GOOD GROOMING

¢ Debbie Chawngthu

Mi inchei thiam leh nalh tak hmuh hi chuan anmahni anga awm ve mai kan chak rum rum thin. Lehkhabu leh movies a kan hmuh nalh tak tak ho hi awm mai maia nalh an ni lova, an inenkawl ngun leh taimak avanga nalh leh hmeltha an ni thum a ni. Inenkawl hian tih tur leh tih loh tur a awm a, tih loh tur thenkhatte i han tarlang teh ang ~~~

1.) Magazine kawmah nula lipstick rawng mawi tak mai inhnawih a, nui sang hmel i hmu thin ang a, a lipstick hnawih rawng pawh i it viau maithei. mahse, kan hriat tur chu miin a inhmeh kha kan inhmeh ve vek kher lo tih hi a ni. Mi hak leh inhnawih nalh tih vanga lei ngaw te hi chin loh tur a ni.

2.) Hman lai chuan sam suk zin lutuk chuan samin a chhiat phah thei an ti thin a, kan awih a, a bal deuh chung pawhin su lovin kan dah thin. Mahse hei hi thu belhchiang dawl lo tak a ni a, mahni ngeih zawng shampoo hman chuan nitin suk pawh a pawi lo. amaherawhchu, shampoo kha a chak lo chi anih mai bakah suk hunah pawh vawikhat bak shampoo kha hman nawn loh nise a tha ber a ni.

3.) Eyeliner, mascara, shimmery eye-shadow te hi inchei nalh nan chuan an tha hle a. Mahse, hengte hi a hman dan tur leh a hun leh a hmun hriat tur a ni. Chhuna eye-shadow tle tak i hman chuan nalhpui ai mahin en i hrehawm zawk ang.

4.) I inti cher duha i thianin diet a ti mek a, a tih ang khera tih i tum chuan i ti sual ang. I thian nen khan in piandan a inang lova, in hriselna pawh a inang kher lo ang. Chuvangin, diet i tih dawnin i taksa awmdan hre hmasa ang che.

5.) Kawr rawng pangngai deuh hlir mai neih hi a awl duh viau a, mahse rawng dang dang mahni inhmeh zawng inbel hian rilru a ti thar a, nalh pawh kan nalhpui sawt zawk a ni. Kawr rawng i hak ngai vak lemlo han inbel chhin la, i rin aiin i nalhpui ang.

6.) Arngeng hi a rawn awm chuan khawih loh a harsa a. A rawn awm anih chuan insum hram hram rawh. Deh leh sih hian a ti pung a, vunin a chhiat phah thei a ni.

7.) Ha rualrem lo, ha bal, ha hmai kak te hi zahpui avangin duh angin mi hmaah nuih ngam loh a awl a. Zahpui neih hian kan nih tur ang min nihtir lova, mahni inrintawknaneih pawh a har ta thin a ni. Hetianga zahpui nei i nih chuan i zahpui lai siam tha thei tur mi thiam pan vat zawk ang che.

8.) Tarmit bun hi a tirah chuan a zahthlak duh hle a, mit thalo tak pawh zah avangin an bun tha ngam thin lo. Tunlaiah chuan frame nal ak tak, hmai tlang rem tur chi hrang hrang an siam tawh a, zah avanga bun loh kha mit tan a pawi zawk a ni tih hria in tarmit bun an chawh che anih chuan i inhmeh tur thlang thiam la, bun ngei ang che.

9.) Tha intih tak tak hi a hra duh hle mai a, thenkhat phei chuan midang tha bika kan hriat avangin kan inzahpui a, engtikah mah nalh theih kan inring thin lo. Mahse, tupawh hi taksaah nalh lai bik neilo kan awm lo tih hirat tur a ni a, tha kan tih te pawh hi an tha famkim vek bik lo tih hriat a tha. I taksa en ngun la, i thatna lai ni a i hriat kha a hma aia nalh thei turin chei tum la, i inzahpui nep ang.

10.) foundation i leiin midang inhmeh ang rawng pawng lei ve ngawt suh. Kan hmel a inang lo ang bawkin kan vun rawng pawh a inang lova, chuvangin foundation leh i vun cheina reng reng i lei dawnin i vun rawng mil thlang thiam ang che.

11.) Hun engemaw bik ah hian mi neinung deuh chuan anmahni chei turin beautician an ko mai thin a. Hei hi tha viau mahse kan taksa chu keimahniin kan hre chiang ber a, anmahni tih tir ai chuan mahnia han zir ve deuha, tih mai hi a that zawkna lai a tam khawp mai. An chei kher i duh anih pawhin a hma ni hnih ni thum vel atangin enchhin hmasa zel an che. Chutichuan, i taksa awmdan leh i nalh theih dan tur te an lo hre tawh ang a, i duh ang takin i inchei tir thei tawh ang.

12.) Fashion hi a inthlak danglam thuai thuai zel mai a, a hunlai a lo thlen ve chuan inhmeh lem loh pawhin tih ve mai a awl thin. Mahse, kan hriat reng tur chu fashion thar ber kha kan inhmeh ve kher zel lo tih hi a ni. Fashion thar ber anga inchei lo pawhin class neitakin a inchei theih a, hei hi upa tawh lam tan phei chuan hriat a tul bik a. Kum 30 miin kum 16 mi hak ang kha a inhmeh ve kher tawh lo tih hirat a tha a, inchei hi mahni nih ang tawk zela thiam a pawimawh bawk a ni.

Q&A

Q. Kum 45 mi ka ni a, tunhmain arngeng ka nei ngai reng reng lova. Tunah hian a rawn awm thar ta tlat mai a, engtinnge ka tih ang? Tin, ka biang leh hnar hi a sen deuh ten bawk a, engnge a chhan ni thei ang?

= I arngeng rawn sawi ang hi "acne rosacea" an ti a, i kum ang hunlai vel hian a awm chawk thin. Hnar leh biang a rawn mawm a, arngeng te a lo insiam a, thisen kalkawng a lo zau a, a lo sen ta thin a ni. A chhan tak hi hriat theih mai a ni lova, taka inthlak danlglam nasat hunlai anih avangte, rilru hah leh rim lutuk vang te, thak leh mawm ei tam lutuk vangtein a awm ve thei a, thingpui leh coffee in tam lutukin a awm ve thei bawk. A enkawl nan chuan antibiotics chak lo thei ang ber strip khat tal lo ei la, arngeng damdawiah pawh a chak lo thei ang ber lo hnawih thin ang che. Tin, tui in tam hle bawk la, chu chuan kawng tam takin a pui ang che.

Related Posts :