Monday, December 14, 2009

Zaithiam Lar Rihanna-i'n Zonu Kutchhuak

¢ Hmingsanga

‘Under My Umbrella’ tih hla a sak avanga khawvela hming thang ta Rihanna hi tunlai thangthar zingah hre lo an tlem viau mai thei. Tunlai hmeichhe zaithiam zingah chuan a chim chin sang ber pawl, a kalna hmun apianga lawm hlawh a ni. Chanchin thar a neih apiangin a chanchin chu khawvel hmun hrang hranga darh nghal chum chum thin a ni.

Margaret Thangmawi Keivom

Chutiang khawp lar leh hmingthang, amah ngaisangtu mi nuaih tam tak neitu Rihanna chu November ni 27-ah khan Bristish Reality Show hlawhtling ber pawl The X Factor show-ah a inlan a, hemi tum hian Rihanna chu a inchei nalh ngang mai. A thawmhnaw hak, rangkachak rawng ringawt pawh a ngaisangtute chuan mit tla lek lekin an thlir a, a rangkachak thi lian nelh nawlh pawhin mit a la zar mai. Rangkachak thi satliah a ni lo, a locket leh a design hrim hrim pawh a mawi danglam hle. Chu thi chu Mizo nu Mawii Hmar-in uluk leh duh taka a design a ni!

Rihanna hian rimawi khawvelah chawimawina chi hrang hrang- World Music Awards for World's Best-Selling Pop Female Artist, Female Entertainer of the Year, American Music Awards for Favorite Soul/R&B Female Artist, Favorite Pop/Rock Female Artist 2008 te a dawng tawh. Chutiang khawpa lar chuan Zonu kutchhuak a inbel tlat!
Rihanna

London chu fashion hmunpui pakhat a ni. Chu khawpuia London Female Owned Bussiness of The Year, London Fashion Week New Generation Award lawmman hi tute hnenah nge hlan thin a nih kan la hre lo mai thei. Vogue, Harpers & Queen, Elle, Marie Claire, Cosmopolitan, The Times, Observer, Telegraph, Wall Paper, ID, The Face te hi chanchinbu zahawm leh hralh kal an ni a, Kylie Minogue, Denise Van Outen, Shakira, Kate Moss, Gwyneth Paltrow, June Sarpong, Dani Behr leh Samantha Mumba te hi khawvelin celebrity-ah a pawm. A chhunga kan tarlan zawng zawng te hi Mizo nu pakhat nen inzawmna an nei tih tlai khawhnu-ah kan han hre thar ve a, kan han chhui zui a, chhui zui a dawl a, chhui tlak a ni bawk.

Zoram khawvel fanu
Mizo Academy of Letters te'n 1991 khan "Zoram Khawvel" chu Book Of The Year atan an thlang a nih kha. Kha lehkhabu ziaktu kha L Keivom tia kan hriat, India sorkar tana palai hna (IFS) thawka khawvel hmun hrang hranga awm kual hrep tawh, thu leh hla hmanga Zofate chhem alh thintu a ni.

L Keivom fanu upa ber chu Margaret Thangmawi Keivom a ni. A pa hna vangin Africa, Saudi Arabia, Burma, New Zealand, Milan, Boston, New York tih velah a a lo kual ve hrep tawh. A naupan lai hun tam zawk chu Africa-ah hmangin mihang naupang dangte ang bawkin sanghawngsei te tual lenna hmunah pawh a lo tlan kawi ve zar zar tawh thin. Ramhnuaia an vah velnaah ransa vun leh ruh nalh deuh nia a hriat te chu hman tangkai hun a la awm ang tia chhar khawm peih tak a ni. Naupang kum 10 mi lek a nih lai atang tawhin a thiante diary-ah pawh nih chak a ziah apiangin 'fashion designer' tih a ziak ngat zel.

A inzirna lamah a nu thawmhnaw hlui a zai chhe hnem hle. Thawmhnaw hluiin a daih loh chang phei chuan a nu kawr tha lai pawh a chep chhe hial thin. A nu chuan thil thui mawi leh thui par lam chu a thiam dan dain a zirtir thin bawk. A rualpui hmeichhe naupangte tual laiah hlim taka an infiam lai te hian Mawii chuan a nu kiangah chu'ng thil chu nuam ti takin a zir thin.

Foreign Thiamna Temin
Fashion Designing lama a tui em avangin chu lamah chuan hlawhtlin ngei pawh a tum hle. A pa New Zealand-a an sawn hnu-ah Auckland Institute of Technology, New Zealand-ah a tuizawng chu zirin chu hmun atang chuan a graduat. He hmun atanga a zirchhuah hnu hian Isaac Mizrahi, New York, Bill Amberg, Via Couture, London-ah te a'n thawk kual ve zar zar a, a thiamna chuan sang takah chawisangin mite hriat pawh a hlawh hma hle.


London ah Loan
Hmeichhe danglam leh kut themthiam tak a nih avangin a thiam thil chu theihtawp chhuahin a pho lang ve zel a, mi hnuaia thawh reng ai chuan tiin mahni kea din chu a thupui ber a ni. Tichuan, London-a a awm lai chuan loan lain £700-in bul a tan ta a ni. Hmeichhe thawmhnaw lam buaipui chu bansan chuang lovin bag design lamah tan a la thar a, ama pual tur liau liauva a bag siam chu a thiante'n an hmuh chuan nalh an ti hle. Nasa zawkin chu lamah chuan kal zawk se tiin thurawn pawh a dawng nual reng a ni.

A loan lak hmang chuan bag pasarihin bul a'n tan a, a bag siamchhuahte hi London khawpuia hetiang lam zawrhna dawr lian ber The Cross an tih mai chuan a vaiin an khar ta vek mai. Hralh pawh a kal hle a ni awm e.

Hemi hnu hian jewellery lamah bul a'n tan zui leh ta a, hetia hlawhtlinna lamtluang a zawh tan tirh lam hian a sumdawnpui, a hnua a pasal ni ta Tim Awan inpekna hi Mawii chuan ropui a ti hle. A pasal Tim hi TV lama production lam hna thawk thin a ni a, chutia a nupui thil siamchhuah, London-a dawr lian leh ropui te'n an khar sak vek tih a hriat chuan an nu thiamna ril chu a hmuh hmaih hauh lo. Theihtawp chhuaha a nupui tanpui chu tumin TV lama a hna chu bansanin "Mawi Ltd" tiin Islington, London-ah bul an tan dun ta a ni.

Mawii'n London a Mawi
London khawpuiah chuan Mawii chuan bag leh jewellery lamah a hming a chher tan. Mi lar leh flim star bakah mi hausa tak takte chuan Mawii thil siamchhuah chu an lei sup sup a ni ber. Fashion lam ngaihvente tan chuan 'Mawii' tih chu hming naran a ni tawh lo a, sap nu changkang pui pui leh hausa nuho bakah celebrity-ho chuan Mizo nu hming chu an lam ngun ta hle.

LONDON FEMALE OWNED BUSINESS OF THE YEAR 2005, Passport to Export Awards 2005 lawmman te a dawng ta hial. LONDON FASHION WEEK NEW GENERATION AWARD te ngat phei chu kum thum chhung a zawnin zu han dawng thei. Mawii thil siamchhuah London khawpuia dawr changkang leh lun deuh deuh Selfridges; Liberty, Fenwick, Harvey Nichols, Browns Focus,Willma-ah te an zuar chhawng ta fur mai. Heng bakah hian khawvel hmun dang danga dawr hrang hrang 40 chuangah a kutchhuak hi hmuh theih a ni ta bawk.

Fashion atangin Missionary
Mawii hian a thiamnate chu Pathian pek a ni tih a chiang hle. Kristian chhungkua atanga chhawrchhuak a ni bawk a, a thiamna leh a remhriatna hmangin a thil siamah lantir duh a nei thin. A bag siamchhuahah te chuan "Jesus Cares" tih te a ziak thin a, Thusawm Pek-a mi "Tualthat suh" tih thu te chu a ziak fo bawk.

Mawii chuan Pathian thu la hre ngai lo te'n heng atang tala Pathian an hre thei hlauh a nih chuan tiin a thiamna hmangin Chanchin |ha puanzar a tum tlat a ni.

Bul a tan tirh lai vel kha chuan hlawhtling tur chuan thawhrim a tul tih a chian em avangin ni tin darkar 16 te hna a thawk thin. A tul a nih phawt chuan darkar 16 -18 chhung te a thawk thin bawk.

India hian a hmelhriat em?
India hian he Mizo nu hi a hmelhriat em? A hmelhriat rih lo tlat. A chhan chu a hming hi Sunita emaw Geeta tih emaw a ni lo a, Fashion Industry lama thang duang tak India hian tunah mai chuan a la hmelhriat rih lo a ni mai thei.

Hetih lai hian India rama ni tin chanchinbu lar Hindustan Times tih vel te chuan an interview ve tawh e. Mahse, London-ah leh khawvel hmun dangah chuan a hming hi an hre tlat tawh si a nih hi maw.

Tin, Mawii thil siamchhuahte lei tur hian India chu a la inpeih lo ni-a ngaih a ni. A chhan chu a thil siamchhuahte hi to hlawm em a, a kawnghren siam pakhat man pawh £300 man vel te a ni lawih mai!

Related Posts :



3 comments:

  1. Mi a van ti phur ve aw... kan ti thei ve chiang ani tih a lan tir E. Ka lawm E.

    ReplyDelete
  2. a lo ti tak tak nih chuan tha,thu thang hi atam duh em mai. thuthang hi awih chin neih tur

    ReplyDelete