Monday, December 7, 2009

WINTER HAIR CARE

¢ Debbie Chawngthu

Thlasik lai chuan kan vun mai bakah sam thlengin a ro duh em em a, vun tih hnawmna tur chu a awm ve zel mai a, sam erawh chu enkawl dan thiam ve a ngai a, chuvangin, thalsik sam ro enkawl dan i han tarlang teh ang. Sam ro hi a hmawr a kakin a ro duh bik a, enkawl ngun a ngai bik em em a ni. Sam ro i nei anih chuan olive oil emaw coconut oil chhuang lum la, zan mut dawnah i luleiah tat chhuak vek la, a tuk zingah i su leh dawn nia. Sam ro nei tan chuan shampoo pawh hi a tlem thei ang ber a tha a, sam suk nan tui sa hman loh tur a ni. Tin, shampoo pawh sam ro tana siam bik chauh hman a tha a, oil hmangin kartin vawikhat tal massage ziah bawk tur a ni.

Sam tih kir zin lutuk hi sam chhiatna hmawr pakhat chu a ni a, i sam i ti kir zing anih pawhin chemical tel lovin ti kir thin ang che. Sam hmawr a kak anih chuan regular takin a hmawr paih tir thin la, anih loh chuan i sam a nung thei lo ang. Luphut hian sam a tichhe duh hle bawk a, luphut nei tan chuan shampoo hman pawhin artui leh khawizu atanga siam hman thin hi duhthusam a ni. Luphut i nei nasa anih chuan i mut dawnin i lulei kha oil in massage chhuak vek la, a tuk zinga i suk dawnin sertui hmangin i lu chu massage leh bawk ang che. Minute 20 chhung chiahin kartin vawikhat tal i tih peih chuan i luphut a reh thei ang.

Sam a chhiat riau chuan kan ei leh inah pawh kan fimkhur tawk lo a ni thei a, sam hi protein atanga siam anih ang ngeiin protein tamna te, vitamin B tamna te hi kan sam mai bakah kan taksa hrisel nan kan mamawh reng a ni tih hriat nawn fo a tha. Sangha leh arti hi kan samin a ngeih em em bawk a, sa thau leh mawm lutuk te hi ei tlem tur a ni.

Sam enkawlna kawngah a hnuai ami te hi hre reng thin ang che ~~~


1) I lu a phut anih chuan i suk hmain minute 15-20 chhung i kutzungtang hmangin massage thin la, chumi hnuah samkhuih hrawin khuih mam la, chumi zawha samkhuih sinin khuih leh ang che. I khuih zawhah oil chhuang sa la, chumi hmang chuan i lulei massage leh ang che. I massage khan luphut a chhuak a, sukfai a awl bik a ni.

2) Shampoo ngai ngawt ngawt hmang lo hram la, in chhungkua in thahnem lo anih phei chuan shampoo bur lian lutuk lei duh lem suh. Kan sam awmdan te hi boruak azirin a inthlak ve zel a, chuvangin kan shampoo hman te pawh hi thlak an ngai ve thin a ni.

3) I sam i suk zawhin amahin ro tir hram la, a loh theih loh anih pawhin blow-dryer hman tam loh tum ang che. I sam i set emaw i chhem ro hmain i sam a fai tawk em tih chian thin phawt ang che.

4) I sam i sukin hmanhmawh lutuk suh, dim taka nuaiin shampoo-in hna a thawh theih hun chhung ang chu massage thin ang che. I sam a mawm anih chuan i sam i tih huh hmain shampoo hnawih hmasa phawt rawh.

5) Sam sei tan chuan sam suk zawha khuih vak vakin sam a fan a, a bung duh em em a ni. Sam mawm tan chuan thei pakhat tui hi luleiah hnawih a, nuai tur a ni. Suk fai hnua tleuhna tur tuiah vinegar fiankhat telh a tha bawk.

6) Hair curler hmang thin i nih chuan i sam zial nghet lutuk lo hram ang che, sam a bung duhin a chhe hma bik a ni.

7) Hair spray hi a thawk chak hle a, sam ro tan phei chuan hman loh a tha zawk. Engemaw chhuah vah niah chauh hmang thin ang che.

8) Sam i zuah tan anih pawhin kar ruk danah tal a hmawr paih tir ziah ang che. Tin, hair style thlak zeuh zeuh hian rilru pawh a ti tharlam ve a, hair style i thlak duh lo anih pawhin a rawng te han thlak ve la, a ti hlim sawt ang che.

9) Sam tan dan azirin kan lang thain kan kan lang tha lo ve thei a, chuvangin thiante tih tir mai mai lovin a thiam te chauh tan tir thin ang che. Tin, sam tan thiam hrang hrang pan ai chuan a ngai tan tir hian kan sam kal hmang an lo hre tawh a, a ngai pan hi a tha ber fo.

10) Sam tha tur chuan a fai a pawimawh ber a, i sam chu fai takin dah reng tum ang che.

Hair conditioner nagmaha i siam duh anih chuan hetiang hian siam thin ang che ~~

QUICK HAIR CONDITIONER: I mamawh tur te chu ~~ a) Artui pakhat b)2 tablespoon castor oil c) 1 teaspoon vinegar d) 1 teaspoon glycerine.
Hengte hi chawhpawlh vek la, rei tak chawk ang che. A inchawhpawlh tha ta hle tih ah i luleiah tat chhuak vek ang che. I tah zawhah towel sa in i lu tuam la, reilo deuh hnuah sufai ang che. He conditioner hian i sam a ti lang tam a, a tlein enkawl a sam phah bawk ang.

HONEY CONDITIONER: I mamawh tur te chu ~~ a) Artui pakhat b) 1 teaspoon honey(khawizu) c) 2 teaspoon coconut or olive oil.
Artui hi chawk phuan la, chutah chuan oil leh khawizu chu telh ang che. A inchawhpawlh that hnuah i luleiah tat la, tui hu-in i sam chu ur leh la, su ang che.

ALCOHOL CONDITIONER: Artui pakhat leh brandy tablespoon hnih chawhpawlh la, chu chu i luleiah tat chhuak ang che. Minute 20 i chiah hnuah sukfai leh mai tur a ni. Anih loh pawhin purun sen lian vaklo hi zai lep la, rum (zu) no chan ve telh la, darkar 24 chhung chiah ang che. Chumi hnuah purun sen chu la chhuak la, a tui khan i lulei chu massage ang che. Hei hian a bikin sam tla tur a veng thei a ni.

Related Posts :



1 comment:

  1. I don't even know how I ended up here, but I thought this post was good. I don't know who
    you are but definitely уou are going tο a famоus bloggeг if you aгe not аlreaԁy ;) Chееrs!


    Alsο visit my website - best samsung galaxy s3 cases

    ReplyDelete