lai chuan, kum tawp lamah, thu chiang ka hre ta; NLUP dawng tura thlan chu ennawn a tul avangin a sem hun an sawn hla tih chu.

Chu thu chu hotute'n mipui hmaah an sawi a, 2009 kum tawp lamah khan ka ngaihthlak ve reng laiin a dawng tura thlan zingah party dang an lo tel ve avanga ennawn hi tul ta ni awm te pawhin an sawi tlatin ka hria. Mahse, ka lo hresual leh pek a nih ka ring.

Engpawhnise, NLUP a buai nuai mai tih zawng a chiang.

NLUP Implementing Board-in Project Report an siam a, chuta a lan dan chuan January - June chu a kum khatna (first year) tur a ni. July - December chu a kum hnihna (second year), a kum leh January - June chu a kum thumna (Third Year). A lan dan chuan NLUP chu installment tum thum hmanga semchhuah tur a ni.

Trade thenkhatah erawh installment tum 4-a sem theih turin fourth year thlenga ruahmanna a awm.

January thla chhungin sem hman a ni ta lo phawt a, chuti a nih chuan NLUP calendar chu a buai ta nuai mai tihna a ni mai lo'm ni?

Chutih laiin sorkar thuchhuakah chuan February thla chunga lo hal vek tur tih a ni si.

NLUP tum ber pakhat chu huan hmun nghet neiha kum tin loneih bansan a ni. "New Land Use Policy" tih, July ni 20, 2007-a an tlangzarah pawh 'NLUP thupui ber' tiang hian an ziak: "Ram tichereu zawnga kum tin loneih insawn a, thing leh mau vat chhiaa halral thinte bansan a, ram leilung tangkai zawka an hman theihna tura huan leh lo nghet leh eizawnna dang siamsak a, chumi kawhhmuhna leh zirtirna leh tanpuina pek," tiin.

Mahse, mipui hnena NLUP zuartu, tlang ram loneih bansanna tur tia sawitute chu lo hal hun ruattute an ni!

July ni 20, 2007-ah chutiang thu chu ziak meuhin an puangzar tawh a, 2010 kum tirah pawh a la hlawhtling lo thung. 2008 inthlan hnu, kan sorkar neih mekin sorkarna an chan hnu-ah lo vah hun tum hnih kan paltlang ta. Mahse, sorkar thuchhuak chu February thla chhunga lo hal hman tur tih te a la ni ta rih! Chuti a nih chuan 2009 lo hal hun kha hlawhchham vawi khatna, 2010 lo hal hun hi hlawhchham vawi hnihna a ni thei mai em?

Tihian kan ti nek nek ang a, March thla velah thlawhna a tum theih loh avanga mihausa-ho zin kawng a buai leh a nih chuan, lohaltu miretheite kan tawngtaw puh leh ngawt ang chu!

Related Posts :



1 comment:

  1. a tha hle mai....NLUP chungchang ah hian mipuite kan luh a hai nge mipui te hian NLUP lu kan ti hai zawk aw!!

    ReplyDelete