FOR AN EVENING PARTY

¢ Debbie Chawngthu

Zofa te pawh hna thawk ngawr ngawr lovin intihhlimna hun inpek pawh kan thiam ve tawh hle a, a bikin thalai te phei chuan kan uar tawh hle niin a lang. Kan hma lawkah Valentine’s Day in min hmuak leh ta reng mai bawk a, heng hunah tak hian tan la duh tan chuan tan lakna hun tha a ni a, intuai hnum dan kawng thenkhatte i han thlir ho teh ang.

I inchei hmain thawk han la phawt mai la, rilru zangkhai tak nei chungin inchei tan ang che. I hmai i chei dawn anih chuan i sam hnunglamah tawn vek phawt la, tichuan i duh ang tawkin i hmai i chei thei ang. I sam pawh fai taka suin a huh laiin i duh angin dimtein set la, a ro hunah pawh a nalh phah sawt ang. I kut tin ngun takin en la, i nail polish hnawih a khem em? A khem anih chuan tifai vek la, hnawih lehna hun i nei lo anih pawhin hnawih lo khan kalpui mai zawk ang che. Nail polish hnawih ve lem si, khem nian nuan hi chu tlangval te mit tikham tu pakhat a tling ve ania. Tin hnawih reng reng hi inbual hmain tifai vek la, inbualnaah brush ila, a fai duh bik a ni. Tin, nail polish hnawih thin tena kan hriat reng tur chu karkhatah vawikhat tal tihfaina hun inpek hi a ni. Tihfai hnu darkar 24 chhung tal hnawih lovin awm sela, hetih chhung hian boruak tha a hip ve thei dawn a ni. Tifai lova rei tak dah reng chu tinin a hua a, a hnuah a eng a, tin var neih leh a har em em a ni.

I haw tlaia zan lam chhuah leh nghal i duh anih chuan i mit cheina kha tireh lo mai la, tlem hnawih belh leh mai rawh. I hman hram chuan i mit cheina tih loh chu oil emaw cleansing milk in tifai la, i hmui hmaih suh ang che. Hmai mawm lutuk tur ven nan powder inhnawihin lipstick lar lam inhnawih ang che. Party na hmunah chuan hmel tharlam put hi a nuam a, tharlam tak ni a i inhriat chuan i lang tharlam bawk ang. Inchei hi inbual fai hnu hian a nuam bik a, taksa a fai chuan rilru pawh a harh bik nge nge thin. Inbual zawha i inhruk hul velah body lotion inhnawih nghal la, body spray i hmang thin anih chuan lotion i inhnawih zawhah inhnawih leh nghal la, a rim a rei bik ang. Foundation hmang thin i nih pawhin chhah takin inhnawih lo hram ang che, tlem te hmangin face powder inhnawih leh zawk ang che. Powder hi a cake chi aiin a dip pangngai hi hnawih a rual duh a, a lang nalh zawk bawk. Powder i inhnawih hnuah chuan i biangah hnawihsen (blusher) sen lutuk lo leh lang natural thei ang ber hnawih ang che. Mascara hian mit meng a ti mawi danglam duh hle a, vawikhat i hnawih hnuah a la ro chiah lo tihin hnawih nawn leh ang che. Eyelash curler hmang thin i nih chuan mascara hman hmain i mit hmul chu chep er la, mascara hman hnua i mit i chep er anih chuan i mit hmul a tla nasa thei a ni.

I mit hnawih iuluk ang bawkin i hmui hnawih uluk ang che. Zan lamah hi chuan lipstick rawng lar hi a nalh ber a, sam tawn chung phei chuan hmui a langsarin a mawi duh bik bawk. Lipstick i inhnawih zawhin lip gloss hman theihnghilh suh ang che. Tichuan, i thawmhnaw duh ber kha han ha la, a fuh leh fuh lo lai inbih chiang ang che. Nalh taka inchei hi a pawimawh a, rilru leh taksa tan pawh a hrisel a ni. Mahse chu ai maha pawimawh chu ‘nungchang’ hi a ni a, nalh viau mah la i nungchangin a zir loh chuan i nalh famkim thei lo ang. Mi zinga i awmin i hawiher thlengin uluk la, mi biangbiak dan te pawh hi a inzir theih fu ania. Tawng tam lutuk lovin midang tawng ngaihthlak thiam zir bawk la, hmel ngui leh tum bur bula awm te hi thil nuam lo tak a ni a, hmel hlim put tum hram hram ang che. Nuih hi man nei lo mahse a hlu em em a, mite rilruah nasa takin hna a thawk thei a ni. A bikin hmeichhia te hi puipunnah kan titi tui thei hle a, midang chanchin sawi chang pawhin an chhiatna lam ni lovin an thatna hailang tu ni la, i bul ami te pawhin an rin mai bakah i bula awm nuam an lo ti zawk ang. Party na reng rengah kawr rawng lar ha la, mi zingah pawh i langsar ang. Mahse rawng lar i inhmeh lo anih chuan inbel duh lem suh, midang nalh pui hi kan lo nalhpui ve kher lo thei ania. Mize mak tak tak karah biak that deuha signal hmu sual te pawh an lo awm ve thei a, biak that tur then hran thiam hi a pawimawh hle a ni. Hmeichhia te hi chuan lipstick leh powder te han inhnawih that kan duh thin a, mi zinga kan awm lai anih chuan kan bula mi te hnenah tawngkam mawi takin tih tur i nei tih hrilh la, kalsan chauh ang che. Engmah sawi lem lo a i kalsan chuan ngaihdan an lo nei ve thei a ni. Puipunnaa biak chak zawng i hmu anih pawhin zak lo takin pawh mai lo la, i mitmei hmuh phawt la, chuta a melh dan che azirin biak dan tawk thiam ang che. A mitmei a hmuh lem lo che anih chuan biak kher tum lo la, a fel zawk ang.

Intihhlimnaah sawm i nih chuan thleng hma lutuk duh suh, ngaih pawimawh loh zingah i tel ang. Tan hun an bithliah atanga darkar 1 hnu velah han thleng la, mite lawm i hlawh zawk ang.Tin, intihhlimna reng rengah hian a tawp rat thlenga awm hi a tul ber kher lo a, midangin min la ngai pawimawh ani tih hriat laia inthiarfihlim hi mite rilru lakna tha ber pakhat a ni. Mahni chanchin sawi hi tupawhin nuam kan ti vek a, mahse i bul ami khan i inngaih pawimawh angin a ngai pawimawh kher lo che tih hria la, a sawi duh zawng te pawh ngaihthlak sak ang che. A tuina zawng te hriat han tum la, i tui ve kher lo anih pawhin han ngaithla la, chu chu thian tha siamna kawng tha tak a ni. Party na atanga i haw dawnin a buatsaihtute lawmthu hrilh hmaih lo la, nuam i tih thu leh an buatsaih leh hun i nghakhlel a ni tih hriattir ang che. Hetiang anga hawihhawm leh inhawng taka i awm anih chuan i bula awm a lo nuam ang a, puipun nikhuaah pawh hmaih loh zingah i lo tel tawh zawk ang.

Q. Ka tleirawl tirh atang nail polish ka hmang tawh a, hnawih loh chuan ka tin a nung lovin a eng tlat mai a, engtia tih chi nge?

= Kan tin hi kan taksa dang ang bawka boruak mamawh a ni a, boruak a hmuh loh chuan a lo eng in a nung lo thin. Kar hnih khat hnawih lovin han dah chhin teh, hnawih lo thei lo i nih erawh chuan rawng dal lam inhnawih thin ang che. Nail polish hi karkhatah vawikhat tal hnawih that ziah tur a ni a. Entirnan: Inrinniah tifai la, a tukah hnawih leh chauh ang che. Zankhuaa hnawih lova i dah theih chuan boruak a lo hip ve a, i tin tan a tha a ni. Nail polish i hman dawn reng rengin base-coat hmang phawt thin ang che, base-coat a awm remchang mai lo anih pawhin rawng awm lo hnawih phawt la, rawng nei chu i hnawih leh dawn nia. Hnawih tawh loh i duh anih chuan a ngai anga awm tur chuan hun a duh rei ang tih hria la, hnawih lovin oil in massage ngun la, zuah lo hrih bawk ang che. Chutianga i tih chuan thla tlemteah tin rawng pangngai i nei thei ang.

Related Posts :