December ni 31, 2009 zan kha a chhinchhiah tlak hle; halpuah leh a kaihhnawih thil lakah Aizawl a fihlim ti hiala sawi chi chu ni lo mah se kum danga kumhlui thlah zan nena khaikhin chuan dang tak a ni.
Halpuah leh a kaihhnawih thilte hi kum hlui thlahna hmanrua ber pakhat tiin a sawi theih ang. Khawvel hmun dangah pawh an hmang nasa a, Mizoramah pawh Krismas bazar-a hralh tla ber pakhat a ni kum tin thin. 2009 thlah zanah erawh Aizawl a bengchheng lo a, boruak pawh tum dang angin a bawlhhlawh lo.
Kumhlui thlah zana Aizawl bengchhen dan leh boruak bawlhhlawh dan tehtu Mizoram Pollution Control Board te chuan 2009 kumhlui thlah zanah kum dang aiin boruak a thianghlimin thawm pawh a bengchheng lo hle tih an hmuchhuak a ni.
Mizoram Pollution Control Board te hian boruak bawlhhlawh dan chu RSPM leh SPM tiin an teh a, kum dang aiin Aizawl boruak a thianghlim tih an chhut chhuak a ni.
December ni 31, 2008-ah khan Aizawla boruak bawlhhlawh hip luh theih (respirable suspended particulate matter - RSPM) chu 46µg/m³ a ni a, 2007 kumhlui thlah zanah phei kha chuan RSPM hian 104µg/m³ daih a ni! 2006 kumhlui thlah zanah chuan 80µg/m³ a thleng. 2009 kumhlui thlah zanah chuan 31µg/m³ chauh a ni.
SPM (Suspended Particulate Matter - boruaka bawlhhlawh leng vel hrim hrim) chu 2008 kumhlui thlah zanah 104µg/m³ a nih laiin 2009 December ni 31 zanah chuan 63µg/m³-ah a tla thla.
Khawpui bengchhen zawng tehnaah pawh kum hmasa kumhlui thlah zanah Aizawl chu 68.4 db a nih laiin 2009 kumhlui thlah zanah chuan 44 db chauh a ni. India sorkar chuan zan lama bengchhen theih zawngah 45 db chu him chinah a ngai a, chu ai chuan 2009 kumhlui thlah zana Aizawl bengchhen zawng chu a hniam zawk a ni.
"Sulphur dioxide leh nitrogen dioxide te phei chu teh tham awm lo khawpin a tlem a ni," tiin Pollution Control Board chuan thuchhuah an siam a, "Halpuah leh a kaihhnawih kan hal loh avanga boruak bawlhhlawh a tlem ta em em mai hi a lawmawm hle a, kan hriselnain nasa takin a that phah ang tih rinhlelh rual a ni lo," an ti bawk.
Home deptt. ngenna chhangin CYMA chuan kumhlui thlah zanah halpuah hal a nih loh theihnan hma an la a, veng hrang hrangah YMA branch te'n an bawhzui bawk. December ni 31 zanah khan CYMA hruaitute chu hmun hrang hrangah an kalkual a, an president Lalchungnunga chuan, "Halpuah a puak eih lo chu a ni lo a, mahse, kum dang angin a puak nasa lo," tiin an thlir dan a sawi.
"Lo tipuak zeuh leh hal tumte chu khawimaw lai laiah chuan an lo awm a, mahse, kan inhrilhfiah zel a, kum dang ngaihtuah chuan zia tak a ni," a ti.
"Mipui hian thu kan lo awih em mai mai a lo ni a, a chhe lai hi kan lo sawi nasa lutuk te pawh a angin ka hria," a ti nghe nghe.
Aizawl kumhlui thlah zan
RSPM
2006 80µg/m³
2007 104µg/m³
2008 46µg/m³
2009 31µg/m³
SPM
2006 151µg/m³
2007 227µg/m³
2008 104µg/m³
2009 63µg/m³
Bengchhen zawng
2006 85db
2007 82.5db
2008 68.4db
2009 44db
Monday, January 18, 2010
Aw zan thianghlim...
Subscribe to:
Post Comments (Atom)
No comments:
Post a Comment