Kan Nghah Krismas

Kan nghah krismas a hnai, hmang tura kan inpuahchah dan erawh a inang lo hlawm hle thung.

Ruai theh, zaikhawm, carol, thawmhnaw thar leh in leh chhehvel bakah Biak in chei, khawlai chei thlengin Krismas kaihhnawih a ni.

Chumai a ni lo, Lal pian champhaah hian sualna pawh a pung a, hlim taka hman kan tum a, lungngaihnain min tlak buai fo thin.

Krismas kan hman dan a in ang lo nuai a, kan nghah dan pawh a inang chuang hek lo. Kan rilru put hmang a zir zelin a dang mai a ni.

Tun hmaa Krismas kan hman dan leh tunlaia kan hman dan leh nghah dan a inang tawh lova, thlarau ruai theh lam ai chuan khawvel thil taka hman rilru chuan min hneh tawh zawk.

Mipat hmeichhiatna, thawmhnaw, ruih duhna te chuan min hneh hle tawh a, Remna Lal pian champha meuhah thlamuang taka hman a nih theihnan khawtlang duty thlengin kan insiam thin a ni.

Chhandamtu pian chhan dik tak ngaihtuah chiang duh lovin keimahni nawmchen nan he hun ropui tak hi hman kan tum a, kan hmang thin bawk reng a, a bik takin Mizo Kristian inti tena kan hman dan hi chhut chian a ngai nasa leh zual.

Krismas lawmnana kan hun hman leh kan la hman leh zel turah pawh hian Lal Isua lo piannan hmun kan kian meuh em. A nihna takah chuan hlim hunah kan ngai a, a ni reng bawk a, chu chuan sualna hrang hrang a ko chhuak tih pawhin a ngaih theih awm e.

Krismas a lo thlen dawn hnaih chuan Krismas chakkhai dapin chhungtin kan hmanhlel a, nu leh paten neih thinglung khawngin an faten Krismas an hmang nuam lo bik ang tih hlau reng rengin hun an hmang a, sum leh pai tam tak an seng ral thin.

Krismas dawn hnaihah chuan Bazar pangngai ni reng pawh Krismas Bazarah a chang zo a, mitin mai hi mahni nawmsakna tur zawngin kan phu suau suau thin. Ruih theih thil ti mi in ruihna tur an ngaihtuah buai a, nula tlangvalten hmanpui tur kan ngaihtuah buai bawk a, mi tinreng hi he hun lo thleng tur avang hian kan helhhawlh a ni ber.

Krismas hi engtianga hman nge kan tum a, engti zawngin nge kan hmuah le! Thlarau lam ai chuan khawvel thil takin a ni kan hmuah ni.

Sex Christmas
Hman ata tawh vawiin thlenga tawngkam lar tak chu, ‘Christmas result’ a ni.

Kum thar hnu lawkah nula rai an awm thin a, a koh duatnan Krismas result a lang tih a ni mai thin.

Aizawl khawpuiah hian mipat hmeichhiatna a hluar sa reng a, Krismas lai hian a hluar zual thin mai zawk a ni.

Awm awl hun lai a ni a, chawlh hun a rei vang leh mi tin rilruah nuam tawl rilru a len vangin intihhlimna lam pawh uar a ni thin.

Tun laiah erawh khawvel thiamna a sang tawh a, nula an rai mawh tawh khawp mai. Rai lohna damdawi a awm tlat tawh a ni.

Hmeichhe condom thlengin a chhuak tawh a, chu ai maha hralh kal zawk chu pills a ni.

Condom hmang lo pawha inven theihna damdawi a awm a, chu chu a lar tak zet mai.

Aizawl khawpuia damdawi zuarte Zozam Weekly-in a biak pawhte chuan chu damdawi chu hralh a kal zia thu an sawi a, hunpui laiin an hralh thei leh zual niin an sawi bawk.

“Ni tin in 10 tal hralh ang zel kan ni ang. Damdawi zingah chuan hralh kal ber pawl a ni ang, hei tunah phei chuan kan nghei leh nghal” tiin Zozam Weekly in a biak pawh damdawi zuartu chuan a sawi.

He damdawi hi dan kalh damdawi a ni lova, phalna nei thlapa zawrh a ni. A leitu te erawh dan kalh an awm pawh a ni mahna!

“A rawn lei thenkhat hi chu an naupang thei khawp mai” tia sawiin, “Kum upa lam hi chuan an lei vak lo, a tlangpuiin kum 15 atanga 25 inkar ang vel an ni ber ang,” a ti a.

Damdawi zuartu chuan, “Hmeichhia leh mipa-in an lei ve ve,” a ti a. “Damdawi a nih angin huai takin an lei mai. |henkhat lei ngun deuhte erawh chu an awm a, thenkhat chuan an awmpui te niawm tak rawn leitir te pawh an awm. Damdawi hming an rawn ziaksa mai a” tiin a sawi bawk.

“Mr. Big an lokal dawn an tih khan ka rilru te te chuan tukah chuan kan hralh hnem leh dawn mang e, ka lo ti mai a. Eng emaw puipunna deuh a awm a piang hian a tuk lawkah kan hralh nasa zual thin,” a ti bawk.

He damdawi hi damdawi dawr zawng zawngah an zuar lo a. A zuar chhunte erawh chuan an hralh theih thu an sawi vek thung.

Rai lohna damdawi hi chi hnih vel a awm a, mipat hmeichhiatna hman hnu darkar 72 chhunga ei hman chuan hmeichhia rai tur a veng thei tura ngaih a ni.

Nau pai lo tura invenna damdawiin hralh a tlak viau rual hian nau tihtlak (abortion) pawh Aizawlah hian a harsa lo hle. Nau titla hi a zat chhinchhiah a ni lo a, 'a hluar' ti emaw, 'a hluar lo' ti emawa huai taka mipui hmaa sawi ngam a ni lo. Amaherawhchu hemi chungchanga biak pawh doctor-te chuan nau tihtlak hi a hluar an rin thu an sawi hlawm. Mahse, huai tak chuan an sawi ngam chuang lo.

Chu chu rai vengtu chauh a ni. A hlauhawm ber zawk erawh mipat hmeichhiatnain a ken tel natna tihbaiawm Aids a ni.

NGO hrang hrang leh MSACS te ngei pawhin Aids natna chu mipui nawlpui rin aia darh nasa thei turah an ngai vek.

MSACS project director Dr. Eric Zomawia chuan nulate hian “Aids aiin rai an hlau zawk” tiin fiamthu ti takin a sawi mauh tawh bawk.

New Life Home Society Project Director Samuel-a chuan mipat hmeichhiatna hman khaw loh chu a hluar ni a sawiin, “Mipat hmeichhiatna hman khaw loh hi a hluar lutuk tlat. Hei hi Aids inkaichhawnna bulpui ber a ni,” a ti. Chu chu Krismas boruak velah hian a nasat leh zual hmel.

Mizorama mihring awm zat hi nuai 8 chuang kan ni a, chutih laiin thisen test hi nuai khat pawh kan la tling teuh lo, chuti chunga Aids vei zat hmuhchhuah ringawt pawh tam tak a ni.

Chutah pawh test chin te hi chu tlem te, mirethei deuh zawk an ni tlangpuiah kan ngai thei ang. Mihausa leh thiltithei leh pangngai deuh chin chuan zep vek an duh a, an inringhlel a nih pawhin hetah an ti lo ang.

Aids chungchangah ngat phei chuan KS kan tihte aiin mi pangngai kan tihte hi an hlauhawm mah zawk ni a sawi a ni. Samuela chuan, “Mipat hmeichhiatna kawngah kan enkawl laite hi chu a him thei ang bera hman dan te kan zirtir a, mahse, midangte hi chuan chutiang zirtirna chu an dawng tawh si lo. An inngaizawng a, sex an hmang deuh zel a, kan rin phak bak hian kan inkaichhawn tam tawh ang,” a ti.

New Life Home Society a project manager a ni a, heti lam hlir buaipuia hmahlel a ni. Samuel-a chuan, “Nupui/pasala inneih hnua an fate positive ta te pawh kan hria alawm. Chu mai a ni lo, kum 14 mi lek lek positive pawh an awm. Chu’ngte chu mipat hmeichiatna hman khawloh vang a ni. Invenna chang an hre lo a, inveng tur pawhin an ngaihtuahna an seng lo pawh a ni mahna,” a ti.

“Mizoram-ah hian vur tlang sut chhiat tur awm angah tehkhin ta ila, a nihna takah chuan 10% vel chauh hi Aids vei kan hriatte a ni a, 90% vel hi la inpuang lo leh kan hriat loh an ni bawkin kan ring a ni,” a ti mauh bawk.

“Hmeichhia leh mipaah te hian thisen pe ngam lo hi an tam em em a, thisen test duh lo thuai te hi an tam lutuk,” a ti a, “School-ah te kan kal a, an hming leh nihna ziak miah lova an zawhna zawh duh zawt tura kan tihte hian mipat hmeichiatna lam hi a tam lawr lak a. Rai theih hun leh rai theih loh hun ang chi te hi zawhna kan dawn tam ber zawk a ni,” a ti bawk.

Duty Krismas
Aizawl veng tin deuhthaw-ah Krismas leh kumthar hlim taka hman a nih theihnan tia sawiin khawtlang duty in siam thin a ni.

Kuminah pawh a danglam chuang lo, kan hunpui neih chhun tak meuh a nih avangin kawng engkimah kan urlawk a ni ber mai.

Zan khua a duty an awm a, duty te chuan misual man chu an hna ber a ni mai awm e.

Hunpui lai a nih vangin rukruk a hluar thin ni tur a ni. Kawng engkimah sorkar duh tawk lovin khawtlang bil te te in an duty thin a ni.

Tun hma phei chuan khawtlang duty te khan ‘license to check’ an nei ve tawp a. An duh duh an check tawp thei mai zel.

He khawpuiah hian nula tlangval zana leng chu lerh deuh emaw leh engemaw deuha chhuahna khawpui a ni a.

Aizawl khawpui hian nula leh tlangvalte chu inkhawm zan apiang a inkhawm thap thap a, inkhawm zan lovah pawh mahni in a fel taka awm turin a phu a, chumi hmang chuan teh an ni bawk.

Chutiang bak pela hawi thawveng duh deuhte chu vantlang aiawhten an veh tawh mai thin a ni.

Nula leh tlangvalte hian hawi thawven ve deuh an duh a nih pawhin khapsak vek anni nghal phawt a. Beraw tlangah pawh duty an awm mai a, chutiang zel chuan thalaite hawi thawvenna tur hmun apiang mai chu ven a ni deuh nghal mai zel.

Tun hnai lawkah World Bank Road velah zanah thalai rual an kal thin a. Chu pawh chu thuneitute hnen a thleng vat mai. Veng pakhat YMA chuan thuchhuah siamin Mizo hnam leh Kristianna timualpho zawnga khawak an phal loh thu leh chutiang ti lai man leh hriat chhuah an awm chuan an chungah eng pawh thleng se mawh anphurh loh tur thu thuchhuah meuh an siam hial.

A enga mah hmaa an chungah eng pawh thleng se mawhphur lo han tih tawp khawvel hi tlansan a hun tawh khawp mai.

Dan a awm a, dan hnuaiah chuan khua leh tui chu khawi hmunah pawh a kal thei a ni. Tu emaw lo phal loh mai theih pawh a ni lo, dan hi phuahchawp taka siam theih pawh a ni lo. Mob rule khawvel hi chu kan tlansan deuh a ngai tawh a ni.

Krismas chu a rau thei ang bera hman duhna rilru a awm avangin khap a tam phah ta a ni. Veng chhunga duty te chu Krismas vuat veta inlar a ni. Kan thupui ber chu hlim taka Krismas hman a ni a, kan ven ber pawh Krismas hlim taka hman min daltu a ni. Mahe, kan inven dan chuan midangte a nek chep em em thung.

Fashion Krismas
Krismas chu kumpui lingleta chawlh der derna hun a nih avangin a hlu a ni.

Thingtlang mite tan phei chuan kum khat chhunga an awl theih hun a ni a, a hlu bik hle.

Fashion boruakin min chiahpiah nghal a, thlasik a nih vangin fashion inthlak thleng hun a nih bawk vangin incheina thar a ngai hrim hrim.

Khaw lum lai chuan kawrlum mamawh a ni lova. Khaw vawh lai a nih vangin kawrlum mamawh a ni thung a. Krismas boruak chuan incheina lam rilru kan pek chu a tihlu zual mai chauh a ni.

Kumin Krismas pawh kum dang ang tho tur a ni a, mahse, khawvel changkan dan ang zelin kan taste erawh a sang tual tual thung.

Sumdawng tam tak chuan India ram pawn Bangkok leh China tih velah thawmhnaw an la tan der tawh a. Aizawl khawpuiah ngei hian Made in foreign ha chin an kat nuk mai.

Thuamhnaw chu Krismas leh a chhehvela roreltu ber pakhat a ni leh dawn a ni.

Luhai Krismas
Mi pangngai nih loh hi mi tam takte nuam tih ber a ni. Chu chu Krismas a nih veleh a nasa zual thin.

Zu in mi an tam a, khapna pawhin a hneh hek lo. Zu chu khap bur a ni a, mahse, awmzia a nei lo. Zu rui nazawng man anni ngai lova, man sen pawh va ni suh!

Zu mana sum sen chu tam tak mai a ni a, zu neih pawh thil harsa tak a ni bawk. Tun atang tawh rengin Aizawl pa tam tak chu an vir buai tawh a, ‘Krismas Stock’ tia sawi maiin hunpui laia a nei lo nih hlauin an inchhek leh tin ten tawh.

Zu man to vanglai a ni bawk a. A sen chi a nih tawh dek chuan Rs 500/- a nih nghalna bur a ni. Zu vanga Mizoram pawna sum luang liam chu tam tham tak a ni a, zu vanga zu zuar hausakna pawh nasa tak niin zu zuar an sim tha duh der lo.

Krismas apianga man to hmasa ber chu zu a ni a, demand sanna ber pawh a ni ngei thin.

Related Posts :