Monday, January 18, 2010

2009 Mizoram Football Thlirletna

¢ Hmingsanga

2009 chhung khan Mizoram chuan ram pum huapa inelna chi hrang hrangah champion nihna nei lo mah ila, Mizoram football tan chuan kum chhinchhiahtlak tak a ni ngei ang. Mizoram hian engemaw zat chhung chu football lamah chanchin tha sawi tur kan nei lo. Tunhnai kum sawm vel chhung erawh chuan chanchin chhuanawm leh chhinchhiah tlak tam tak sawi tur kan nei ta. 2009 chhung chauh pawh khan chanchin lawmawm leh hriatreng tur kan nei nual.

Santosh Tropy-ah Mizoram chuan hmasawnna lam sawi tur kan nei thar ve leh bawk. Player thate chungchangah sawisel leh inhnialna awm deuh mah se kum dang zawng aiin Mizoram hian Santosh Trophy-ah a khel tha a, pre-quater final a inhlangkai phak ve ta. Mizoram hi Cluster III-ah awmin vawi hnih chakin vawi khat an draw a, point 7 hmuin cluster III-ah leader an ni. Pre quater final-ah Goa chu 3-0 a hneh loin, Goa hi Santosh Tropjhy 2009 champion an ni zui ta nghe nghe a ni.

U-21 National Football championship-ah hun danga kan la thlen phak ngai loh final hial kan thleng. 1992 atanga khelh tan U-21 National Football Champinship for M Dutta Trophy-ah hian Mizoram chuan record tha tak kan la neih ngai lohna a ni. Hmasawnna ropui tak a ni tih loh rual a ni lo ang. Mizoram hi final-ah an khingpui Punjab chuan 3-2 in an hneh. Champion team Punjab lamah hian Mizo tlangval Chuantea a tel a ni.

U-19 National Football Championship-ah pawh Mizoram chu team tha pawl tak niin, semi final-ah an chak zo ta lo. Mizoram hi 1995-96 ah khan a vawi khatna atan final a lut ve tawh. Mizoramin he tournament kan thlen tum 2004-2005 khan semi final a thleng tawh. 2009-ah semi final-ah bawk kan tla leh ta a ni.

U-16 hi record kan neih thatna ber a ni thin. U-16 National Football championship-ah hian Mizoram chu vawi li champion kan nih tawh bakah vawi 2 runners up kan ni tawh. Kum 2003-2005 chhung phei kha chuan kum thum chhung a zawnin champion ni thei kan ni. 2008-ah champion kan ni leh a, 2009-ah erawh champion kan nihna kan hum zo ta lo. 2009-a champion team Jharkhand-ah hian Mizo naupang pathum an tel a ni. He'ng Mizo naupang pathumte hi SSA Football Academy naupang ni thin, SAIL Bokaro-a awmte an ni.

School naupangte tana Football-a inelna lian ber Subroto Cup 2009-ah SAI Kolkata chuan final-ah an khingpui Govt Central High School chu hnehin champion an ni. SAI Kolkata leh Mizoram te hi final hmain preliminary round-ah an lo inkhel tawh a, Mizoram hi an chak zawk. Final-ah Mizoram hi a tlawm zawkah an tang ve thung a ni.

Subroto Cup 2009-ah hian Mizoram aiawha khel Govt Central High School te hian hian final an luh theihna tura an kalkawngah team tha tak tak an petchhuak. Final an khelh hma hian team 10 khelin team 9 an hneh a, team khat nen erawh an in-draw. Sub junior (U-14) lamah pawh Mizoram school an chetha viau a, quater final an inhlang kai. U-14-a champion ni ta Sukantanagar Vidyaniketan, Kolkata chu 2-1 hneh loin an tla ta a ni.

Nikum Decmeber thlaa Agartala-a khelh zawh tak U-14 National School Games Football Tournament-ah Mizoram School chuan pathumna a hauh phak. Mizoram School hian semi final-a an khingpui, champion ni ta Chandigarh chu si khat faiin an hneh lo. Pathumna inchuhnaah West Bengal School chu 1-0-a hnehin pathumna an ni ta a ni.

He National School Games Football tournament-a champion ni ta Chamdigarh-ah hian Mizo naupang panga lai an tel. An lawmpuiawm hle. Champion team Chandigarh aiawha khel Mizo naupangte hi SSA Football Academy a zirlai ni thinte an ni. SSA Academy atang hian Chandigarh Football Academy hi an zawm a ni.

Guwahati Town Club kum 103 tlin lawmna, Airtel 2nd GTC Invitation Football Tournament, Guwahati-a khelh zawh takah Mizoram XI chuan final-a an khingpui Sunrise Athletic Club, Guwahati chu 2-1-a hnehin champion an ni.

Tualchhung lamah Vodofone MFA League khelh a ni. A thawh khatna khelh zawh a ni tawh. Hemi karah hian Independece Cup khelh chhunzawm a ni. 2009 Independence Cup-ah hian I division club a inhlang kai thar RC Football club chu champion an ni a. Mizoram football tournament neih mumal ber leh upa ber pawl Independence Day Celebration Football Tournament 2009-ah rinkai lo RC FC chu I Division-a an season khat awmnaah champion ni thei nghal khawpin an chetha tlat mai. Hei hi Mizoram football chanchinah thil chhinchhiah tlak a ni ngei ang.

Independence Day Celebration Football Tournament-ah hian I Division-a inhlangkai hlim club, champion ni nghal thei hi an la awm ngai lo. RC FC chuan I Division-a rei tak lo awm tawhte khumin final-a an khingpui, I Division-a season hmasaa kai thar ve tho SSA FC chu 2-1-a hnehin champion an ni ta a ni.

Mizo player thate club khata awm khawm tamna ber Lajong Football Club te chu I-League I divison khel turin an inhlangkai. Mizoram football tan chanchin lawmawm tih loh rual a ni lo ang.

Mizo player I-League-a khel phak kan neih belh zel a. Malsawmfela chuan Salgoacar a zawm thar a, Lalrindika leh Vanlafela ten Churchil Brothers an zawm thar bawk.

Ram pawn lamah Mizo footballer te an chetha hle. U-13 AFC Football Festival-ah India aiawhin Mamit SSA Football Academy naupang Lalkrawshlua chu a tel ve a. U-16 AFC Football championship-ah Lalnunmawia chu India aiawha goal thuntu ber a ni a, U-19 AFC Championship-ah India aiawhin Mizo player panga Malsawmfela, Lalrindika, Malsawmkima Changte, F Lalrozama leh Jeje Lalpekhlua te an tel bawk.

India U-19 team captain chu Mizo tlangval Jeje Lalpekhlua a ni. He tournament-ah hian India hian a pum puiah goal 10 a thun a, India-in goal 10 a thun zinga goal 9 hi Mizo tlangvalte thun zu han ni a!

SAFF Championship 2009-ah India an champion a, India team-ah Mizo tlangval pahnih- Robert Lalthlamuana leh Jeje Lalpekhlua te an tel. India player pawimawh an ni phak ve ve bawk.

Mizoramin footballah khualduhawm pahnih kan thleng. Mizoram football chanchina mellung pawimawh tak tur, UEFA A licensed coach John Michael Bilton chu Mizoramah kar hnih aia tam mah Mizo naupangte traning pein a lo kal a. England player lar Alan Smith, Paul Robinson leh Jonathan Woodgate te, an naupan laia Leeds United Youth Club-a lo kaihruai thintu John Michael Bilton hian Mizoram chu football thiam ram-ah a ngai a ni.

I-League Club Shillong Lajong chuan Mizoram an rawn thlawh a, Mizoram XI nen inkhelin Shillong Lajong hi an chak ta zawk a ni. Heng bakah hian All India Football Federation (AIFF) vice president Ankur Dutta pawh in Mizoram hi a rawn tlawh bawk.

Related Posts :



1 comment:

  1. 15 August is the most historic day in Indian history as the nation celebrates its Independence Day.
    India will celebrate its 71st Independence Day on August 15, 2017.
    Independence day quotes in telugu 2017

    ReplyDelete